‘ನಂಜುಂಡಪ್ಪ ವರದಿ ಹೈಲೈಟ್ಸ್’: ಯಾರ್ ಹೇಳಿದ್ದು ಉತ್ತರ ಕರ್ನಾಟಕ ಮಾತ್ರ ಹಿಂದುಳಿದಿದೆ ಅಂತ?

ಕರ್ನಾಟಕದಲ್ಲಿ ಮೈತ್ರಿ ಸರಕಾರದ ಚೊಚ್ಚಲ ಬಜೆಟ್ ಮಂಡನೆ ಮಾಡುತ್ತಿದ್ದಂತೆಯೇ ಮುನ್ನೆಲೆಗೆ ಬಂದ ಉತ್ತರ ಕರ್ನಾಟಕದ ಪ್ರತ್ಯೇಕ ರಾಜ್ಯದ ಕೂಗು ಇನ್ನೊಂದೆರಡು ದಿನ ಚರ್ಚೆಯಲ್ಲಿರಲಿದೆ.

ಆಗಸ್ಟ್ 2ರಂದು ಉತ್ತರ ಕರ್ನಾಟಕದ ಕೆಲವು ಸಂಘಟನೆಗಳು ಪ್ರತ್ಯೇಕ ರಾಜ್ಯಕ್ಕಾಗಿ ಬಂದ್ಗೆ ಕರೆನೀಡಿವೆ. ಮಂಗಳವಾರ ಬೆಳಗಾವಿಯ ಸುವರ್ಣ ಸೌಧದ ಮುಂದೆ ಸ್ವಾಮೀಜಿಗಳು ಧರಣಿ ಕುಳಿತಿದ್ದಾರೆ. ಈ ಹಿನ್ನೆಲೆಯಲ್ಲಿ ಉತ್ತರ ಕರ್ನಾಟಕ ಹಿಂದುಳಿದಿದೆ, ರಾಜ್ಯ ಸರಕಾರ ಕರ್ನಾಟಕ ಈ ಭೂಭಾಗಕ್ಕೆ ಅನ್ಯಾಯ ಮಾಡಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಹಾಗಂತ, ಈ ಕೂಗಿಗೆ ಪುಷ್ಠಿ ನೀಡಲು ಹೊಸ ಅಧ್ಯಯನಗಳೇನು ನಡೆದಿಲ್ಲ. ಬದಲಿಗೆ, 16 ವರ್ಷಗಳ ಹಿಂದೆ, ಅಂದಿನ ಸರಕಾರ ರಚಿಸಿದ್ದ ಡಿ. ಎಂ. ನಂಜುಂಡಪ್ಪ ವರದಿಯ ಆಧಾರದ ಮೇಲೆಯೇ ಈ ಎಲ್ಲಾ ವಾದಗಳು ಮಂಡನೆಯಾಗುತ್ತಿವೆ ಎಂಬುದು ಗಮನಾರ್ಹ.

ಇಷ್ಟಕ್ಕೂ ಡಿ. ಎಂ. ನಂಜುಂಡಪ್ಪ ವರದಿ ಹೇಳಿದ್ದೇನು? ಕರ್ನಾಟಕದ ತಾಲೂಕುವಾರು ಅಭಿವೃದ್ಧಿಯನ್ನು ವರದಿ ಹೇಗೆ ಪಟ್ಟಿ ಮಾಡಿತ್ತು? ಎಷ್ಟರ ಮಟ್ಟಿಗೆ ಉತ್ತರ ಕರ್ನಾಟಕದ ಭೂಭಾಗಗಳು, ಜನಜೀವನ ಹಿಂದುಳಿದೆ ಎಂದು ವರದಿ ಮುಂದಿಟ್ಟಿತ್ತು? ಈ ಎಲ್ಲಾ ಪ್ರಶ್ನೆಗಳಿಗೆ ಉತ್ತರ ನೀಡಲಿದೆ ‘ಸಮಾಚಾರ’ದ ಈ ವರದಿ.

