ಜಿಯೊ ವಿಶ್ವವಿದ್ಯಾಲಯ; ಅಸ್ತಿತ್ವದಲ್ಲಿಲ್ಲದ ಸಂಸ್ಥೆಗೆ ‘ಇನ್‌ಸ್ಟಿಟ್ಯೂಟ್‌ ಆಫ್‌ ಎಮಿನೆನ್ಸ್‌’ ಮಾನ್ಯತೆ!
COVER STORY

ಜಿಯೊ ವಿಶ್ವವಿದ್ಯಾಲಯ; ಅಸ್ತಿತ್ವದಲ್ಲಿಲ್ಲದ ಸಂಸ್ಥೆಗೆ ‘ಇನ್‌ಸ್ಟಿಟ್ಯೂಟ್‌ ಆಫ್‌ ಎಮಿನೆನ್ಸ್‌’ ಮಾನ್ಯತೆ!

ಅಸ್ತಿತ್ವದಲ್ಲಿಲ್ಲದ ಜಿಯೊ ವಿಶ್ವವಿದ್ಯಾಲಯಕ್ಕೆ ಕೇಂದ್ರ ಮಾನವ ಸಂಪನ್ಮೂಲ ಇಲಾಖೆ ‘ಇನ್‌ಸ್ಟಿಟ್ಯೂಟ್‌ ಆಫ್‌ ಎಮಿನೆನ್ಸ್‌’ ಮಾನ್ಯತೆ ನೀಡಿರುವುದಕ್ಕೆ ಅಂಬಾನಿ ಪ್ರಭಾವವೇ ಕಾರಣ ಎನ್ನಲಾಗಿದೆ.

ಹುಟ್ಟದ ಕೂಸಿಗೆ ಕುಲಾವಿ ಹೊಲಿಸಿದಂತೆ ಇನ್ನೂ ಆರಂಭವೇ ಆಗದಿರುವ ಜಿಯೊ ವಿಶ್ವವಿದ್ಯಾಲಯಕ್ಕೆ ಕೇಂದ್ರ ಸರಕಾರ ‘ಶ್ರೇಷ್ಠ ವಿದ್ಯಾಸಂಸ್ಥೆ’ (ಇನ್‌ಸ್ಟಿಟ್ಯೂಟ್‌ ಆಫ್‌ ಎಮಿನೆನ್ಸ್‌) ಮಾನ್ಯತೆ ನೀಡಲು ನಿರ್ಧರಿಸಿರುವುದು ವಿವಾದಕ್ಕೆ ಕಾರಣವಾಗಿದೆ.

ಅಸ್ಥಿತ್ವದಲ್ಲೇ ಇರದ ಸಂಸ್ಥೆಯೊಂದಕ್ಕೆ ಕೇಂದ್ರ ಮಾನವ ಸಂಪನ್ಮೂಲ ಇಲಾಖೆ ಇನ್‌ಸ್ಟಿಟ್ಯೂಟ್‌ ಆಫ್‌ ಎಮಿನೆನ್ಸ್‌ ಮಾನ್ಯತೆ ನೀಡುತ್ತಿರುವುದಕ್ಕೆ ರಿಲಯನ್ಸ್‌ ಸಮೂಹದ ಮುಖೇಶ್‌ ಅಂಬಾನಿ ಪ್ರಭಾವವೇ ಕಾರಣ ಎನ್ನಲಾಗಿದೆ.

