ಪೇಟಿಎಂ ಬಳಸುತ್ತಿದ್ದೀರಾ?: ಎಚ್ಚರ, ನಿಮ್ಮ ಮಾಹಿತಿ ಕಳುವಾಗಿದೆ!
COVER STORY

ಪೇಟಿಎಂ ಬಳಸುತ್ತಿದ್ದೀರಾ?: ಎಚ್ಚರ, ನಿಮ್ಮ ಮಾಹಿತಿ ಕಳುವಾಗಿದೆ!

ಪೇಟಿಎಂ ಕಂಪನಿಯಲ್ಲಿ ಕಳೆದ ಹತ್ತು ವರ್ಷಗಳಿಂದ ಕೆಲಸ ಮಾಡುತ್ತಿದ್ದ ಸೋನಿಯಾ ದಿವಾನ್ ಎಂಬ ಮಹಿಳಾ ಸಿಬ್ಬಂದಿ ಗ್ರಾಹಕರ ಮಾಹಿತಿ (ಡಾಟಾ) ಕದ್ದ ಆರೋಪಕ್ಕೆ ಗುರಿಯಾಗಿದ್ದಾರೆ. 

ಅನಾಣ್ಯೀಕರಣದ ನಂತರ ಪ್ರಧಾನಿ ಭಾವಚಿತ್ರವನ್ನೇ ತನ್ನ ಪ್ರಚಾರಕ್ಕೆ ಬಳಸಿಕೊಂಡಿದ್ದ ಪೇಟಿಎಂ ಕಂಪನಿ ಮತ್ತೆ ಸುದ್ದಿ ಕೇಂದ್ರಕ್ಕೆ ಬಂದಿದೆ. ಈ ಬಾರಿ, ಕಂಪನಿಯ ಗ್ರಾಹಕ ಮಾಹಿತಿಯನ್ನು ಕದ್ದು, ಅದನ್ನು ಬಹಿರಂಗಗೊಳಿಸುವುದಾಗಿ 20 ಕೋಟಿ ಬ್ಲಾಕ್‌ಮೇಲ್‌ಗೆ ಇಳಿದ ಆರೋಪದ ಮೇಲೆ ಮೂವರು ಸಿಬ್ಬಂದಿಗಳನ್ನು ಬಂಧಿಸಲಾಗಿದೆ. ಸೋಮವಾರ ಸಂಜೆ ವೇಳೆ ದಿಲ್ಲಿ ಪೊಲೀಸರು ಒಬ್ಬರು ಮಹಿಳಾ ಸಿಬ್ಬಂದಿ ಸೇರಿದಂತೆ ಮೂವರನ್ನು ಬಂದಿಸಿದ್ದು, ಇನ್ನೊಬ್ಬನಿಗಾಗಿ ಶೋಧ ನಡೆಸುತ್ತಿದ್ದಾರೆ.

ನಡೆದಿದ್ದು ಏನು?

ಪೇಟಿಎಂ ಹೆಸರಿನ ಟೆಕ್ ಕಂಪನಿ ಇ- ವ್ಯಾಲೆಟ್ ಸೇವೆಯನ್ನು ನೀಡುತ್ತದೆ. ನಗದು ರಹಿತ ವ್ಯವಹಾರವನ್ನು ಉತ್ತೇಜಿಸುವುದಾಗಿ ಹೇಳಿಕೊಂಡಿದ್ದ ಕಂಪನಿ ಅನಾಣ್ಯೀಕರಣದ ನಂತರ ಭಾರಿ ವಹಿವಾಟನ್ನು ಕಂಡಿತ್ತು. ಕಂಪನಿಯ ಸಂಸ್ಥಾಪಕ ವಿಜಯ್ ಶೇಖರ್ ಶರ್ಮಾ ಪ್ರಧಾನಿ ನರೇಂದ್ರ ಮೋದಿ ಭಾವಚಿತ್ರವನ್ನೇ ತಮ್ಮ ಕಂಪನಿಯ ಪ್ರಚಾರಕ್ಕೆ ಅಕ್ರಮವಾಗಿ ಬಳಸಿಕೊಂಡಿದ್ದರು.