. ವರದಿಗೊಂದು ಹಿನ್ನೆಲೆ:

ಕನ್ನಡ ಮಾತನಾಡುವ ಪ್ರದೇಶಗಳೆಲ್ಲವೂ ಒಂದಾದ ಬಳಿಕ ಕರ್ನಾಟಕವನ್ನು ಗುಲ್ಬರ್ಗಾ (ಹೈದರಾಬಾದ್ ಕರ್ನಾಟಕ), ಬೆಳಗಾವಿ (ಬಾಂಬೆ ಕರ್ನಾಟಕ), ಬೆಂಗಳೂರು ಮತ್ತು ಮೈಸೂರು ಎಂದು 4 ವಿಭಾಗಗಳಾಗಿ ವರ್ಗೀಕರಣ ಮಾಡಲಾಯಿತು. ಕರ್ನಾಟಕದ ಎಲ್ಲಾ ಭಾಗಗಳ ಅಭಿವೃದ್ಧಿಗಾಗಿ ದಿನಕಳೆದಂತೆ ಹೈದರಾಬಾದ್ ಕರ್ನಾಟಕ ಅಭಿವೃದ್ಧಿ ಮಂಡಳಿ, ಬಯಲು ಸೀಮೆ ಅಭಿವೃದ್ಧಿ ಮಂಡಳಿ, ಮಲೆನಾಡು ಪ್ರದೇಶ ಅಭಿವೃದ್ಧಿ ಮಂಡಳಿ ಇತ್ಯಾದಿಗಳು ಅಸ್ತಿತ್ವಕ್ಕೆ ಬಂದವು. ಅಸಮಾನತೆಯನ್ನು ತೊಡೆದುಹಾಕುವ ಸಲುವಾಗಿ ಹಲವಾರು ಸಮಿತಿಗಳು ರಚನೆಯಾದರೂ ಕೂಡ ನಿರೀಕ್ಷಿತ ಫಲ ದೊರೆಯಲಿಲ್ಲ. ಬದಲಿಗೆ ಉತ್ತರ ಕರ್ನಾಟಕ ಭಾಗದಲ್ಲಿನ ಅಸಮಾನತೆಯ ಕೂಗು ಜೋರಾಯಿತು.

. ಎಸ್. ಎಂ. ಕೃಷ್ಣ ಮುಖ್ಯಮಂತ್ರಿಯಾಗಿದ್ದಾಗ 2000ರ ಅಕ್ಟೋಬರ್ನಲ್ಲಿ ಪ್ರಾದೇಶಿಕ ಅಸಮಾನತೆಯನ್ನು ಹೋಗಲಾಡಿಸುವ ಸಲುವಾಗಿ ಹೈ ಪವರ್ ಸಮಿತಿಯೊಂದನ್ನು ರಚಿಸಲಾಯಿತು. ಖ್ಯಾತ ಆರ್ಥಶಾಸ್ತ್ರಜ್ಞ ಹಾಗೂ ರಾಜ್ಯ ಯೋಜನಾ ಆಯೋಗದ ಉಪಾಧ್ಯಕ್ಷರಾಗಿದ್ದ ಡಾ. ಡಿ. ಎಂ. ನಂಜುಂಡಪ್ಪ ಈ ಸಮಿತಿಯ ಅಧ್ಯಕ್ಷರಾಗಿದ್ದರು.

ವರದಿ ಸಿದ್ಧಪಡಿಸುವ ಮೊದಲು ನಂಜುಂಡಪ್ಪ ಸಮಿತಿ ಮೊದಲೇ ಬಂದಿದ್ದ ಹಲವಾರು ವರದಿಗಳ ಅಧ್ಯಯನ ನಡೆಸಿತು. ಮುಂಚಿನ ವರದಿಗಳೆಲ್ಲಾ ವಿವಿಧ ಮಾನದಂಡಗಳ ಮೇಲೆ ಜಿಲ್ಲಾ ಘಟಕಗಳನ್ನು ಕೇಂದ್ರಗಳಾಗಿ ಪರಿಗಣಿಸಿದ್ದವು. ನಂಜುಂಡಪ್ಪ ತಮ್ಮ ವರದಿಯಲ್ಲಿ ತಾಲೂಕು ಘಟಕಗಳನ್ನು ಕೇಂದ್ರಗಳಾಗಿ ತೆಗೆದುಕೊಂಡರು. ತಾಲೂಕು ಕೇಂದ್ರಗಳ ಅಭಿವೃದ್ಧಿಯನ್ನು ಆಧಾರವಾಗಿಟ್ಟುಕೊಂಡು ವರದಿ ತಯಾರಿಸಿದರು. 2002ರಲ್ಲಿ ಈ ವರದಿ ಸಲ್ಲಿಕೆಯಾಯಿತು.

