ಅಮಾನವೀಯ ಆರ್ಡರ್‌ಲಿ ಪದ್ಧತಿಗೆ ಕೋಕ್ ಕೊಟ್ಟ ಕೇರಳ: ಕರ್ನಾಟಕದ ಪೊಲೀಸ್ ಸಿಬ್ಬಂದಿಗಳ ಸ್ಥಿತಿ ಹೇಗಿದೆ?
COVER STORY

ಅಮಾನವೀಯ ಆರ್ಡರ್‌ಲಿ ಪದ್ಧತಿಗೆ ಕೋಕ್ ಕೊಟ್ಟ ಕೇರಳ: ಕರ್ನಾಟಕದ ಪೊಲೀಸ್ ಸಿಬ್ಬಂದಿಗಳ ಸ್ಥಿತಿ ಹೇಗಿದೆ?

ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ಆರ್ಡರ್‌ಲಿ ಪದ್ಧತಿಯನ್ನು ರದ್ದುಗೊಳಿಸಿದ್ದಾರೆ. ಕರ್ನಾಟಕದಲ್ಲಿ ಈ ಪದ್ಧತಿ ರದ್ದಾಗಿ ವರ್ಷವಾಗಿದೆ. ಆದರೆ ಇಲಾಖೆ ಒಳಗೆ ಪರಿಸ್ಥಿತಿ ಬದಲಾಗಿಲ್ಲ. ಬ್ರಿಟಿಷ್ ಕಾಲದ ಗುಲಾಮಿ ಸಂಸ್ಕೃತಿ ಆಚರಣೆಯಲ್ಲಿದೆ.

ಹಿರಿಯ ಪೊಲೀಸ್‌ ಅಧಿಕಾರಿಗಳಿಗೆ ವೈಯಕ್ತಿಕ ಸೇವೆಗಳನ್ನು ಸಲ್ಲಿಸಲು ಕಿರಿಯ ದರ್ಜೆಯ ಪೊಲೀಸ್ ಸಿಬ್ಬಂದಿಗಳನ್ನು ನೇಮಿಸುವ ಸಂಪ್ರದಾಯಕ್ಕೆ ಕೇರಳ ಸರಕಾರ ಅಂತ್ಯ ಹಾಡಿದೆ. ಸೋಮವಾರ ರಾಜಧಾನಿ ತಿರುವನಂತಪುರಂನಲ್ಲಿ ಸುದ್ದಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಕೇರಳದ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ಈ ಅಂಶವನ್ನು ಸ್ಪಷ್ಟಪಡಿಸಿದ್ದಾರೆ.

ಕೇರಳದ ಹೆಚ್ಚುವರಿ ಪೊಲೀಸ್‌ ಮಹಾನಿರ್ದೇಶಕರ ಮಗಳ ಕಾರನ್ನು ಚಲಾಯಿಸುತ್ತಿದ್ದ ಕಿರಿಯ ದರ್ಜೆಯ ಪೊಲೀಸ್‌ ಅಧಿಕಾರಿ ಗವಾಸ್ಕರ್‌, ಕೆಲ ದಿನಗಳ ಹಿಂದೆ ದೂರು ದಾಖಲಿಸಿದ್ದರು. ಈ ಅಂಶವನ್ನು ಮುನ್ನೆಲೆಗೆ ತಂದಿದ್ದ ಶಾಸಕ ಕೆ. ಸಬರಿನಾಥನ್‌, “ಶಿಸ್ತಿನ ಹೆಸರಿನಲ್ಲಿ ಮಾನವ ಹಕ್ಕುಗಳ ಉಲ್ಲಂಘನೆಯಾಗಲು ಸರಕಾರ ಅವಕಾಶ ಕಲ್ಪಿಸಬಾರದು,” ಎಂದಿದ್ದರು. ಈ ಹಿನ್ನೆಲೆಯಲ್ಲಿ ಕೇರಳ ಸರಕಾರ ಪೊಲೀಸ್‌ ಇಲಾಖೆಯೊಳಗಿನ ಆರ್ಡರ್‌ಲಿ ಸಿಸ್ಟಮ್‌ಗೆ ಕೊನೆ ಹಾಡಿದೆ. ಹೆಚ್ಚುವರಿ ಪೊಲೀಸ್‌ ಮಹಾನಿರ್ದೇಶಕರನ್ನು ಹುದ್ದೆಯಿಂದ ವಜಾಗೊಳಿಸಿದೆ.

