‘ಎಂಡ್‌ ಆಫ್‌ ಇನ್‌ಸ್ಪೆಕ್ಷನ್‌ ರಾಜ್‌’; ಶೈಕ್ಷಣಿಕ ಸುಧಾರಣೆ ತರಲಿದೆಯೇ ಉನ್ನತ ಶಿಕ್ಷಣ ಆಯೋಗ?
COVER STORY

‘ಎಂಡ್‌ ಆಫ್‌ ಇನ್‌ಸ್ಪೆಕ್ಷನ್‌ ರಾಜ್‌’; ಶೈಕ್ಷಣಿಕ ಸುಧಾರಣೆ ತರಲಿದೆಯೇ ಉನ್ನತ ಶಿಕ್ಷಣ ಆಯೋಗ?

ಇಂದು ಲಾಭದಾಯಕ ‘ಉದ್ಯಮ’ವಾಗಿರುವ ಶಿಕ್ಷಣ ಕ್ಷೇತ್ರದಲ್ಲಿ ಸುಧಾರಣೆ ತರಲು ಕೇಂದ್ರ ಸರಕಾರ ಮುಂದಾಗಿದೆ. ನಿಜಕ್ಕೂ ಈ ಪ್ರಯತ್ನ ಶೈಕ್ಷಣಿಕ ಸುಧಾರಣೆಗೆ ನಾಂದಿ ಹಾಡಲಿದೆಯೇ?

ಉನ್ನತ ಶಿಕ್ಷಣ ಕ್ಷೇತ್ರದಲ್ಲಿ ಸುಧಾರಣೆ ತರುವ ಪ್ರಯತ್ನಕ್ಕೆ ಕೇಂದ್ರ ಸರಕಾರ ಮುಂದಾಗಿದೆ. ಉನ್ನತ ಶಿಕ್ಷಣ ವ್ಯವಸ್ಥೆಯ ಸುಧಾರಣೆಗಾಗಿ ಪ್ರೊ. ಯಶ್‌ಪಾಲ್‌ ಸಮಿತಿ ನೀಡಿದ್ದ ವರದಿಯ ಆಧಾರದ ಮೇಲೆ ವಿಶ್ವವಿದ್ಯಾಲಯ ಅನುದಾನ ಆಯೋಗವನ್ನು (ಯುಜಿಸಿ) ಮರುರಚಿಸಲು ಕೇಂದ್ರ ಸಿದ್ಧತೆ ನಡೆಸಿದೆ.

ಯುಜಿಸಿಗೆ ಬದಲಾಗಿ ಭಾರತೀಯ ಉನ್ನತ ಶಿಕ್ಷಣ ಆಯೋಗವನ್ನು (ಎಚ್‌ಇಸಿಐ) ಹಲವು ಬದಲಾವಣೆಗಳೊಂದಿಗೆ ರಚಿಸಲು ಕೇಂದ್ರ ಮಾನವ ಸಂಪನ್ಮೂಲ ಇಲಾಖೆ ಕರಡು ಸಿದ್ಧಪಡಿಸಿದೆ. ‘ವಿಶ್ವವಿದ್ಯಾಲಯ ಅನುದಾಯ ಆಯೋಗ ಕಾಯ್ದೆ- 1956’ಕ್ಕೆ ಬದಲಾಗಿ ‘ಭಾರತೀಯ ಉನ್ನತ ಶಿಕ್ಷಣ ಆಯೋಗ ಕಾಯ್ದೆ-2018’ ಅನ್ನು ಜಾರಿಗೆ ತರಲು ಇಲಾಖೆ ಮುಂದಾಗಿದೆ.