. ವರದಿಯಲ್ಲಿ ಡಾ.ನಂಜುಂಡಪ್ಪ ಹೇಳಿದ್ದೇನು?:

. ಸಮಿತಿಯು ಆರೋಗ್ಯ, ಶಿಕ್ಷಣ, ಕೃಷಿ, ಕೈಗಾರಿಕೆ ಸೇರಿದಂತೆ ಹಲವು ವಲಯಗಳಲ್ಲಿ ಒಟ್ಟು 35 ಸೂಚಕಗಳನ್ನು ಬಳಸಿ ತಯಾರಿಸಿದ ವರದಿ ಕರ್ನಾಟಕದ 175 ತಾಲೂಕುಗಳ ಪೈಕಿ 114 ತಾಲೂಕುಗಳು ಹಿಂದುಳಿದಿವೆ ಎಂಬ ಆಶ್ಚರ್ಯಕರ ಮಾಹಿತಿ ಹೊರಹಾಕಿತು. ಈ ತಾಲೂಕುಗಳ ಪೈಕಿ ಉತ್ತರ ಕರ್ನಾಟಕ ಮತ್ತು ದಕ್ಷಿಣ ಕರ್ನಾಟಕ ಎರಡೂ ಭಾಗಗಳಲ್ಲಿ ತಾಲೂಕುಗಳು ಸ್ಥಾನ ಪಡೆದಿದ್ದವು ಎಂಬುದು ಗಮನಾರ್ಹ.

. ಡಾ. ನಂಜುಂಡಪ್ಪ ಹಿಂದುಳಿದ ತಾಲೂಕುಗಳನ್ನು ಮೂರು ಭಾಗಗಳಾಗಿ ವಿಂಗಡಿಸಿದ್ದರು. 39 ತಾಲೂಕುಗಳು ಅತಿ ಹಿಂದುಳಿದಿರುವುದಾಗಿಯೂ, 40 ತಾಲೂಕುಗಳು ಹೆಚ್ಚು ಹಿಂದುಳಿದಿರುವುದಾಗಿಯೂ ಹಾಗೂ 35 ತಾಲೂಕುಗಳು ಹಿಂದುಳಿದಿರುವುದಾಗಿಯೂ ನಂಜುಂಡಪ್ಪ ವರದಿ ನೀಡಿದ್ದರು. ವರದಿಯಲ್ಲಿ ದಕ್ಷಿಣ ಕರ್ನಾಟಕಕ್ಕೆ ಹೋಲಿಸಿದರೆ ಉತ್ತರ ಕರ್ನಾಟಕ ಭಾಗ ಹಿಂದುಳಿದಿದ್ದು, ನಿರ್ಧಿಷ್ಟವಾಗಿ ಹೈದರಾಬಾದ್ ಕರ್ನಾಟಕ ಹೆಚ್ಚು ಅಭಿವೃದ್ಧಿಯನ್ನು ಸಾಧಿಸಬೇಕಿದೆ ಎಂಬ ಅಂಶವನ್ನೂ ಕೂಡ ನಂಜುಂಡಪ್ಪ ಉಲ್ಲೇಖಿಸಿದ್ದರು. ಆದರೆ ಉತ್ತರ ಕರ್ನಾಟಕ ಮಾತ್ರವೇ ಹಿಂದುಳಿದೆ ಎಂದು ನಂಜುಂಡಪ್ಪ ಎಲ್ಲಿಯೂ ಕೂಡ ಹೇಳಿಲ್ಲ.