ಏನಿದು ಆರ್ಡರ್‌ಲಿ ಸಿಸ್ಟಮ್‌?:

ಸಾಂದರ್ಭಿಕ ಚಿತ್ರ.
ಸಾಂದರ್ಭಿಕ ಚಿತ್ರ.

ಆರ್ಡರ್‌ಲಿ ಸಿಸ್ಟಮ್‌ ಎನ್ನುವುದು 19ನೇ ಶತಮಾನದಲ್ಲಿ ಪೊಲೀಸ್‌ ವ್ಯವಸ್ಥೆಯಲ್ಲಿ ಬ್ರಿಟೀಷರು ಜಾರಿ ತಂದ ಪದ್ಧತಿ. ಪೊಲೀಸ್‌ ಪೇದೆಗಳು ಹಿರಿಯ ಪೊಲೀಸ್‌ ಅಧಿಕಾರಿಗಳಿಗೆ ತೀರಾ ವೈಯಕ್ತಿಕ ಮಟ್ಟದಲ್ಲಿ ಸಹಾಯಕ್ಕೆ ನೇಮಗೊಳ್ಳುತ್ತಾರೆ. ಪ್ರಾರಂಭದಲ್ಲಿ ಬ್ರಿಟಿಷರು ಈ ಪದ್ಧತಿಯನ್ನು ಜಾರಿಗೆ ತಂದಾಗ ಪೊಲೀಸ್‌ ಪೇದೆಗಳು ಅಧಿಕಾರಿಗಳಿಗೆ ಬರುವ ಕೆರೆಗಳನ್ನು ಸ್ವೀಕರಿಸಿ ಉತ್ತರಿಸುವುದು, ತುರ್ತು ಸಂದೇಶಗಳನ್ನು ರವಾನಿಸುವುದು, ವಿದೇಶಕ್ಕೆ ತೆರಳಿದಾಗ ಸಹಾಯಕ್ಕೆಂದು ಜತೆಗೆ ತೆರಳುವುದು, ಅಧಿಕಾರಿಗಳು ಕೆಲಸದ ಮಧ್ಯೆ ಮಾಡುವ ಸಣ್ಣ ಪುಟ್ಟ ತಪ್ಪುಗಳನ್ನು ಸರಿಪಡಿಸುವುದು ಇತ್ಯಾದಿ ಕೆಲಸಗಳನ್ನು ನಿರ್ವಹಿಸಬೇಕಿತ್ತು. ಆದರೆ ಪೇದೆಗಳ ಕೆಲಸ ಇಷ್ಟಕ್ಕೆ ಸೀಮಿತವಾಗದೇ, ಅಧಿಕಾರಿಗಳ ವೈಯಕ್ತಿಕ ಕೆಲಸಗಳನ್ನೂ ಕೂಡ ಆರ್ಡರ್‌ಲಿ ಸಿಸ್ಟಮ್‌ ಅಡಿಯಲ್ಲಿ ನೇಮಕಗೊಂಡ ಪೇದೆಗಳು ನಿರ್ವಹಿಸಬೇಕಾಯಿತು.

ಬ್ರಿಟೀಷರು ತಂದ ಈ ಪದ್ಧತಿ ಸ್ವತಂತ್ರ ಭಾರತದಲ್ಲೂ ಕೂಡ ಮುಂದುವರೆಯಿತು. ಕರ್ನಾಟಕ, ಆಂಧ್ರ ಪ್ರದೇಶ, ಕೇರಳ ಸೇರಿದಂತೆ ಇನ್ನೂ ಅನೇಕ ರಾಜ್ಯಗಳು ಈ ಪದ್ಧತಿಯನ್ನು ಕೈಬಿಟ್ಟಿರಲಿಲ್ಲ.

