ಕಲೈನಾರ್- ಕರ್ನಾಟಕ ನಂಟು; ದ್ರಾವಿಡ ಚಳವಳಿಯಿಂದ ತಿರುವಳ್ಳುವರ್‌ ಪ್ರತಿಮೆವರೆಗೆ...
COVER STORY

ಕಲೈನಾರ್- ಕರ್ನಾಟಕ ನಂಟು; ದ್ರಾವಿಡ ಚಳವಳಿಯಿಂದ ತಿರುವಳ್ಳುವರ್‌ ಪ್ರತಿಮೆವರೆಗೆ...

ಕರುಣಾನಿಧಿ ರಾಜಕೀಯ ಜೀವನ ಕೇವಲ ತಮಿಳುನಾಡಿಗಷ್ಟೇ ಸೀಮಿತವಾಗುವುದಿಲ್ಲ. 70ರ ದಶಕದಲ್ಲಿ ಡಿಎಂಕೆ ಪಕ್ಷವನ್ನು ಕರ್ನಾಟಕದಲ್ಲಿ ಬೆಳೆಸುವ ಕನಸು ಕರುಣಾನಿಧಿ ಅವರಿಗಿತ್ತು.

ಕರ್ನಾಟಕದ ಜತೆಗೆ ಕರುಣಾನಿಧಿ ಅವರ ಸಂಬಂಧ ದ್ರಾವಿಡ ಚಳವಳಿಯಷ್ಟೇ ಹಳೆಯದು. ತಮಿಳುನಾಡಿನಲ್ಲಿ ಪೆರಿಯಾರ್ ಆರಂಭಿಸಿದ ದ್ರಾವಿಡ ಚಳವಳಿ ದಕ್ಷಿಣದ ರಾಜ್ಯಗಳನ್ನು 'ದ್ರಾವಿಡ ರಾಜ್ಯ'ವಾಗಿ ಒಗ್ಗೂಡಿಸುವ ಆಶಯ ಹೊಂದಿತ್ತು. ಪೆರಿಯಾರ್‌ ಬಳಿಕ ದ್ರಾವಿಡ ಚಳವಳಿಯನ್ನು ಮುನ್ನಡೆಸಿದವರು ಕರುಣಾನಿಧಿ.

ತಮಿಳರೊಂದಿಗೆ ತೆಲುಗು, ಕನ್ನಡ ಹಾಗೂ ಮಲಯಾಳಂ ಭಾಷಿಗರನ್ನೂ ಒಗ್ಗೂಡಿಸಿ ದಕ್ಷಿಣ ಭಾರತವನ್ನು ದ್ರಾವಿಡ ಚಳವಳಿ ಮೂಲಕ ಒಂದಾಗಿಸಬೇಕೆಂಬ ಕನಸು ಪೆರಿಯಾರ್ ಅವರಿಗಿತ್ತು. ಆದರೆ, ಪೆರಿಯಾರ್‌ ಬಳಿಕ ಈ ದ್ರಾವಿಡ ಚಳವಳಿ ತಮಿಳುನಾಡಿಗೆ ಸೀಮಿತವಾಗಿ ತಮಿಳು ಭಾಷೆಯ ಚಳವಳಿಯಾಗಷ್ಟೇ ಉಳಿಯುವಂತಾಯ್ತು.

ಪೆರಿಯಾರ್‌ ಬಳಿಕ ಅಣ್ಣಾದೊರೈ ಕೂಡಾ ದ್ರಾವಿಡ ಚಳವಳಿ ಬೆಳೆಸುವ ಮನಸ್ಸು ಹೊಂದಿದ್ದರು. ಆದರೆ, ಅಣ್ಣಾದೊರೈ ಬಳಿಕ ತಮಿಳುನಾಡಿನಲ್ಲಿ ಹೋರಾಟದ ಮುಂಚೂಣಿಯಲ್ಲಿ ಕಾಣಿಸಿಕೊಂಡ ಕರುಣಾನಿಧಿ ಈ ಚಳವಳಿಯನ್ನು ಹಿಂದಿ ವಿರುದ್ಧದ ಹೋರಾಟವಾಗಿ ಪರಿವರ್ತಿಸಿದರು. ಅಲ್ಲಿಯವರೆಗೂ ಇದ್ದ ಚಳವಳಿಗಿಂತ ಭಿನ್ನವಾಗಿ ಹಿಂದಿ ವಿರೋಧಿ ಆಂದೋಲನ ರೂಪಿಸಿದ್ದು ಕರುಣಾನಿಧಿ.