. ನಂಜುಂಡಪ್ಪ ವರದಿ ದೊರೆಯುವವರೆಗೂ ಉತ್ತರ ಕರ್ನಾಟಕ ಭಾಗ ಹಿಂದುಳಿದೆ ಎಂಬ ಮಾತುಗಳಷ್ಟೇ ಕೇಳಬರುತ್ತಿದ್ದವು. ಡಾ. ನಂಜುಂಡಪ್ಪ ವರದಿ ಪ್ರಾದೇಶಿಕ ಅಸಮಾನತೆಗೆ ಹೊಸ ಆಯಾಮವನ್ನು ನೀಡಿತು. ಹಿಂದುಳಿದಿರುವ ತಾಲೂಕುಗಳು ರಾಜ್ಯದ 4 ವಿಭಾಗಗಳಲ್ಲೂ ಇವೆ ಎಂದು ವರದಿ ಬಿಚ್ಚಿಟ್ಟಿತ್ತು.

. ಹಿಂದುಳಿದ ಭಾಗಗಳ್ಯಾವುವು?:

. ಗುಲ್ಬರ್ಗಾ ವಿಭಾಗದ 21 ತಾಲೂಕುಗಳು, ಬೆಳಗಾವಿ ವಿಭಾಗದ 5, ಬೆಂಗಳೂರು ವಿಭಾಗದ 11 ಮತ್ತು ಮೈಸೂರು ವಿಭಾಗದ 2 ತಾಲೂಕುಗಳು ಅತಿ ಹಿಂದುಳಿದ ತಾಲೂಕುಗಳ ಪಟ್ಟಿಯಲ್ಲಿದ್ದವು. ಅತಿ ಹಿಂದುಳಿದ 39 ತಾಲೂಕುಗಳ ಪೈಕಿ ಸಿಂಧಗಿ, ಕುಷ್ಠಗಿ, ಯಲಬುರ್ಗಾ, ಸೇಡಂ, ಶೋರಾಪುರ ಬಸವಕಲ್ಯಾಣ ಸೇರಿದಂತೆ ಒಟ್ಟು 26 ತಾಲೂಕುಗಳು ಉತ್ತರ ಕರ್ನಾಟಕದ ಭಾಗವಾದರೆ, ಮಧುಗಿರಿ, ಸಿರಾ, ಚಾಮರಾಜನಗರ, ಚನ್ನಗಿರಿ ಹೊಸದುರ್ಗ, ಬಾಗೇಪಲ್ಲಿ ಸೇರಿದಂತೆ 13 ತಾಲೂಕುಗಳು ದಕ್ಷಿಣ ಕರ್ನಾಟಕದ ತಾಲೂಕುಗಳಾಗಿದ್ದವು.

ಹೆಚ್ಚು ಹಿಂದುಳಿದಿರುವ ತಾಲೂಕುಗಳ ಪೈಕಿ ಗುಲ್ಬರ್ಗಾ ವಿಭಾಗದ 5, ಬೆಳಗಾವಿ ವಿಭಾಗದ 12, ಬೆಂಗಳೂರು ವಿಭಾಗದ 13, ಹಾಗೂ ಮೈಸೂರು ವಿಭಾಗದ 10 ತಾಲೂಕುಗಳು ಸ್ಥಾನ ಪಡೆದಿದ್ದವು. ಈ ವರ್ಗದಲ್ಲಿ ಉತ್ತರ ಕರ್ನಾಟಕಕ್ಕಿಂತ ದಕ್ಷಿಣ ಕರ್ನಾಟಕದ ಪಾಲೇ ಹೆಚ್ಚು. ಸವಣೂರು, ಮುಂಡರಗಿ, ಅಥಣಿ ಸೇರಿದಂತೆ 17 ತಾಲೂಕು ಉತ್ತರ ಕರ್ನಾಟಕ ಭಾಗದವಾದರೆ, ಹಿರಿಯೂರು, ತುರುವೆಕೆರೆ, ಕೊರಟೆಗೆರೆ ಸೇರಿದಂತೆ 23 ತಾಲೂಕುಗಳು ದಕ್ಷಿಣ ಕರ್ನಾಟಕದ ಜಿಲ್ಲೆಗಳಿಗೆ ಸೇರಿದವು.