ಪೊಲೀಸ್‌ ಮಹಾನಿರ್ದೇಶಕರು ಮತ್ತು ಹೆಚ್ಚುವರಿ ಮಹಾನಿರ್ದೇಶಕ ದರ್ಜೆಯ ಅಧಿಕಾರಿಗಳು ಈ ಪದ್ದತಿಯ ಅಡಿಯಲ್ಲಿ 6 ಜನ ಸೇವಕರನ್ನು ಪಡೆದುಕೊಳ್ಳುತ್ತಿದ್ದರು. ಐಜಿಪಿ ದರ್ಜೆಯ ಅಧಿಕಾರಿಗಳಿಗೆ 4 ಜನ ಸೇವಕರು ದೊರೆಯುತ್ತಿದ್ದರು. ಡಿಐಜಿ ದರ್ಜೆಯ ಅಧಿಕಾರಿಗಳಿಗೆ ಮೂರು ಜನ ಸೇವಕರು, ಉಪ ಪೊಲೀಸ್‌ ಅಧೀಕ್ಷಕರಿಗೆ ಇಬ್ಬರು ಮತ್ತು ಇವರಡಿಯಲ್ಲಿ ಬರುವ ಪೊಲೀಸ್‌ ಅಧಿಕಾರಿಗಳಿಗೆ ಒಬ್ಬ ಪೇದೆ ಸೇವಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದರು. ಆರ್ಡರ್‌ಲಿ ಪದ್ಧತಿಯಡಿಯಲ್ಲಿ ನೇಮಕಗೊಂಡವರೆಲ್ಲರೂ ಕೂಡ ಪೊಲೀಸ್‌ ಕೆಲಸಕ್ಕೆಂದೇ ಸೇರಿ, ಎಲ್ಲಾ ತರಭೇತಿಗಳನ್ನು ಪಡೆದವರೇ ಆಗಿರುತ್ತಾರೆ.

ದಿನಕಳೆದಂತೆ ಅಧಿಕಾರಿಗಳ ಕೆಲಸವನ್ನು ಮಾಡುತ್ತಿದ್ದ ಆರ್ಡರ್‌ಲಿ ಪೊಲೀಸರು, ಅಧಿಕಾರಿಗಳ ಮನೆಗೆಲಸವನ್ನೂ ಕೂಡ ಮಾಡಬೇಕಾಯಿತು. ಅಡುಗೆ ಮಾಡುವುದು, ಬಟ್ಟೆ ಒಗೆಯುವುದು, ಅಧಿಕಾರಿಯ ಮಕ್ಕಳನ್ನು ಸ್ಕೂಲಿಗೆ ಬಿಡುವುದು, ಅಧಿಕಾರಿಗಳ ಮನೆಗೆ ಬೇಕಾದ ತರಕಾರಿಗಳನ್ನು ತರುವುದು, ಹೀಗೆ ಎಲ್ಲಾ ಕೆಲಸವನ್ನು ಮಾಡಬೇಕಾಯಿತು. ಪೊಲೀಸ್‌ ಪೇದೆಗಳು ಹಿರಿಯ ಅಧಿಕಾರಿಗಳ ಗುಲಾಮರಾದರು.

ಗುಲಾಮಗಿರಿ ಅಂತ್ಯ?:

ಸಾಂದರ್ಭಿಕ ಚಿತ್ರ.
ಸಾಂದರ್ಭಿಕ ಚಿತ್ರ.