ಡಿಎಂಕೆ ಪಕ್ಷವನ್ನು ಕರ್ನಾಟಕದಲ್ಲಿ ವಿಸ್ತರಿಸುವ ಪ್ರಯತ್ನವಾಗಿ ಬೆಂಗಳೂರಿನ ಪಾಲಿಕೆ ಚುನಾವಣೆಯಲ್ಲಿ ಡಿಎಂಕೆ ಪಕ್ಷದ ಅಭ್ಯರ್ಥಿಗಳನ್ನು 60-70ರ ದಶಕದಲ್ಲಿ ಕಣಕ್ಕಿಳಿಸಲಾಗಿತ್ತು. ಆ ಸಮಯದಲ್ಲಿ ಉಪ ಮೇಯರ್‌ ಸ್ಥಾನಕ್ಕಾಗಿ ಕಣದಲ್ಲಿದ್ದ ಕನ್ನಡ ಚಳವಳಿ ಪಕ್ಷದ ವಾಟಾಳ್‌ ನಾಗರಾಜ್‌ ಅವರಿಗೆ ಡಿಎಂಕೆ ಬೆಂಬಲ ನೀಡಿತ್ತು.

“ನಾನು ಉಪ ಮೇಯರ್‌ ಸ್ಥಾನಕ್ಕೆ ಸ್ಪರ್ಧಿಸಿದ್ದ ಸಂದರ್ಭದಲ್ಲಿ ಡಿಎಂಕೆ ನನಗೆ ಬೆಂಬಲ ನೀಡಿತ್ತು. ಆಗ ಬೆಂಗಳೂರಿನಲ್ಲಿ ಡಿಎಂಕೆ ಪಕ್ಷ ಸಕ್ರಿಯವಾಗಿತ್ತು. ಆಗ ವಿಧಾನಸಭಾ ಚುನಾವಣೆಯ ವೇಳೆ ಕೆಲವು ಸ್ಥಾನಗಳಿಗೆ ಡಿಎಂಕೆ ಸ್ಪರ್ಧೆ ಮಾಡಿತ್ತು. ಆ ಹೊತ್ತಿಗೆ ದ್ರಾವಿಡ ಚಳವಳಿಯ ಸ್ವರೂಪವೂ ಬದಲಾಗಿತ್ತು. ಕರುಣಾನಿಧಿ ಆಗ ಹಿಂದಿ ವಿರೋಧಿ ತಮಿಳು ಹೋರಾಟದ ಮುಂಚೂಣಿಯಲ್ಲಿದ್ದರು. ಅವರು ಮುಖ್ಯಮಂತ್ರಿಯಾಗಿದ್ದಾಗ ಆಗಾಗ ಬೆಂಗಳೂರಿಗೆ ಬಂದು ಹೋಗುತ್ತಿದ್ದರು” ಎಂದು ಕರ್ನಾಟಕದ ಜತೆಗೆ ಕರುಣಾನಿಧಿ ಅವರಿಗಿದ್ದ ಸಂಬಂಧವನ್ನು ನೆನಪಿಸಿಕೊಳ್ಳುತ್ತಾರೆ ವಾಟಾಳ್‌ ನಾಗರಾಜ್.

ಪೆರಿಯಾರ್‌ ಆರಂಭಿಸಿದ ದ್ರಾವಿಡ ಚಳವಳಿಯನ್ನು ತಮಿಳು ಭಾಷಾ ಚಳುವಳಿಯಾಗಿ ಮರುರೂಪಿಸಿ ರಾಜಕೀಯ ಯಶಸ್ಸು ಕಂಡವರು ಕರುಣಾನಿಧಿ. ಕರ್ನಾಟಕದ ಜತೆಗೆ ಅವರು ಕೊನೆಯವರೆಗೂ ಉತ್ತಮ ಬಾಂಧವ್ಯ ಹೊಂದಿದ್ದರು.
- ವಾಟಾಳ್‌ ನಾಗರಾಜ್‌, ಕನ್ನಡ ಚಳವಳಿ ವಾಟಾಳ್‌ ಪಕ್ಷದ ಅಧ್ಯಕ್ಷ