ಹಿಂದುಳಿದ ತಾಲೂಕುಗಳ ಪಟ್ಟಿಯಲ್ಲೂ ಕೂಡ ದಕ್ಷಿಣ ಕರ್ನಾಟಕ ತಾಲೂಕುಗಳೇ ಹೆಚ್ಚಾಗಿದ್ದವು. ಗುಲ್ಬರ್ಗಾ ವಿಭಾಗದಲ್ಲಿ 2 ತಾಲೂಕುಗಳು ಹಿಂದುಳಿದ್ದರೆ ಬೆಳಗಾವಿ ವಿಭಾಗದ 14 ತಾಲೂಕುಗಳು ಈ ಪಟ್ಟಿಯಲ್ಲಿ ಕಾಣಿಸಿಕೊಂಡಿದ್ದವು. ದಕ್ಷಿಣ ಕರ್ನಾಟಕದ ಮೈಸೂರು ವಿಭಾಗದಲ್ಲಿ 9 ತಾಲೂಕುಗಳು ಮತ್ತು ಬೆಂಗಳೂರು ವಿಭಾಗದಲ್ಲಿ 10 ತಾಲೂಕುಗಳು ಈ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದವು. ಉತ್ತರ ಕರ್ನಾಟಕದ ಹಾವೇರಿ, ನವಲಗುಂದ, ರೋಣ, ಹಾನಗಲ್ ಸೇರಿದಂತೆ 16 ತಾಲೂಕುಗಳು ಹಿಂದುಳಿಯಲ್ಪಟ್ಟಿವೆ ಎನಿಸಿಕೊಂಡರೆ, ದಕ್ಷಿಣ ಕರ್ನಾಟಕದ ಬಂಗಾರ ಪೇಟೆ, ಮದ್ದೂರು, ಚನ್ನಪಟ್ಟಣ, ಹೊಳೆನರಸೀಪುರ ಸೇರಿದಂತೆ 19 ತಾಲೂಕುಗಳು ಹಿಂದುಳಿದ್ದವು.

ಈ ಮೂರು ವರ್ಗಗಳಲ್ಲದೇ ಮಧ್ಯಮ ಅಭಿವೃದ್ಧಿ ಹೊಂದಿರುವ ತಾಲೂಕುಗಳು ಎಂಬ ವರ್ಗವನ್ನೂ ಕೂಡ ನಂಜುಂಡಪ್ಪ ವರದಿಯಲ್ಲಿ ಕಾಣಬಹುದು. ಈ ವರ್ಗದಲ್ಲಿ ವಿರಾಜಪೇಟೆ, ಮೈಸೂರು, ಮಂಗಳೂರು, ಬೆಂಗಳೂರು ಸೇರಿದಂತೆ ದಕ್ಷಿಣ ಕರ್ನಾಟಕದ ಹಲವಾರು ತಾಲೂಕು ಸ್ಥಾನ ಪಡೆದಿದ್ದರೆ, ಹುಬ್ಬಳ್ಳಿ, ಬೆಳಗಾವಿ, ಹೊಸಪೇಟೆ ಸೇರಿದಂತೆ ಹಲವಾರು ಉತ್ತರ ಕರ್ನಾಟಕದ ಜಿಲ್ಲೆಗಳೂ ಕೂಡ ಕಾಣಿಸಿಕೊಂಡಿವೆ.