ಉನ್ನತ ಶಿಕ್ಷಣದ ಆಮೂಲಾಗ್ರ ಬದಲಾವಣೆಗಾಗಿ ಯುಜಿಸಿಯ ಮಾಜಿ ಅಧ್ಯಕ್ಷ ಪ್ರೊ. ಯಶ್‌ಪಾಲ್‌ ಅವರ ಅಧ್ಯಕ್ಷತೆಯಲ್ಲಿ 2008ರಲ್ಲಿ ಕೇಂದ್ರ ಮಾನವ ಸಂಪನ್ಮೂಲ ಇಲಾಖೆ ಸಮಿತಿಯೊಂದನ್ನು ನೇಮಿಸಿತ್ತು. 2009ರಲ್ಲಿ ತನ್ನ ವರದಿಯನ್ನು ಸಲ್ಲಿಸಿದ ಈ ಸಮಿತಿಯು ಉನ್ನತ ಶಿಕ್ಷಣ ವ್ಯವಸ್ಥೆಯ ಸುಧಾರಣೆಗಾಗಿ ಯುಜಿಸಿ ಮತ್ತು ಅಖಿಲ ಭಾರತ ತಾಂತ್ರಿಕ ಶಿಕ್ಷಣ ಪರಿಷತ್ತಿನ (ಎಐಸಿಟಿಎ) ಬದಲಿಗೆ ಅಖಿಲ ಭಾರತ ಮಟ್ಟಕ್ಕೆ ಒಂದು ಉನ್ನತ ಶಿಕ್ಷಣ ಆಯೋಗವನ್ನು ರೂಪಿಸುವಂತೆ ಶಿಫಾರಸು ಮಾಡಿತ್ತು.

ಭಾರತದಲ್ಲಿರುವ ಬ್ರಿಟಿಷರ ಕಾಲದ ಶಿಕ್ಷಣ ವ್ಯವಸ್ಥೆಯನ್ನು ಮರುರೂಪಿಸುವ ಕೆಲಸ ಆಗಬೇಕು. ಅದಕ್ಕಾಗಿ ಹೊಸದಾಗಿ ಉನ್ನತ ಶಿಕ್ಷಣ ಆಯೋಗ ರಚಿಸಿ ಅದಕ್ಕೆ ಹೆಚ್ಚಿನ ಅಧಿಕಾರ ನೀಡಬೇಕು ಎಂದು ಯಶ್‌ಪಾಲ್‌ ಸಮಿತಿ ವರದಿ ಹೇಳಿತ್ತು. ಯುಜಿಸಿಯಲ್ಲಿ ಭ್ರಷ್ಟಾಚಾರ ತುಂಬಿದೆ, ವಿಶ್ವವಿದ್ಯಾಲಯಗಳಿಗೆ ಮಾನ್ಯತೆ ನೀಡುವುದಷ್ಟೇ ಯುಜಿಸಿ ಕೆಲಸವಾಗಿದೆ ಎಂದು ಸಮಿತಿ ತಿಳಿಸಿತ್ತು.

ಉನ್ನತ ಶಿಕ್ಷಣ ಸಂಸ್ಥೆಗಳ ವ್ಯವಸ್ಥೆಯ ಸುಧಾರಣೆಯ ಜತೆಗೆ ಪಠ್ಯಕ್ರಮ ಹಾಗೂ ಉನ್ನತ ಶಿಕ್ಷಣ ಸಂಸ್ಥೆಗಳಲ್ಲಿ ನಡೆಯಬೇಕಾದ ಸಂಶೋಧನೆ ಗುಣಮಟ್ಟದ ಬಗ್ಗೆ ಯಶ್‌ಪಾಲ್‌ ವರದಿ ಹೆಚ್ಚು ಒತ್ತು ನೀಡಿತ್ತು. ವಿಶ್ವವಿದ್ಯಾಲಯಗಳು ಹಾಗೂ ಉನ್ನತ ಶಿಕ್ಷಣ ಸಂಸ್ಥೆಗಳು ಪದವಿಗಳನ್ನು ನೀಡುವ ಕಟ್ಟಡಗಳಾಗಿ ಉಳಿಯುವ ಬದಲು ಅವುಗಳಲ್ಲಿ ನಡೆಯುವ ಸಂಶೋಧನೆ ಸಮಾಜದ ಉಪಯೋಗಕ್ಕೆ ಬರುವಂತಿರಬೇಕು ಎಂದು ವರದಿ ಶಿಫಾರಸು ಮಾಡಿತ್ತು.