ಪೊಲೀಸ್‌ ಇಲಾಖೆಯಲ್ಲಿ ನಡೆಯುತ್ತಿದ್ದ ಈ ಗುಲಾಮಗಿರಿಯ ವಿರುದ್ಧ 21ನೇ ಶತಮಾನದ ಆರಂಭದಲ್ಲಿಯೇ ಹೋರಾಟ ಶುರುವಾಗಿತ್ತು. ಇಡೀ ದೇಶದ ತುಂಬಾ ಪೊಲೀಸ್‌ ಗುಲಾಮಗಿರಿಯ ವಿರುದ್ಧ ದನಿಯೆದ್ದಿತ್ತು. 2005ರ ಎರಡನೇ ಆಡಳಿತ ಸುಧಾರಣಾ ಆಯೋಗ ಮತ್ತು 2008ರ 6ನೇ ವೇತನ ಆಯೋಗ ಈ ಆರ್ಡರ್‌ಲಿ ಪದ್ಧತಿಯನ್ನು ತೆಗೆದುಹಾಕುವಂತೆ ಸೂಚಿಸಿದ್ದವು. ಈ ವೇಳೆಗಾಗಲೇ ವಾಯು ದಳ ಮತ್ತು ನೌಕಾದಳಗಳಲ್ಲಿ ಆರ್ಡರ್‌ಲಿ ಪದ್ಧತಿ ರದ್ದಾಗಿತ್ತು. ಆದರೆ ಭೂಸೇನೆ ಮತ್ತು ಪೊಲೀಸ್‌ ಇಲಾಖೆಗಳು ಮಾತ್ರ ಈ ಪದ್ಧತಿಯನ್ನು ಮುಂದುವರೆಸಿಕೊಂಡು ಸಾಗಿದ್ದವು.

2009ರಲ್ಲಿ ಆಂಧ್ರ ಪ್ರದೇಶದ ಪೊಲೀಸ್‌ ಮಹಾನಿರ್ದೇಶಕರ ಬಳಿ ಆರ್ಡರ್‌ಲಿ ಪದ್ಧತಿಯ ಅಡಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಕಾನ್‌ಸ್ಟೆಬಲ್‌ ಮುರುಳಿನಾಥ್‌ ಅನುಮಾನಾಸ್ಪದವಾಗಿ ಸಾವನ್ನಪ್ಪಿದ್ದರು. ಈ ಸಾವಿನ ಬಿಸಿ ಸರಕಾರಕ್ಕೂ ಕೂಡ ತಟ್ಟಿತ್ತು. ಪರಿಣಾಮವಾಗಿ ಮೊದಲ ಬಾರಿಗೆ ಆಂಧ್ರ ಪ್ರದೇಶದಲ್ಲಿ ಆರ್ಡರ್‌ಲಿ ಪದ್ಧತಿ ಕೊನೆಯಾಯಿತು.

2013ರಲ್ಲಿ ಕೇಂದ್ರ ಗೃಹ ಸಚಿವರ ಅಡಿಯಲ್ಲಿ ಸಮಿತಿಯೊಂದು ಸಿದ್ಧವಾಗಿ, ಪೊಲೀಸ್‌ ಅಧಿಕಾರಿಗಳಿಗೆ ಕೆಲವು ನಿರ್ದೇಶನಗಳನ್ನೂ ಕೂಡ ನೀಡಿತ್ತು. ದೇಶದ ಸರಿಸುಮಾರು 5 ಲಕ್ಷದಷ್ಟು ಪೊಲೀಸರ ಕೊರತೆಯನ್ನು ಎದುರಿಸುತ್ತಿದೆ ಎಂದಿದ್ದ ಸಮಿತಿ, ಯಾವ ಅಧಿಕಾರಿಗಳೂ ಕೂಡ ಪೊಲೀಸ್‌ ಪೇದೆಗಳ ಬಳಿ ತಮ್ಮ ಮನೆಗೆಲಸವನ್ನು ಮಾಡಿಸುವಂತಿಲ್ಲ ಎಂದು ನಿರ್ದೇಶಿಸಿತ್ತು.