ಸರಕಾರದ ಹಂತದಲ್ಲಿ ಹಿಂಬಾಗಿಲಿನ ಮೂಲಕ ಮುಂದೆ ಆರಂಭವಾಗಲಿರುವ ತಮ್ಮ ವಿದ್ಯಾಸಂಸ್ಥೆಗೆ ಮುಖೇಶ್‌ ಅಂಬಾನಿ ಈಗಲೇ ಇನ್‌ಸ್ಟಿಟ್ಯೂಟ್‌ ಆಫ್‌ ಎಮಿನೆನ್ಸ್‌ ಮಾನ್ಯತೆ ದಕ್ಕಿಸಿಕೊಂಡಿದ್ದಾರೆ. ಸರಕಾರದ ಈ ನಿರ್ಧಾರದ ಹಿಂದೆ ಅಂಬಾನಿ ಪ್ರಭಾವ ನೇರವಾಗಿ ಕೆಲಸ ಮಾಡಿದೆ ಎಂಬ ಆರೋಪಗಳು ಕೇಳಿಬಂದಿವೆ. ಅಲ್ಲದೆ ಈ ಮೂಲಕ ಸರಕಾರ ಶಿಕ್ಷಣ ಕ್ಷೇತ್ರವನ್ನು ಖಾಸಗೀಕರಣದ ಹೆಸರಿನಲ್ಲಿ ನೇರವಾಗಿ ದೊಡ್ಡ ಪ್ರಪಾತಕ್ಕೆ ತಳ್ಳಲು ಮುಂದಾಗಿದೆ ಎಂಬ ಟೀಕೆಗಳೂ ವ್ಯಕ್ತವಾಗಿವೆ.

ಆದರೆ, ಟೀಕೆ, ವಿವಾದಗಳನ್ನು ಮೀರಿ 3 ಸರಕಾರಿ ಸಂಸ್ಥೆಗಳು ಹಾಗೂ 3 ಖಾಸಗಿ ಸಂಸ್ಥೆಗಳಿಗೆ ಇನ್‌ಸ್ಟಿಟ್ಯೂಟ್‌ ಆಫ್‌ ಎಮಿನೆನ್ಸ್‌ ಮಾನ್ಯತೆ ನೀಡಲು ಕೇಂದ್ರ ಮಾನವ ಸಂಪನ್ಮೂಲ ಸಚಿವ ಪ್ರಕಾಶ್‌ ಜಾವಡೇಕರ್‌ ನಿರ್ಧರಿಸಿದ್ದಾರೆ. ಈ ನಿರ್ಧಾರ ಈಗಾಗಲೇ ಅಧಿಕೃತ ಆದೇಶವಾಗಿ ಸರಕಾರದ ಮಟ್ಟದಲ್ಲಿ ಜಿಯೊ ವಿಶ್ವವಿದ್ಯಾಲಯವನ್ನು ಹಾಳೆಗಳ ಮೇಲೆ ನಿರ್ಮಿಸಲು ತಯಾರಿ ನಡೆದಿದೆ.

ಸರಕಾರ ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ನಿಮಯಗಳನ್ನು ಅಧಿಕೃತಗೊಳಿಸಿದ ಎರಡು ವಾರಗಳಲ್ಲಿ ರಿಲಯನ್ಸ್‌ ಸಮೂಹವು ‘ರಿಲಯನ್ಸ್‌ ಫೌಂಡೇಷನ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಎಜುಕೇಷನಲ್‌ ರಿಸರ್ಚ್‌’ (ಆರ್‌ಎಫ್‌ಐಇಆರ್‌) ಎಂಬ ಸಂಸ್ಥೆಗೆ ಜನ್ಮ ನೀಡಿದೆ. ಮಹಾರಾಷ್ಟ್ರದಲ್ಲಿ ಸುಮಾರು 800 ಎಕರೆ ಪ್ರದೇಶದಲ್ಲಿ ಜಿಯೊ ವಿಶ್ವವಿದ್ಯಾಲಯವನ್ನು ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆಯೊಂದಿಗೆ ಕಟ್ಟುವುದು ಈ ಸಂಸ್ಥೆಯ ಸದ್ಯದ ಗುರಿ.