ಈ ಎಲ್ಲಾ ಶಿಫಾರಸುಗಳೊಂದಿಗೆ ಯುಜಿಸಿ ಮತ್ತು ಎಐಸಿಟಿಎ ಬದಲಿಗೆ ಉನ್ನತ ಶಿಕ್ಷಣ ಆಯೋಗ ರಚಿಸಬೇಕೆಂದು ಯಶ್‌ಪಾಲ್‌ ವರದಿ ಹೇಳಿತ್ತು. ಯುಜಿಸಿ ಈವರೆಗೆ ದೇಶದಲ್ಲಿರುವ ವಿಶ್ವವಿದ್ಯಾಲಯಗಳಿಗೆ ಮಾನ್ಯತೆ ನೀಡುವ ಹಾಗೂ ಅನುದಾನ ನೀಡುವ ಕೆಲಸವನ್ನು ಮಾಡಿಕೊಂಡು ಬಂದಿದ್ದರೆ, ಎಐಸಿಟಿಎ ತಾಂತ್ರಿಕ ಶಿಕ್ಷಣ ಸಂಸ್ಥೆಗಳಿಗೆ ಮಾನ್ಯತೆ ನೀಡುವ ಕೆಲಸ ಮಾಡುತ್ತಿದೆ. ಇನ್ನು ಮುಂದೆ ಈ ಕೆಲಸವನ್ನು ಉನ್ನತ ಶಿಕ್ಷಣ ಆಯೋಗ ಮಾಡಲಿದೆ.

ಉನ್ನತ ಶಿಕ್ಷಣ ಆಯೋಗ ಶಿಕ್ಷಣದ ಸುಧಾರಣೆಗೆ ಹಾಗೂ ಶಿಕ್ಷಣ ಸಂಸ್ಥೆಗಳ ಮೇಲೆ ನಿಗಾ ಇಡುವುದಕ್ಕೆ ಗಮನ ಕೊಡಲಿದೆಯೇ ಹೊರತು ಅನಗತ್ಯವಾಗಿ ಶಿಕ್ಷಣ ಸಂಸ್ಥೆಗಳ ಮೇಲೆ ನಿಯಂತ್ರಣ ಹೇರುವುದಿಲ್ಲ ಎಂದು ಪ್ರಸ್ತಾವಿತ ಕರಡು ಹೇಳುತ್ತದೆ. ಗುಣಮಟ್ಟ ಹಾಗೂ ವಿದ್ಯಾರ್ಥಿಗಳ ಹಿತ ಕಾಯದ ಶಿಕ್ಷಣ ಸಂಸ್ಥೆಗಳಿಗೆ ದಂಡ ವಿಧಿಸುವ ಹಾಗೂ ಅವುಗಳ ಮಾನ್ಯತೆ ರದ್ದುಗೊಳಿಸುವ ಅಧಿಕಾರ ಈ ಆಯೋಗಕ್ಕೆ ಇರಲಿದೆ.

ಎಂಡ್‌ ಆಫ್‌ ಇನ್‌ಸ್ಪೆಕ್ಷನ್‌ ರಾಜ್‌:

ಹೊಸ ಆಯೋಗ ಶಿಕ್ಷಣ ಸಂಸ್ಥೆಗಳ ಗುಣಮಟ್ಟದ ಮೇಲ್ವಿಚಾರಣೆ ನಡೆಸುತ್ತದೆಯೇ ಹೊರತು ಈ ಹಿಂದೆ ಇದ್ದ ಇನ್‌ಸ್ಪೆಕ್ಷನ್‌ ರಾಜ್‌ (ಪರಿವೀಕ್ಷಣೆ) ವ್ಯವಸ್ಥೆಯನ್ನು ಮುಂದುವರಿಸುವುದಿಲ್ಲ ಎಂದು ಮಾನವ ಸಂಪನ್ಮೂಲ ಇಲಾಖೆ ಹೇಳಿದೆ. ಇನ್‌ಸ್ಪೆಕ್ಷನ್‌ ರಾಜ್‌ ವ್ಯವಸ್ಥೆಗೆ ಅಂತ್ಯ ಹಾಡುವುದರಿಂದ ಸರಕಾರಿ ಹಾಗೂ ಸ್ವಾಯತ್ತ ವಿಶ್ವವಿದ್ಯಾಲಯಗಳ ಆಡಳಿತದಲ್ಲಿ ಸರಕಾರದ ಹಸ್ತಕ್ಷೇಪ ಇರುವುದಿಲ್ಲ ಎನ್ನಲಾಗಿದೆ.

ಶಿಕ್ಷಣ ಸಂಸ್ಥೆಗಳಿಗೆ ಅಗತ್ಯವಾದ ಅನುದಾನ ಹಾಗೂ ಸೌಲಭ್ಯಗಳನ್ನು ಸರಕಾರ ಒದಗಿಸುತ್ತದೆ. ಅದರೆ ಅನಗತ್ಯವಾಗಿ ಶಿಕ್ಷಣ ಸಂಸ್ಥೆಗಳ ಆಡಳಿತದಲ್ಲಿ ಸರಕಾರ ಮೂಗು ತೂರಿಸುವುದಿಲ್ಲ ಎಂದು ಮಾನವ ಸಂಪನ್ಮೂಲ ಇಲಾಖೆ ತಿಳಿಸಿದೆ. ಈ ಬೆಳವಣಿಗೆ ಒಳ್ಳೆಯದು ಎನ್ನುತ್ತಾರೆ ಶಿಕ್ಷಣ ತಜ್ಞರು.