ಅದ್ಯಾಗೂ ಕೂಡ ಪೇದೆಗಳ ಕಷ್ಟ ತಪ್ಪಿರಲಿಲ್ಲ. ಆರ್ಡರ್‌ಲಿ ಪದ್ಧತಿಯ ಮೇಲೆ ಕೆಲವು ಹಿರಿಯ ಅಧಿಕಾರಿಗಳು ಅವಲಂಭನೆ ಇತ್ತು. ಕೆಲವು ರಾಜ್ಯ ಸರಕಾರಗಳು ಪೊಲೀಸ್‌ ಪೇದೆಗಳ ಬದಲಾಗಿ ಬೇರೆ ವ್ಯಕ್ತಿಗಳನ್ನು ನೇಮಿಸಿಕೊಳ್ಳಲು ಅಧಿಕಾರಿಗಳಿಗೆ ಹೆಚ್ಚುವರಿ ಭತ್ಯೆ ನೀಡಿದವು. ಏನೇ ನಿರ್ದೇಶನಗಳು ದೊರೆತರೂ ಕೂಡ ದೇಶದ ಇನ್ನೂ ಕೆಲವೆಡೆಗಳಲ್ಲಿ ಆರ್ಡರ್ಲಿ ಪದ್ಧತಿ ಮುಂದುುವರೆಯುತ್ತಲೇ ಇದೆ.

ರಾಜ್ಯದಲ್ಲಿ ಆರ್ಡರ್ಲಿ ಪದ್ಧತಿ ರದ್ದಾಗಿರುವುದು ಕಾಗದದ ಮೇಲಷ್ಟೆ ಇದೆ. ಐಪಿಎಸ್ ಅಧಿಕಾರಿಗಳು, ರಾಜಕಾರಣಿಗಳ ಮನೆಯಲ್ಲಿ ಗುಲಾಮಗಿರಿ ನಡೆಸುತ್ತಿರುವ 1900 ಸಿಬ್ಬಂದಿಗಳ ಮಾಹಿತಿ ನನ್ನ ಬಳಿ ಇದೆ. ಕೇಂದ್ರ ಸರಕಾರ 2013ರಲ್ಲಿಯೇ ಆರ್ಡರ್ಲಿ ಪದ್ಧತಿ ರದ್ಧು ಮಾಡುವಂತೆ ಆದೇಶಿಸಿದೆ. ಅದಕ್ಕೆ ರಾಜ್ಯ ಸರಕಾರ ಅಥವಾ ಅಧಿಕಾರಿಗಳು ಯಾವ ಕಿಮ್ಮತ್ತನ್ನೂ ಈವರೆಗೆ ನೀಡಿಲ್ಲ. 
ಶಶಿಧರ್ ವೇಣುಗೋಪಾಲ್, ಅಖಿಲ ಕರ್ನಾಟಕ ಪೊಲೀಸ್ ಮಹಾಸಂಘ. 

ಕರ್ನಾಟಕ ಪೊಲೀಸರ ಸಾಮೂಹಿಕ ಹೋರಾಟ:

ಸಾಂದರ್ಭಿಕ ಚಿತ್ರ.
ಸಾಂದರ್ಭಿಕ ಚಿತ್ರ.

ಕರ್ನಾಟಕ ರಾಜ್ಯ 2017ರ ಜೂನ್ ತಿಂಗಳಲ್ಲಿ ಸಾಮೂಹಿಕ ಹೋರಾಟವೊಂದಕ್ಕೆ ಸಜ್ಜಾಗಿತ್ತು. ಶಿಸ್ತಿಗೆ ಹೆಸರಾಗಿರುವ ಪೊಲೀಸ್‌ ಇಲಾಖೆಯ ಸಿಬ್ಬಂದಿಗಳು ಬೀದಿಗಳಿದು ಹೋರಾಟ ಮಾಡಲು ಸಾಧ್ಯವಿರಲಿಲ್ಲ. ಹಾಗಾಗಿ ಹೊಸ ಮಾದರಿಯ ಹೋರಾಟಕ್ಕೆ ಪೊಲೀಸರು ಸಜ್ಜಾಗಿದ್ದರು.