ಇವರ ಪೇಟಿಎಂ ಕಂಪನಿಯಲ್ಲಿ ಕಳೆದ ಹತ್ತು ವರ್ಷಗಳಿಂದ ಕೆಲಸ ಮಾಡುತ್ತಿದ್ದ ಸೋನಿಯಾ ದಿವಾನ್ ಎಂಬ ಮಹಿಳಾ ಸಿಬ್ಬಂದಿ ಗ್ರಾಹಕರ ಮಾಹಿತಿ (ಡಾಟಾ) ಕದ್ದ ಆರೋಪಕ್ಕೆ ಗುರಿಯಾಗಿದ್ದಾರೆ. ಅಷ್ಟೆ ಅಲ್ಲ, ಅದನ್ನು ಸೋರಿಕೆ ಮಾಡುವುದಾಗಿ ಬೆದರಿಕೆ ಹಾಕಿದ ಆರೋಪವನ್ನೂ ಹೊತ್ತುಕೊಂಡಿದ್ದಾರೆ. ಒಂದು ವೇಳೆ ಮಾಹಿತಿಯನ್ನು ಸೋರಿಕೆ ಮಾಡದೆ ಇರಲು 20 ಕೋಟಿ ನೀಡುವಂತೆ ವಿಜಯ್ ಶೇಖರ್ ತಮ್ಮ ಅಜಯ್ ಶೇಖರ್ ಶರ್ಮಾಗೆ ಕರೆ ಮಾಡಿದ್ದಾಗಿ ಪೊಲೀಸರು ಆರೋಪಿಸಿದ್ದಾರೆ. ಕರೆ ಮಾಡಿದ ಕೋಲ್ಕತ್ತಾ ಮೂಲದ ರೋಹಿತ್ ಚೋಮಲ್ ಎಂಬಾತನಿಗಾಗಿ ಶೋಧ ನಡೆಸುತ್ತಿದ್ದಾರೆ.

ಪೇಟಿಎಂ ಸಂಸ್ಥಾಪಕ ವಿಜಯ್ ಶೇಖರ್ ಶರ್ಮಾ. 
ಪೇಟಿಎಂ ಸಂಸ್ಥಾಪಕ ವಿಜಯ್ ಶೇಖರ್ ಶರ್ಮಾ. 

ಮಾಹಿತಿ ಸೋರಿಕೆ ಎಂದರೇನು?

ಇ- ಕಾಮರ್ಸ್‌ ಎಂದು ಕರೆಯುವ ಅಂತರ್ಜಾಲ ನೆಲೆಯ ವಾಣಿಜ್ಯ ಸೇವೆಯನ್ನು ನೀಡುವ ಪೇಟಿಎಂ ಸುಮಾರು 10 ಭಾರತೀಯ ಭಾಷೆಗಳಲ್ಲಿ ಆಪ್ ಸೇವೆಗಳನ್ನು ನೀಡುತ್ತಿದೆ. ಮೊಬೈಲ್ ರಿಚಾರ್ಜ್‌ನಿಂದ ಆರಂಭವಾಗಿ ಬಸ್‌ ಟಿಕೆಟ್ ಬುಕ್ಕಿಂಗ್‌ವರೆಗೆ ಪೇಟಿಂಗ್ ನಗದು ರಹಿತ ವ್ಯವಹಾರಕ್ಕೆ ವೇದಿಕೆಯಾಗಿದೆ. ದಿಲ್ಲಿಯ ನೋಯ್ಡದಲ್ಲಿ ಕೇಂದ್ರ ಕಚೇರಿ ಹೊಂದಿರುವ ಪೇಟಿಎಂ ವಿರುದ್ಧ ಅಮೆರಿಕಾ ಮೂಲದ, ಇದೇ ರೀತಿಯ ಇ-ಕಾಮರ್ಸ್ ಸೇವೆ ನೀಡುವ ಪೇ-ಪಾಲ್‌ 2016ರಲ್ಲಿ ಕಾಪಿರೈಟ್‌ ಕಾಯ್ದೆ ಅಡಿಯಲ್ಲಿ ದೂರು ದಾಖಲಿಸಿತ್ತು.