“ಶಿಕ್ಷಣ ಸಂಸ್ಥೆಗಳಲ್ಲಿ ಸರಕಾರದ ಹಸ್ತಕ್ಷೇಪ ಒಳ್ಳೆಯದಲ್ಲ. ಹಲವು ಸುಧಾರಣೆಗಳೊಂದಿಗೆ ಉನ್ನತ ಶಿಕ್ಷಣ ಆಯೋಗ ರಚಿಸಲು ಕೇಂದ್ರ ಸರಕಾರ ಮುಂದಾಗಿರುವುದು ಉತ್ತಮ ಬೆಳವಣಿಗೆ. ದೇಶದಲ್ಲಿ ಹಲವಾರು ಕ್ಷೇತ್ರಗಳಲ್ಲಿ ಕ್ರಾಂತಿಕಾರಕ ಬದಲಾವಣೆಗಳಾಗಿವೆ. ಆದರೆ, ಶಿಕ್ಷಣದಲ್ಲಿ ಅಂತಹ ಬದಲಾವಣೆಗಳು ಆಗಿಲ್ಲ. ಈಗ ಅಂತಹ ಕ್ರಾಂತಿಕಾರಕ ಬದಲಾವಣೆ ಆಗುತ್ತಿರುವುದು ಸ್ವಾಗತಾರ್ಹ” ಎನ್ನುತ್ತಾರೆ ಶಿಕ್ಷಣ ತಜ್ಞ ಪ್ರೊ.ಎಂ.ಎಸ್‌. ತಿಮ್ಮಪ್ಪ.

“ಯುಜಿಸಿ ಶಿಕ್ಷಕರು ಮತ್ತು ವಿದ್ಯಾರ್ಥಿಗಳ ಕಡೆಗೆ ಗಮನ ಕೊಡದೆ ಕೇವಲ ಶಿಕ್ಷಣ ಸಂಸ್ಥೆಗಳ ಆಡಳಿತ ವಿಚಾರಗಳಿಗಷ್ಟೇ ಗಮನ ಕೊಡುತ್ತಿತ್ತು. ಮಾನ್ಯತೆ ಮತ್ತು ಅನುದಾನ ಕೊಡುವ ವಿಚಾರಗಳಲ್ಲಿ ಯುಜಿಸಿ ಶಿಕ್ಷಣ ಸಂಸ್ಥೆಗಳ ಮೇಲೆ ದಬ್ಬಾಳಿಕೆ ನಡೆಸುತ್ತಿತ್ತು. ಇನ್ನುಮುಂದೆ ಅಂತಹ ಅವ್ಯವಸ್ಥೆಗೆ ಕಡಿವಾಣ ಬೀಳಲಿದೆ” ಎಂಬುದು ಅವರ ಅಭಿಪ್ರಾಯ.

ಪ್ರೊ. ಯಶ್‌ಪಾಲ್‌ ಸಮಿತಿ ವರದಿ ಉನ್ನತ ಶಿಕ್ಷಣದ ಸುಧಾರಣೆಯ ತಳಮಟ್ಟದ ಸಮಸ್ಯೆಗಳನ್ನು ಗುರುತಿಸಿತ್ತು. ಕೊನೆಗೂ ಆ ವರದಿಯ ಆಧಾರದ ಮೇಲೆ ಉನ್ನತ ಶಿಕ್ಷಣದ ಸುಧಾರಣೆಗೆ ಸರಕಾರ ಮುಂದಾಗಿರುವುದು ಶೈಕ್ಷಣಿಕ ಸುಧಾರಣೆಗೆ ದೃಷ್ಟಿಯಿಂದ ಉತ್ತಮ ಬೆಳವಣಿಗೆ.
- ಪ್ರೊ.ಎಂ.ಎಸ್‌. ತಿಮ್ಮಪ್ಪ, ಶಿಕ್ಷಣ ತಜ್ಞ