. ಅಧ್ಯಯನದಲ್ಲಿ ಕಂಡು ಬಂದ ಮುಖ್ಯ ಸಂಗತಿಗಳು:

2002ರಲ್ಲಿ ವರದಿಯ ಅಧ್ಯಯನದಲ್ಲಿ ಉತ್ತರ ಕರ್ನಾಟಕದ 48 ತಾಲೂಕುಗಳು ಹಾಗೂ ದಕ್ಷಿಣ ಕರ್ನಾಟಕದ 30 ತಾಲೂಕುಗಳು ಸರಾಸರಿ ಬಡತನ ರೇಖೆಗಿಂತ ಕೆಳಗಿದ್ದವು. 1998ರ ಮಾನವ ಅಭಿವೃದ್ಧಿ ಸೂಚ್ಯಾಂಕದ ಪ್ರಕಾರ ಕರ್ನಾಟಕ 0.62 ಮಾನವ ಅಭಿವೃದ್ಧಿಯನ್ನು ಸಾಧಿಸಿತ್ತು. ಜಿಲ್ಲಾವಾರು ಮಾನವ ಅಭಿವೃದ್ಧಿಯನ್ನು ಗಮನಿಸುವುದಾದರೆ ಉತ್ತರ ಕರ್ನಾಟಕದ 5 ಮತ್ತು ದಕ್ಷಿಣ ಕರ್ನಾಟಕದ 5 ಜಿಲ್ಲೆಗಳು ರಾಜ್ಯದ ಸರಾಸರಿ ಮಾನವ ಅಭಿವೃದ್ಧಿಗಿಂತ ಹಿಂದೆ ಉಳಿದಿದ್ದವು. ಸಾಕ್ಷಾರತೆಯಲ್ಲಿಯೂ ಕೂಡ ಉತ್ತರ ಕರ್ನಾಟಕದ 6 ಜಿಲ್ಲೆಗಳು ಹಾಗೂ ದಕ್ಷಿಣ ಕರ್ನಾಟಕದ 3 ಜಿಲ್ಲೆಗಳು ಕಡಿಮೆ ಸಾಧನೆ ಮಾಡಿದ್ದವು. ಆಸ್ಪತ್ರೆಯಲ್ಲಿನ ಹಾಸಿಗೆಗಳ ಸಂಖ್ಯೆಯನ್ನು ಗಮನಿಸುವುದಾದರೆ 2001ರಲ್ಲಿ ದಕ್ಷಿಣ ಕರ್ನಾಟಕದಲ್ಲಿ 1 ಲಕ್ಷ ಜನಕ್ಕೆ 85 ಹಾಸಿಗೆಗಳಿದ್ದರೆ, ಉತ್ತರ ಕರ್ನಾಟಕದಲ್ಲಿ 75 ಹಾಸಿಗೆಗಳಿದ್ದವು.

. ಉತ್ತರ ಕರ್ನಾಟಕ ಎಲ್ಲದರಲ್ಲೂ ಹಿಂದುಳಿದಿದೆಯೇ?:

. ಉತ್ತರ ಕರ್ನಾಟಕ ಹಿಂದುಳಿದೆ ಎನ್ನುವುದೇನೋ ನಿಜ. ಆದರೆ ದಕ್ಷಿಣ ಕರ್ನಾಟಕದ ಕೆಲವು ಭಾಗಗಳ ಹಲವಾರು ವಿಷಯಗಳಲ್ಲಿ ಉತ್ತರ ಕರ್ನಾಟಕದ ಜಿಲ್ಲೆಗಳಿಗಿಂತಲೂ ಹಿಂದುಳಿದಿವೆ. 1958ರಲ್ಲಿ ಕರ್ನಾಟಕದಲ್ಲಿ 7.6 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಕೃಷಿ ನಡೆಯುತ್ತಿತ್ತು. 2001ರ ವೇಳೆಗೆ 25.5 ಲಕ್ಷ ಹೆಕ್ಟೇರ್ನಷ್ಟು ಜಾಗದಲ್ಲಿ ವ್ಯವಸಾಯ ವಿಸ್ತರಿಸಿದ್ದು, ಇದರಲ್ಲಿ ಉತ್ತರ ಕರ್ನಾಟಕದ ಪಾಲೇ ಜಾಸ್ತಿ. ಕೃಷಿ ಭೂಮಿ ವಿಸ್ತರಣೆಯಲ್ಲಿ ದಕ್ಷಿಣದಲ್ಲಿ ಶೇ.21ರಷ್ಟು ಬೆಳವಣಿಗೆ ಕಂಡುಬಂದರೆ, ಉತ್ತರದಲ್ಲಿ ಶೇ.71ರಷ್ಟು ಬೆಳವಣಿಗೆ ದಾಖಲಾಗಿತ್ತು.