“ಕಾವೇರಿ ಸಮಸ್ಯೆಗೆ ಮಾತುಕತೆ ಮೂಲಕ ಪರಿಹಾರ ಕಂಡುಕೊಳ್ಳುವ ಮನಸ್ಸು ಕರುಣಾನಿಧಿ ಅವರಿಗಿತ್ತು. ಹೀಗಾಗಿ ಹಲವು ಬಾರಿ ಅವರು ಖುದ್ದು ಬೆಂಗಳೂರಿಗೆ ಬಂದು ಇಲ್ಲಿನ ಮುಖ್ಯಮಂತ್ರಿಗಳ ಜತೆಗೆ ಮಾತುಕತೆ ನಡೆಸಿದ್ದರು. ಜೆ.ಎಚ್. ಪಟೇಲ್‌, ವೀರೇಂದ್ರ ಪಾಟೀಲ್‌ ಸೇರಿದಂತೆ ಹಲವರ ಸಮಯದಲ್ಲಿ ಕರುಣಾನಿಧಿ ಇಲ್ಲಿಗೆ ಬಂದು ಕಾವೇರಿ ವಿಷಯದ ಬಗ್ಗೆ ಚರ್ಚೆ ನಡೆಸಿದ್ದರು. ಸೌಹಾರ್ದತೆಯ ಮೂಲಕ ಕಾವೇರಿ ಬಿಕ್ಕಟ್ಟು ಬಗೆಹರಿಸಿಕೊಳ್ಳುವ ಮನಸ್ಸು ಅವರಿಗಿತ್ತು” ಎನ್ನುತ್ತಾರೆ ವಾಟಾಳ್‌.

“ರಾಜಕಾರಣಿಯಾಗಿ ಮಾತ್ರ ಅವರಿಗೆ ಬೆಂಗಳೂರು ಮುಖ್ಯವಾಗಿರಲಿಲ್ಲ. ಬರವಣಿಗೆಗಾಗಿಯೂ ಅವರು ಆಗಾಗ ಬೆಂಗಳೂರಿಗೆ ಬರುತ್ತಿದ್ದರು. ಒಮ್ಮೆ ಬರವಣಿಗೆಗಾಗಿ ಬೆಂಗಳೂರಿನ ವುಡ್‌ಲ್ಯಾಂಡ್ಸ್‌ ಹೋಟೆಲ್‌ನಲ್ಲಿ ಕೆಲ ದಿನ ಅವರು ಉಳಿದುಕೊಂಡಿದ್ದರು. ಆಗೊಮ್ಮೆ ನನ್ನ ಮತ್ತು ಅವರ ಬೇಟಿಯಾಗಿತ್ತು” ಎಂದು ಹಳೆಯ ದಿನಗಳನ್ನು ನೆನಪಿಸಿಕೊಳ್ಳುತ್ತಾರೆ ಅವರು.

ಕಾವೇರಿ ನ್ಯಾಯಮಂಡಳಿ ರಚನೆಗಿಂತ ಉಭಯ ರಾಜ್ಯಗಳು ಮಾತುಕತೆ ಮೂಲಕ ಕಾವೇರಿ ಸಮಸ್ಯೆ ಬಗೆಹರಿಸಿಕೊಳ್ಳಬೇಕೆಂಬ ಆಶಯ ಕರುಣಾನಿಧಿ ಅವರಿಗಿತ್ತು. ಆದರೆ, ವಿ.ಪಿ. ಸಿಂಗ್‌ ಸರಕಾರ ತಮಿಳುನಾಡಿನ ಓಲೈಕೆಗಾಗಿ ಕಾವೇರಿ ನ್ಯಾಯಮಂಡಳಿ ರಚನೆ ಮಾಡಿತ್ತು. ಕಾವೇರಿ ವಿಚಾರದಲ್ಲಿ ಕರುಣಾನಿಧಿ ದ್ವೇಷದ ರಾಜಕೀಯ ಮಾಡಿದವರಲ್ಲ ಎನ್ನುತ್ತಾರೆ ವಾಟಾಳ್‌.