“ಯುಜಿಸಿ ಮತ್ತು ಎಐಸಿಟಿಎ ಸಂಸ್ಥೆಗಳಲ್ಲಿ ಭ್ರಷ್ಟಾಚಾರ ಹೆಚ್ಚಾಗಿದೆ ಎಂದು ಯಶ್‌ಪಾಲ್‌ ವರದಿಯಲ್ಲಿ ಹೇಳಲಾಗಿದೆ. ಹೀಗಾಗಿ ಈ ಸಂಸ್ಥೆಗಳು ಇರುವವರೆಗೂ ಶೈಕ್ಷಣಿಕ ಗುಣಮಟ್ಟದ ಸುಧಾರಣೆ ಮರೀಚಿಕೆ ಮಾತ್ರ. ಈ ವ್ಯವಸ್ಥೆಯನ್ನು ಆಮೂಲಾಗ್ರವಾಗಿ ಬದಲಾಯಿಸಿದರೆ ಮಾತ್ರ ಶಿಕ್ಷಣದ ಸುಧಾರಣೆ ಸಾಧ್ಯ” ಎಂಬುದು ಅವರ ಮಾತು.

“ಯಶ್‌ಪಾಲ್‌ ಸಮಿತಿಯ ವರದಿಯನ್ನು ಜಾರಿಗೆ ತರಲು ಆಗ ಇದ್ದ ಯುಪಿಎ ಸರಕಾರ ಪ್ರಯತ್ನ ನಡೆಸಿತ್ತು. ಆದರೆ, ಯುಜಿಸಿ ಮತ್ತು ಎಐಸಿಟಿಎ ಸಿಬ್ಬಂದಿ ಅದರ ವಿರುದ್ಧ ಪ್ರತಿಭಟನೆ ನಡೆಸಿದ್ದರು. ಈ ಸಂಸ್ಥೆಗಳಲ್ಲಿರುವ ಸಿಬ್ಬಂದಿ ತಮ್ಮ ಅಸ್ಥಿತ್ವಕ್ಕಾಗಿ ಶಿಕ್ಷಣ ಸುಧಾರಣೆಯ ಪ್ರಯತ್ನಕ್ಕೇ ಭಾರೀ ವಿರೋಧ ಒಡ್ಡಿದ್ದರು. ಈಗಲೂ ಸಿಬ್ಬಂದಿ ವಿರೋಧ ತೋರಬಹುದು. ಆದರೆ, ಹೇಗಾದರೂ ಅದನ್ನು ನಿಭಾಯಿಸಿ ಹೊಸ ವ್ಯವಸ್ಥೆಯನ್ನು ಜಾರಿಗೆ ತರಬೇಕು” ಎನ್ನುತ್ತಾರೆ ಅವರು.

ಅಂಬಾನಿ- ಬಿರ್ಲಾ ವರದಿ ಮತ್ತು ಶಿಕ್ಷಣದ ಖಾಸಗೀಕರಣ!:

ಶಿಕ್ಷಣ ವ್ಯವಸ್ಥೆಯ ಸುಧಾರಣೆಗೆ ಸಂಬಂಧಿಸಿದಂತೆ ಹಲವು ತಜ್ಞರ ವರದಿಗಳಿವೆ. ಉದ್ಯಮಿಗಳಾದ ಮುಖೇಶ್‌ ಅಂಬಾನಿ ಮತ್ತು ಕುಮಾರಮಂಗಲಂ ಬಿರ್ಲಾ ಕೂಡಾ ಸುಮಾರು 18 ವರ್ಷಗಳ ಹಿಂದೆ ಶಿಕ್ಷಣ ಸುಧಾರಣೆಗಾಗಿ ಶಿಫಾರಸುಗಳನ್ನು ನೀಡಿದ್ದರು. ಖಾಸಗಿ ಶಿಕ್ಷಣ ಸಂಸ್ಥೆಗಳು ಹಾಗೂ ಮಾರುಕಟ್ಟೆ ಆಧಾರಿತ ಶಿಕ್ಷಣದ ಅಗತ್ಯ ಭಾರತದಲ್ಲಿದೆ ಎಂದು ಈ ಇಬ್ಬರೂ ಹೇಳಿದ್ದರು.