“ಅಂತರರಾಷ್ಟ್ರೀಯ ಶಿಕ್ಷಣ ಸಂಸ್ಥೆಗಳ ಜತೆಗೆ ಪೈಪೋಟಿ ನೀಡುವಂಥ ಅಂತರರಾಷ್ಟ್ರೀಯ ದರ್ಜೆಯ ಶಿಕ್ಷಣ ಸಂಸ್ಥೆಗಳನ್ನು ಬೆಳೆಸಲು 10 ಸರಕಾರಿ ಹಾಗೂ 10 ಖಾಸಗಿ ಶೈಕ್ಷಣಿಕ ಹಾಗೂ ಸಂಶೋಧನಾ ಸಂಸ್ಥೆಗಳನ್ನು ಉನ್ನತೀಕರಿಸಲಾಗುವುದು” ಎಂದು ಹಣಕಾಸು ಸಚಿವ ಅರುಣ್‌ ಜೇಟ್ಲಿ 2016-17ನೇ ಸಾಲಿನ ಬಜೆಟ್‌ನಲ್ಲಿ ಘೋಷಿಸಿದ್ದರು. ಆದರೆ, ಅಂದಿನ ಘೋಷಣೆಯಲ್ಲಿ ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ನ ಖಚಿತ ಉಲ್ಲೇಖ ಇರಲಿಲ್ಲ.

ಭಾರತ ಚುನಾವಣಾ ಆಯೋಗದ ನಿವೃತ್ತ ಮುಖ್ಯ ಚುನಾವಣಾಧಿಕಾರಿ ಎನ್‌. ಗೋಪಾಲಸ್ವಾಮಿ ನೇತೃತ್ವದ ಉನ್ನತಾಧಿಕಾರ ಸಮಿತಿಯು (ಇಇಸಿ) ಒಟ್ಟು ಆರು ಶೈಕ್ಷಣಿಕ ಸಂಸ್ಥೆಗಳಿಗೆ ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆ ನೀಡಲು ಶಿಫಾರಸು ಮಾಡಿದೆ.

ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್‌ಸಿ), ಮುಂಬೈನ ಐಐಟಿ ಮತ್ತು ದೆಹಲಿಯ ಐಐಟಿ ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆ ಪಡೆದ ಸರಕಾರಿ ಸಂಸ್ಥೆಗಳು. ರಾಜಸ್ಥಾನದಲ್ಲಿರುವ ಬಿರ್ಲಾ ಇನ್‌ಸ್ಟಿಟ್ಯೂಟ್‌ ಆಫ್‌ ಟೆಕ್ನಾಲಜಿ ಅಂಡ್‌ ಸೈನ್ಸ್‌, ಕರ್ನಾಟಕದ ಮಣಿಪಾಲ್‌ನಲ್ಲಿರುವ ಮಣಿಪಾಲ್‌ ಅಕಾಡೆಮಿ ಆಫ್‌ ಹೈಯರ್‌ ಎಜುಕೇಷನ್‌ ಮತ್ತು ಮಹಾರಾಷ್ಟ್ರದ ಪುಣೆಯಲ್ಲಿ ಸ್ಥಾಪಿಸಲು ಉದ್ದೇಶಿಸಿರುವ ಜಿಯೊ ಇನ್‌ಸ್ಟಿಟ್ಯೂಟ್‌ (ರಿಲಯನ್ಸ್‌ ಫೌಂಡೇಷನ್‌) ಈ ಮಾನ್ಯತೆ ಪಡೆದಿರುವ ಖಾಸಗಿ ಸಂಸ್ಥೆಗಳು.

ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆ ನೀಡಿರುವ ಈ ಮೂರು ಸಂಸ್ಥೆಗಳಲ್ಲಿ ಮೊದಲೆರಡು ಸಂಸ್ಥೆಗಳು ಈಗಾಗಲೇ ಕಾರ್ಯಾಚರಣೆ ನಡೆಸುತ್ತಿದ್ದು, ಶೈಕ್ಷಣಿಕ ಸಾಧನೆಯನ್ನು ತೋರಿಸಿವೆ ಎಂದು ಕೇಂದ್ರ ಮಾನವ ಸಂಪನ್ಮೂಲ ಇಲಾಖೆ ಹೇಳುತ್ತದೆ. ಆದರೆ, ಜಿಯೊ ಇನ್‌ಸ್ಟಿಟ್ಯೂಟ್ ಇನ್ನೂ ಸ್ಥಾಪನೆಯೇ ಆಗಿಲ್ಲದಿರುವ ಸಂಸ್ಥೆ.

2017ರ ಆಗಸ್ಟ್‌ 29ರಂದು ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಬಗ್ಗೆ ಸರಕಾರ ನಿಯಮ ಜಾರಿಗೆ ತಂದಿದೆ. 15 ವರ್ಷಗಳ ಶೈಕ್ಷಣಿಕ ಸಾಧನೆಯನ್ನು ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆಗೆ ಪರಿಗಣಿಸಲಾಗುತ್ತದೆ ಎಂದು ಈ ಹೊಸ ನಿಯಮ ಹೇಳುತ್ತದೆ. ಅದೇ ನಿಯಮದಲ್ಲಿ ಇನ್ನೂ ಸ್ಥಾಪನೆಯಾಗಿರುವ, ಆದರೆ, ಮುಂದೆ ಸ್ಥಾಪನೆಯಾಗಿ ದೊಡ್ಡ ಮಟ್ಟದಲ್ಲಿ ಬೆಳೆಯುವ ‘ಮಹತ್ವಾಕಾಂಕ್ಷೆ’ ಹೊಂದಿರುವ ಸಂಸ್ಥೆಗಳಿಗೆ ಈ ಮಾನ್ಯತೆ ನೀಡಬಹುದೆಂಬ ‘ಸಡಿಲಿಕೆ’ಯನ್ನೂ ಕೊಡಲಾಗಿದೆ.

ಅಸ್ತಿತ್ವದಲ್ಲಿ ಇಲ್ಲದಿರುವ ಸಂಸ್ಥೆಗೆ ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆ ನೀಡಿರುವುದು ವಿದ್ಯಾಕ್ಷೇತ್ರದಲ್ಲಿ ರಾಜಕೀಯ ಹಸ್ತಕ್ಷೇಪ ಹೆಚ್ಚಾಗುತ್ತಿರುವುದಕ್ಕೆ ಸಾಕ್ಷಿ. ವಿದ್ಯಾರ್ಥಿಗಳ ಹಿತದೃಷ್ಟಿಯಿಂದ ನೋಡಿದರೆ ಇಂತಹ ಬೆಳವಣಿಗೆಗಳು ಕಳವಳಕಾರಿ.
- ಪ್ರೊ. ಎಂ.ಎಸ್‌. ತಿಮ್ಮಪ್ಪ, ಶಿಕ್ಷಣ ತಜ್ಞ

2017ರ ಆಗಸ್ಟ್‌ನಲ್ಲಿ ಈ ನಿಯಮ ಜಾರಿಗೆ ಬಂದಿದ್ದರೆ 2017ರ ಸೆಪ್ಟೆಂಬರ್‌ 12ರಂದು ರಿಲಯನ್ಸ್‌ ಫೌಂಡೇಷನ್‌ನ ಆರಂಭದ ಪ್ರಕ್ರಿಯೆಗಳು ಆರಂಭವಾಗಿವೆ. ಮುಖೇಶ್‌ ಅಂಬಾನಿ ಮತ್ತು ಅವರ ಪತ್ನಿ ನೀತಾ ಅಂಬಾನಿ ಈ ರಿಲಯನ್ಸ್‌ ಫೌಂಡೇಷನ್‌ನ ಮೊದಲ ಇಬ್ಬರು ಮಂಡಳಿ ಸದಸ್ಯರು.

ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆ ಪಡೆದ ಶಿಕ್ಷಣ ಸಂಸ್ಥೆಗಳು ತಮ್ಮದೇ ಆದ ಹಣಕಾಸು ನಿಧಿಯನ್ನು ಹೊಂದಿರಬೇಕು. ಸರಕಾರದಿಂದ ಯಾವುದೇ ಧನ ಸಹಾಯ ಈ ಸಂಸ್ಥೆಗಳಿಗೆ ಸಿಗುವುದಿಲ್ಲ ಎನ್ನುತ್ತದೆ ಹೊಸ ನಿಯಮ. ಆದರೆ, ಸಂಶೋಧನೆಯ ಹೆಸರಿನಲ್ಲಿ ಸರಕಾರದಿಂದ ವಿಶೇಷ ಅನುದಾನ ಪಡೆಯಲು ನಿಯಮದಲ್ಲಿ ‘ಅವಕಾಶ’ವಿದೆ!

“ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆಗಾಗಿ ಎಂಟು ತಿಂಗಳ ಹಿಂದೆಯೇ ಅರ್ಜಿ ಆಹ್ವಾನಿಸಲಾಗಿತ್ತು. ಒಟ್ಟು 114 ಅರ್ಜಿಗಳು ಬಂದಿದ್ದವು. ಸಮಿತಿಯ ಶಿಫಾರಸಿನಂತೆ ಮಾನ್ಯತೆ ನೀಡುವ ಪ್ರಕ್ರಿಯೆ ನಡೆದಿದೆ” ಎಂದು ಕೇಂದ್ರ ಉನ್ನತ ಶಿಕ್ಷಣ ಇಲಾಖೆಯ ಕಾರ್ಯದರ್ಶಿ ಆರ್‌. ಸುಬ್ರಹ್ಮಣ್ಯಂ ತಿಳಿಸಿದ್ದಾರೆ.

ಅರ್ಜಿ ಸಲ್ಲಿಸಿದ ಉಳಿದ ಯಾವ ಖಾಸಗಿ ಸಂಸ್ಥೆಗಳೂ ದೊಡ್ಡ ಕ್ಯಾಂಪನ್‌ ಹಾಗೂ ದೊಡ್ಡ ಬಂಡವಾಳ ಹೂಡಿಕೆಯ ನೀಲನಕ್ಷೆ ತೋರಿಲ್ಲದ ಕಾರಣಕ್ಕೆ ಜಿಯೊ ವಿಶ್ವವಿದ್ಯಾಲಯಕ್ಕೆ ಮಾತ್ರ ಈ ಮಾನ್ಯತೆ ನೀಡಲಾಗಿದೆ ಎನ್ನಲಾಗಿದೆ. ಜಿಯೊ ವಿಶ್ವವಿದ್ಯಾಲಯಕ್ಕಾಗಿ ರಿಲಯನ್ಸ್‌ ಸಮೂಹ ಸಾವಿರಾರು ಕೋಟಿ ರೂಪಾಯಿ ಹೂಡಿಕೆ ಮಾಡುತ್ತಿದೆ.

ಭಾರತದ ಹಲವು ಸಂಶೋಧನೆಗಳಿಗೆ ಕಳೆದ 5 ವರ್ಷಗಳಲ್ಲಿ 6000 ಕೋಟಿ ರೂಪಾಯಿ ಖರ್ಚು ಮಾಡಿರುವುದಾಗಿ ಹೇಳಿರುವ ರಿಲಯನ್ಸ್‌ ಸಮೂಹ, ವಿಶ್ವದ 50 ಅತ್ಯುನ್ನತ ವಿಶ್ವವಿದ್ಯಾಲಯಗಳೊಂದಿಗೆ ಸಂಬಂಧ ಹೊಂದಿರುವುದಾಗಿ ಹೇಳಿಕೊಂಡಿದೆ.