ಉತ್ತರದ ಧಾರವಾಡ, ಬೆಳಗಾವಿ ಮತ್ತು ಬಿಜಾಪುರ ಜಿಲ್ಲೆಗಳು, ದಕ್ಷಿಣದ ಹಲವಾರು ಜೆಲ್ಲೆಗಳಿಗಿಂತಲೂ ಹೆಚ್ಚು ಕೈಗಾರಿಕೆಗಳನ್ನು ಹೊಂದಿದ್ದವು. ಸಾಕ್ಷಾರತೆಯಲ್ಲಿ ಉತ್ತರದ ಧಾರವಾಡ ಮತ್ತು ಉತ್ತರ ಕನ್ನಡ ಜಿಲ್ಲೆಗಳು ಮುಂದಿದ್ದರೆ, ದಕ್ಷಿಣದ ಮಂಡ್ಯ ಮತ್ತು ಮೈಸೂರು ಜಿಲ್ಲೆಗಳು ಹಿಂದುಳಿದಿದ್ದವು. ರಸ್ತೆ ಅಭಿವೃದ್ಧಿಯಲ್ಲಿ ಧಾರವಾಡ ಜಿಲ್ಲೆ ಮುಂದಿದ್ದರೆ, ದಕ್ಷಿಣಕ್ಕೆ ಸೇರುವ ಚಿತ್ರದುರ್ಗದಲ್ಲಿ ಕಳಪೆ ಸಾಧನೆ ದಾಖಲಾಗಿತ್ತು.

ಆರೋಗ್ಯ ಕ್ಷೇತ್ರದಲ್ಲಿ ಬಳ್ಳಾರಿ ಮತ್ತು ಉತ್ತರ ಕನ್ನಡ ಜಿಲ್ಲೆಗಳು ಹೆಚ್ಚು ಸಾಧನೆ ಮಾಡಿದ್ದರೆ ದಕ್ಷಿಣದ ತುಮಕೂರು ಜಿಲ್ಲೆ ತೀವ್ರವಾಗಿ ಹಿಂದುಳಿದಿತ್ತು. ನೀರಾವರಿ ವ್ಯವಸ್ಥೆಯಲ್ಲೂ ಕೂಡ ಉತ್ತರದ ಬೆಳಗಾವಿ, ಬಳ್ಳಾರಿ, ರಾಯಚೂರು ಜಿಲ್ಲೆಗಳು ದಕ್ಷಿಣದ ಹಲವಾರು ಜಿಲ್ಲೆಗಳನ್ನು ಹಿಂದಿಕ್ಕಿದ್ದವು. ಈ ಎಲ್ಲಾ ಅಂಶಗಳನ್ನು ಪರಿಗಣಿಸಿ ನೋಡುವುದಾದರೆ ಸಮಗ್ರ ಅಭಿವೃದ್ಧಿಯಲ್ಲಿ ದಕ್ಷಿಣದ ಹಲವಾರು ಜಿಲ್ಲೆಗಳು ಉತ್ತರ ಕರ್ನಾಟಕದಷ್ಟೇ ಹಿನ್ನಡೆಯನ್ನು ಸಾಧಿಸಿರುವುದಾಗಿ ವರದಿ ತಿಳಿಸಿತ್ತು.