ಪ್ರಾಥಮಿಕ ಹಂತದ ಶಿಕ್ಷಣದಿಂದ ಹಿಡಿದು ಉನ್ನತ ಶಿಕ್ಷಣದವರೆಗೆ ಸುಧಾರಣೆಯ ಅಗತ್ಯವಿದೆ ಎಂದಿದ್ದ ಅಂಬಾನಿ- ಬಿರ್ಲಾ ಶಿಕ್ಷಣದಲ್ಲಿ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳಬೇಕು ಎಂದಿದ್ದರು. ದೇಶದ ಜಿಡಿಪಿಗೂ ಜ್ಞಾನಕ್ಕೂ ತಳಕು ಹಾಕಿದ್ದ ಈ ಇಬ್ಬರೂ ಮಾರುಕಟ್ಟೆ ಆಧಾರಿತ ಶಿಕ್ಷಣ ವ್ಯವಸ್ಥೆ ಜಾರಿಗೆ ಬರಬೇಕು. ಅದಕ್ಕಾಗಿ ಶಿಕ್ಷಣದ ಖಾಸಗೀಕರಣ ಅಗತ್ಯ ಎಂದು ಪ್ರತಿಪಾದಿಸಿದ್ದರು.

ತಂತ್ರಜ್ಞಾನ ಮತ್ತು ವಿಜ್ಞಾನಕ್ಕಾಗಿ ಹೊಸ ಖಾಸಗಿ ವಿಶ್ವವಿದ್ಯಾಲಯಗಳ ಸ್ಥಾಪನೆಗೆ ಅವಕಾಶ ಕೊಡಬೇಕು. ಶಿಕ್ಷಣ ಕ್ಷೇತ್ರಕ್ಕೆ ವಿದೇಶಿ ನೇರ ಬಂಡವಾಳ ಹೂಡಿಕೆಗೆ ಅವಕಾಶ ಕಲ್ಪಿಸಬೇಕು ಎಂದು ಅಂಬಾನಿ- ಬಿರ್ಲಾ ಶಿಫಾರಸು ಹೇಳಿತ್ತು.

ಈ ಶಿಫಾರಸುಗಳ ಬಳಿಕ ಶಿಕ್ಷಣ ಖಾಸಗೀಕರಣಗೊಂಡು ಶಿಕ್ಷಣ ಸಂಸ್ಥೆಗಳು ನಾಯಿಕೊಡೆಗಳಂತೆ ತಲೆ ಎತ್ತಿದವು. ಡೊನೇಷನ್‌ ಹೆಸರಿನಲ್ಲಿ ಹಣ ಮಾಡಲು ಇಲ್ಲಿ ಅವಕಾಶವಿದೆ ಎಂದು ಅರಿತ ಉದ್ಯಮಿಗಳು, ರಾಜಕಾರಣಿಗಳು ಶಿಕ್ಷಣ ಸಂಸ್ಥೆಗಳನ್ನು ಕಟ್ಟಿ ಅನಾಯಾಸವಾಗಿ ‘ಶಿಕ್ಷಣ ತಜ್ಞ’ರೂ ಆದರು. ಗುಣಮಟ್ಟದ ಶಿಕ್ಷಣದ ಬಗ್ಗೆ ತಲೆಕೆಡಿಸಿಕೊಳ್ಳದೆ ಲಾಭವೇ ಮುಖ್ಯ ಉದ್ದೇಶವಾಗಿರುವ ಇಂಥ ಅದೆಷ್ಟೋ ಶಿಕ್ಷಣ ಸಂಸ್ಥೆಗಳು ಇಂದು ನಮ್ಮ ನಡುವೆ ಇವೆ.

ದಶಕಗಳ ಬಳಿಕ ಶಿಕ್ಷಣ ವ್ಯವಸ್ಥೆಯ ಸುಧಾರಣೆಯ ಪ್ರಯತ್ನಕ್ಕೆ ಕೇಂದ್ರ ಸರಕಾರ ಮುಂದಾಗಿದೆ. ಯುಜಿಸಿ ಮತ್ತು ಎಐಸಿಟಿಎ ಸಂಸ್ಥೆಗಳಲ್ಲಿ ಈಗಿರುವ ಸಿಬ್ಬಂದಿಯನ್ನು ಹೊರಗಿಟ್ಟೇ ಹೊಸ ಆಯೋಗವನ್ನು ಕಟ್ಟಬೇಕಿದೆ. ಇಲ್ಲವಾದರೆ ಸಂಸ್ಥೆಯ ಬೋರ್ಡ್‌ ಮತ್ತು ಕಟ್ಟಡ ಬದಲಾಗಬಹುದೇ ಹೊರತು ವ್ಯವಸ್ಥೆ ಹಿಂದಿನಂತೆಯೇ ಮುಂದುವರಿಯುತ್ತದೆ.