ರಿಲಯನ್ಸ್‌ ಸಮೂಹದ ಜಿಯೊ ವಿಶ್ವವಿದ್ಯಾಲಯಕ್ಕೆ ಅನುಕೂಲ ಮಾಡಿಕೊಡುವ ಉದ್ದೇಶದಿಂದಲೇ ಮಾನ್ಯತೆ ಪ್ರಕ್ರಿಯೆ ಹಾಗೂ ಹೊಸ ನಿಯಮಗಳನ್ನು ರೂಪಿಸಲಾಗಿದೆ ಎಂಬ ಆರೋಪಗಳು ಕೇಳಿಬಂದಿವೆ. ಆದರೆ, ಎಲ್ಲಾ ಆರೋಪಗಳ ನಡುವೆಯೂ ಕೇಂದ್ರ ಮಾನವ ಸಂಪನ್ಮೂಲ ಇಲಾಖೆ ಜಿಯೊ ವಿಶ್ವವಿದ್ಯಾಲಯಕ್ಕೆ ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆ ನೀಡಾಗಿದೆ.

ಇನ್ನೂ ಅಸ್ತಿತ್ವಕ್ಕೇ ಬಾರದಿರುವ ಸಂಸ್ಥೆಗೆ ಮುಂದಿನ ನೀಲನಕ್ಷೆಯ ಆಧಾರದ ಮೇಲೆ ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆ ನೀಡಿರುವುದಕ್ಕೆ ಶಿಕ್ಷಣ ತಜ್ಞರು ಆಕ್ಷೇಪಿಸಿದ್ದಾರೆ. ಶಿಕ್ಷಣವನ್ನು ಉದ್ಯಮವಾಗಿಸಲು ಸರಕಾರ ಇಷ್ಟರ ಮಟ್ಟಿಗೆ ಉದ್ಯಮಿಗಳೊಂದಿಗೆ ಕೈಜೋಡಿಸಿರುವುದು ಸರಿಯಲ್ಲ ಎಂಬ ಮಾತುಗಳು ಈಗ ಕೇಳಿಬಂದಿವೆ.

“ಅಸ್ತಿತ್ವದಲ್ಲೇ ಇರದ ಸಂಸ್ಥೆಗೆ ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆ ನೀಡಿರುವುದು ಹಾಸ್ಯಾಸ್ಪದ ಬೆಳವಣಿಗೆ. ಸಂಸ್ಥೆಯ ಫಲಿತಾಂಶ, ಬೋಧಕ ಸಿಬ್ಬಂದಿ, ಬೋಧನೆಯ ಗುಣಮಟ್ಟ, ಉತ್ತಮ ಗ್ರಂಥಾಲಯ, ಉತ್ತಮ ಮೂಲ ಸೌಕರ್ಯದ ಸಾಧನೆ ಮಾಡಿ ತೋರಿಸಿರುವ ಸಂಸ್ಥೆಗಳಿಗೆ ಈ ಮಾನ್ಯತೆ ನೀಡುವುದು ಸರಿ. ಆದರೆ, ಅಂಬಾನಿ ತೋರಿಸಿದ ನೀಲನಕ್ಷೆಯ ಆಧಾರದ ಮೇಲೆ ಮಾನ್ಯತೆ ನೀಡಿರುವುದು ಸರಿಯಲ್ಲ” ಎನ್ನುತ್ತಾರೆ ಶಿಕ್ಷಣ ತಜ್ಞ ಪ್ರೊ. ಎಂ.ಎಸ್‌. ತಿಮ್ಮಪ್ಪ.