. ಸರಕಾರಕ್ಕೆ ಸಮಿತಿ ಸೂಚಿಸಿದ್ದೇನು?:

. ಡಾ.ನಂಜುಂಡಪ್ಪ ಎಲ್ಲಾ ಹಿಂದುಳಿದಿರುವ ತಾಲೂಕುಗಳ ಅಭಿವೃದ್ಧಿಗಾಗಿ ಕಾರ್ಯ ಯೋಜನೆಗಳನ್ನೂ ಕೂಡ ಸಿದ್ಧಪಡಿಸಿ, 2002-03ರ ಅವಧಿಗೆ 31,000 ಕೋಟಿಗಳ ಯೋಜನೆಯನ್ನೂ ಮುಂದಿಟ್ಟರು. ಈ ಅನುದಾನದಲ್ಲಿ 15,000 ಕೋಟಿಯನ್ನು ರಾಜ್ಯ ಬಜೆಟ್ನ ಭಾಗವಾಗಿ ಹಾಗು ಉಳಿದ 16,000 ಕೋಟಿಯನ್ನು ಪ್ರತಿವರ್ಷದ ಬಜೆಟ್ನಲ್ಲಿ 2,000 ಕೊಟಿ ವಿಶೇಷ ಅಭಿವೃದ್ಧಿ ಯೋಜನೆಗಾಗಿ 8 ವರ್ಷಗಳ ಕಾಲ ಮೀಸಲಿಡಬೇಕು ಎಂದು ಶಿಫಾರಸ್ಸು ನೀಡಿದ್ದರು. ಆದರೆ ಈ ವರದಿ ಅನುಷ್ಠಾನಕ್ಕೆ ಬಂದಿದ್ದು 2007-08ರಲ್ಲಿ. ಅಂದು ಮುಖ್ಯಮಂತ್ರಿಯಾಗಿದ್ದ ಎಚ್.ಡಿ.ಕುಮಾರಸ್ವಾಮಿ ಮತ್ತು ಹಣಕಾಸು ಮಂತ್ರಿ ಬಿ.ಎಸ್.ಯಡಿಯೂರಪ್ಪ ವಿಶೇಷ ಅಭಿವೃದ್ಧಿ ಯೋಜನೆಗಾಗಿ 1,571 ಕೋಟಿಯನ್ನು ಮೀಸಲಿಟ್ಟಿದ್ದರು.

. ನಂತರ 2008ರಲ್ಲಿ ಯಡಿಯೂರಪ್ಪ ಮುಖ್ಯಮಂತ್ರಿಯಾದಾಗ ನಂಜುಂಡಪ್ಪ ವರದಿಯ ಅನುಷ್ಠಾನದ ಮೇಲ್ವಿಚಾರಣೆಗಾಗಿ ಎಮ್ಎಲ್ಸಿ ಶಶಿಲ್ ನಮೋಶಿ ಅಧ್ಯಕ್ಷತೆಯಲ್ಲಿ ಹೈ ಪವರ್ ಕಮಿಟಿ ಸಿದ್ಧವಾಯಿತು. 2010ರ ನಂತರ ಮೇಲ್ವಿಚಾರಣೆಯ ಕೆಲಸ ಅಧಿಕಾರಿಗಳ ಕೈ ಸೇರಿ ಇಂದು ನಂಜುಂಡಪ್ಪ ವರದಿಯ ಅನುಷ್ಠಾನ ಎಲ್ಲಿಗೆ ಬಂದು ನಿಂತಿದೆ ಎನ್ನುವುದು ತಿಳಿಯದಾಗಿದೆ. ವರದಿಯ ಅನುಷ್ಠಾನ ಸರಿಯಾದ ರೀತಿಯಲ್ಲಿ ನಡೆದಿದ್ದರೆ ಇಂದು ಸರಕಾರಗಳು ಪ್ರತ್ಯೇಕ ರಾಜ್ಯ ಹೋರಾಟದ ಬಿಸಿಯನ್ನು ಎದುರಿಸಬೇಕಿರಲಿಲ್ಲ. ಮತ್ತು, ಪ್ರತಿ ಬಾರಿ ಉತ್ತರ ಕರ್ನಾಟಕ ಹಿಂದುಳಿದೆ, ಅನ್ಯಾಯವಾಗಿದೆ ಎಂದು ಹೇಳುವುದು ಕ್ಲೀಷೆಯಾಗುವ ಅಪಾಯವೂ ಇದೆ.