ಇವತ್ತಿಗೆ ಪೇಟಿಎಂ ಸುಮಾರು 10 ಬಿಲಿಯನ್ ಡಾಲರ್ ವಹಿವಾಟು ನಡೆಸುವ ಕಂಪನಿಯಾಗಿದೆ. 70 ಲಕ್ಷ ಮಾರಾಟಗಾರರು ತಮ್ಮ ಬ್ಯಾಂಕ್‌ ಖಾತೆಗಳನ್ನು ಪೇಟಿಎಂಗೆ ನೇರವಾಗಿ ವಿಲೀನ ಮಾಡಿದ್ದಾರೆ. ಅವರ ನಿತ್ಯ ವ್ಯವಹಾರ ನಡೆಸುವ ಖಾತೆಗಳು ಇವಾಗಿರುವುದರಿಂದ, ಅವು ಹೊಂದಿರುವ ಮಾಹಿತಿ ಮಾರಾಟಗಾರರ ಬದುಕಿನ ಜತೆ ನೇರ ಸಂಬಂಧ ಹೊಂದಿದೆ. ಇದೇ ರೀತಿ ಲಕ್ಷಾಂತರ ಗ್ರಾಹಕರು ಪೇಟಿಎಂ ಸೇವೆ ಬಳಸುತ್ತಿದ್ದಾರೆ. ಈ ಮಾಹಿತಿ ಕೂಡ ಆರ್ಥಿಕ ನೆಲೆಯಲ್ಲಿ ಸೂಕ್ಷ್ಮವಾದದ್ದು. ಇದನ್ನು ಸೋರಿಕೆ ಮಾಡಿದರೆ ಮಾರಾಟಗಾರರ ಹಾಗೂ ಗ್ರಾಹಕರ ಖಾಸಗಿ ವ್ಯವಹಾರಗಳಿಗೆ ಹೊಡೆತ ಬೀಳುತ್ತದೆ.

ಸದ್ಯ ಪೊಲೀಸರು ಹೇಳುವ ಪ್ರಕಾರ, ಪೇಟಿಎಂ ಉದ್ಯೋಗಿ ಈ ಸೂಕ್ಷ್ಮ ಮಾಹಿತಿಯನ್ನು ಕದ್ದು ಇನ್ನೊಬ್ಬರಿಗೆ ರವಾನಿಸಿದ್ದಾರೆ. ವಶಕ್ಕೆ ಪಡೆದಿರುವ ಲ್ಯಾಪ್‌ಟಾಪ್‌ಗಳಲ್ಲಿ ಈ ಮಾಹಿತಿ ಲಭ್ಯವಾಗಿದೆ. ಅಂದರೆ, ಈಗಾಗಲೇ ಪೇಟಿಎಂ ಮಾಹಿತಿ ಸೋರಿಕೆಯಾಗಿದ್ದು, ಅದು ಸಾರ್ವಜನಿಕಗೊಳ್ಳದಂತೆ ತಡೆಯುವುದು ಮುಂದಿರುವ ಸವಾಲಾಗಿದೆ. ಏನಕ್ಕೂ ನೀವು ಪೇಟಿಎಂ ಬಳಸುತ್ತಿದ್ದರೆ, ಮುನ್ನೆಚ್ಚರಿಕೆ ತೆಗೆದುಕೊಳ್ಳುವುದು ಸೂಕ್ತ.