ಕರ್ನಾಟಕದಲ್ಲಿ ತಿರುವಳ್ಳುವರ್‌ ಹಾಗೂ ತಮಿಳುನಾಡಿನಲ್ಲಿ ಸರ್ವಜ್ಞ ಪ್ರತಿಮೆ ಸ್ಥಾಪನೆ ಸಂದರ್ಭ ದಲ್ಲಿ ಕರುಣಾನಿಧಿ ಬೆಂಗಳೂರಿಗೆ ಬಂದಿದ್ದರು. ಬೆಂಗಳೂರಿನಲ್ಲಿ ತಿರುವಳ್ಳುವರ್‌ ಪ್ರತಿಮೆ ಸ್ಥಾಪನೆ ಬಗ್ಗೆ ಆಗಿನ ಮುಖ್ಯಮಂತ್ರಿ ಯಡಿಯೂರಪ್ಪ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ಮಗಳು ಎಂ.ಕೆ. ಸೆಲ್ವಿ ಬೆಂಗಳೂರಿನಲ್ಲಿ ನೆಲೆಸಿದ್ದರಿಂದ ಆಗಾಗ ಬೆಂಗಳೂರಿಗೂ ಬಂದು ಹೋಗುತ್ತಿದ್ದರು. ಕರ್ನಾಟಕದ ಎಲ್ಲಾ ರಾಜಕಾರಣಿಗಳ ಜತೆಗೂ ಅವರು ಉತ್ತಮ ಸಂಬಂಧ ಹೊಂದಿದ್ದರು.

ಪ್ರಾದೇಶಿಕ ಪಕ್ಷಗಳ ರಾಜಕಾರಣದಲ್ಲಿ ವಿಶ್ವಾಸವಿದ್ದ ಕರುಣಾನಿಧಿ ರಾಜ್ಯದ ಜೆಡಿಎಸ್‌ ವರಿಷ್ಠ ಎಚ್‌.ಡಿ. ದೇವೇಗೌಡರ ಜತೆ ಆಪ್ತವಾಗಿದ್ದರು. ರಾಜ್ಯ ವಿಧಾನಸಭಾ ಚುನಾವಣೆ ಸಂದರ್ಭದಲ್ಲಿ ಡಿಎಂಕೆ ಜೆಡಿಎಸ್‌ ಅನ್ನು ಬೆಂಬಲಿಸಿತ್ತು. ತಮಿಳರು ಹೆಚ್ಚಿರುವ ಪ್ರದೇಶದಲ್ಲಿ ಜೆಡಿಎಸ್‌ಗೆ ಮತ ನೀಡುವಂತೆ ಡಿಎಂಕೆ ಮನವಿ ಮಾಡಿತ್ತು.

ದ್ರಾವಿಡ ಚಳವಳಿಯನ್ನು ತಮಿಳು ಹೋರಾಟವಾಗಿ ಮರುರೂಪಿಸಿದ ಕರುಣಾನಿಧಿ ಕಾವೇರಿ ವಿಚಾರದಲ್ಲಿ ಮಾತುಕತೆ ಮೂಲಕ ಸಮಸ್ಯೆ ಪರಿಹಾರದಲ್ಲಿ ನಂಬಿಕೆ ಉಳಿಸಿಕೊಂಡಿದ್ದರು. ಕರುಣಾನಿಧಿ ಆರೋಗ್ಯ ಕ್ಷೀಣಿಸುತ್ತಿದ್ದಂತೆ ಕರ್ನಾಟಕದಲ್ಲಿ ಡಿಎಂಕೆ ಬೇರುಗಳೂ ಸಡಿಲಾದವು. ಒಂದು ಕಾಲದಲ್ಲಿ ಬೆಂಗಳೂರು ನಗರ ಪಾಲಿಕೆಯಲ್ಲಿ ಹತ್ತಕ್ಕೂ ಹೆಚ್ಚು ಮಂದಿ ಸದಸ್ಯರನ್ನು ಹೊಂದಿದ್ದ ಡಿಎಂಕೆಯ ಪಳಯುಳಿಕೆಗಳೂ ಈಗ ರಾಜ್ಯದಲ್ಲಿ ಸಿಗುವುದು ಕಷ್ಟ.