“ಯುಜಿಸಿ, ಶಿಕ್ಷಣ ಇಲಾಖೆ ಯಾವುದರ ನಿಯಂತ್ರಣಕ್ಕೂ ಬಾರದ ರೀತಿಯಲ್ಲಿ ಜಿಯೊ ವಿಶ್ವವಿದ್ಯಾಲಯಕ್ಕೆ ಅನುಕೂಲ ಮಾಡಿಕೊಟ್ಟಿರುವುದು ಇಲ್ಲಿ ರಾಜಕೀಯ ಹಸ್ತಕ್ಷೇಪವಿರುವುದು ಎದ್ದು ಕಾಣುವಂತೆ ಮಾಡಿದೆ. ಕೆಲವರ ಅನುಕೂಲಕ್ಕೆ ತಕ್ಕಂತೆ ಶೈಕ್ಷಣಿಕ ನಿಯಮಗಳನ್ನೇ ತಿದ್ದುವುದು ಒಳ್ಳೆಯ ಬೆಳವಣಿಗೆ ಅಲ್ಲ. ಉದ್ಯಮಿಗಳು ದೊಡ್ಡ ದೊಡ್ಡ ಶಿಕ್ಷಣ ಸಂಸ್ಥೆಯ ಮೂಲಕ ಲಾಭ ಮಾಡಿಕೊಳ್ಳಲು ಸರಕಾರವೇ ಅವಕಾಶ ಮಾಡಿಕೊಡುತ್ತಿರುವುದು ದುರಂತ” ಎಂದು ಬೇಸರಿಸುತ್ತಾರೆ ಅವರು.

ಸುಮಾರು ಎರಡು ದಶಕದಷ್ಟು ಹಿಂದೆಯೇ ಶಿಕ್ಷಣ ಕ್ಷೇತ್ರಕ್ಕೆ ವಿದೇಶಿ ನೇರ ಬಂಡವಾಳ ಹೂಡಿಕೆ ಆಗಬೇಕು, ತಾಂತ್ರಿಕ, ವಿಜ್ಞಾನ ವಿಷಯಗಳ ಕಲಿಕೆ ಖಾಸಗೀಕರಣಗೊಳ್ಳಬೇಕು ಎಂದು ವಾದಿಸಿದ್ದ ಇದೇ ಮುಖೇಶ್‌ ಅಂಬಾನಿ ಕೈ ಕೆಳಗೆ ಈಗ ಇನ್‌ಸ್ಟಿಟ್ಯೂಟ್ ಆಫ್‌ ಎಮಿನೆನ್ಸ್‌ ಮಾನ್ಯತೆ ಪಡೆದ ಶಿಕ್ಷಣ ಸಂಸ್ಥೆ ಬೆಳೆಯುತ್ತಿದೆ. ದೊಡ್ಡ ಜಾಗದಲ್ಲಿ ದೊಡ್ಡ ಬಂಡವಾಳ ಹೂಡಿದ ದೊಡ್ಡ ಉದ್ಯಮಿ ದೊಡ್ಡ ಲಾಭ ಮಾಡಿಕೊಳ್ಳಲು ಈ ಸಂಸ್ಥೆಯನ್ನು ಬಳಸಿಕೊಳ್ಳುವುದಿಲ್ಲ ಎಂದು ಹೇಳಲು ಸಾಧ್ಯವಿಲ್ಲ.

ಶಿಕ್ಷಣದ ಖಾಸಗೀಕರಣದ ಹೆಸರಿನಲ್ಲಿ ವಿದ್ಯೆಯನ್ನು ಉದ್ಯಮವಾಗಿಸಿರುವ ಬಂಡವಾಳಗಾರರು ಈಗ ಶೈಕ್ಷಣಿಕ ನಿಯಮಗಳನ್ನೇ ತಮಗೆ ಬೇಕಾದಂತೆ ಬದಲಿಸಿಕೊಳ್ಳುತ್ತಿರುವುದು, ಅದಕ್ಕೆ ಸರಕಾರವೇ ನಡುಬಗ್ಗಿಸಿ ಕೆಲಸ ಮಾಡುತ್ತಿರುವುದು ಉತ್ತಮ ಬೆಳವಣಿಗೆಯಂತೂ ಅಲ್ಲ.