‘ಅಖಿಲ ಕರ್ನಾಟಕ ಪೊಲೀಸರ ಮಹಾಸಂಘ’ದ ಹೆಸರಿನಲ್ಲಿ ಎಲ್ಲಾ ಸುದ್ದಿ ಸಂಸ್ಥೆಗಳಿಗೆ ಪತ್ರ ಬಂದಿತ್ತು. ಜೂನ್‌ 4ರಂದು ರಾಜ್ಯ ಪೊಲಿಸರು ಸಾಮಾಹಿಕವಾಗಿ ರಜೆ ಪಡೆದುಕೊಳ್ಳುವುದರ ಮೂಲಕ ಹೋರಾಟ ನಡೆಸುತ್ತೇವೆ ಎಂದು ಪತ್ರ ತಿಳಿಸಿತ್ತು. ಕೆಲವು ಪೊಲೀಸ್‌ ಅಧಿಕಾರಿಗಳು ಜೂನ್‌ 4ರಂದು ರಜೆ ಪಡೆಯುತ್ತೇವೆ ಎಂದು ಇಲಾಖೆಗೆ ಪತ್ರವನ್ನೂ ಕೂಡ ನೀಡಿದ್ದಾಗಿತ್ತು. ಪೊಲೀಸರ ಈ ಸಾಮೂಹಿಕ ರಜೆ ಹೊರಾಟ ಪೊಲೀಸ್‌ ಇಲಾಖೆಯ ಜತೆ ರಾಜ್ಯ ಸರಕಾರಕ್ಕೂ ಚಿಂತೆಯ ಗೆರೆಗಳನ್ನು ಮೂಡಿಸಿತ್ತು.

ಈ ಹೋರಾಟವನ್ನು ರೂಪಿಸಿದ ಅಖಿಲ ಕರ್ನಾಟಕ ಪೊಲಿಸ್‌ ಮಹಾಸಂಘದ ಜತೆಗೆ ಇರದಿದ್ದ ಪೊಲೀಸ್‌ ಅಧಿಕಾರಿಗಳೂ ಕೂಡ ರಜೆ ಹಾಕಲು ಮುಂದಾಗಿದ್ದರು. ಸಂಘಟನೆಯ ಅಧ್ಯಕ್ಷ ಶಶಿಧರ್‌ ವೇಣುಗೋಪಾಲ್‌ರ ಪರಿಚಯವೇ ಇರದಿದ್ದ ಪೊಲಿಸರು ತಮ್ಮ ಹಕ್ಕುಗಳನ್ನು ಪಡೆಯುವ ಸಲುವಾಗಿ ಹೋರಾಟಕ್ಕೆ ಸಿದ್ಧವಾಗಿದ್ದರು. ಸಂಘಟನೆ ಕೇವಲ ಸಾಂಕೇತಿಕವಾಗಿ ಮುಂದೆ ನಿಂತಿತ್ತು.

ಪೊಲೀಸರ ಈ ಹೋರಾಟದ ಮಾಹಿತಿ ಹೆಚ್ಚಿನ ಸಂಖ್ಯೆಯ ಪೊಲೀಸರಿಗೆ ತಿಳಿದ್ದಿದ್ದು ವಾಟ್ಸ್‌ಆಪ್‌, ಫೇಸ್‌ಬುಕ್‌ನಂತಹ ಸಾಮಾಜಿಕ ಜಾಲತಾಣಗಳಿಂದ. ಆರ್ಡರ್‌ಲಿ ಪದ್ಧತಿ ಸೇರಿದಂತೆ, ಕಡಿಮೆ ವೇತನ, ರಜೆಗಳೇ ಇಲ್ಲದೆ ಸತತ ದುಡಿಮೆ, ನಿಗದಿತ ಸಮಯಕ್ಕಿಂತಲೂ ಹೆಚ್ಚಿನ ಕಾಲ ಕೆಲಸ ನಿರ್ವಹಿಸುವುದು ಹೀಗೆ ಹಲವಾರು ಸಮಸ್ಯೆಗಳು ಒಟ್ಟಾಗಿ ಸ್ಪೋಟಗೊಂಡಿದ್ದವು. ಈ ಹೋರಾಟದ ಸಂಘಟನಾಕಾರರು ಈ ಪ್ರತಿಭಟನೆಯನ್ನು ‘ಸಿಪಾಯಿ ದಂಗೆ’ ಕರೆದಿದ್ದರು.

ಕರ್ನಾಟಕ ಪೊಲೀಸ್ ಇಲಾಖೆಯ ಪ್ರಮುಖ ಸಮಸ್ಯೆಗಳಲ್ಲಿ ಸಿಬ್ಬಂದಿ ಕೊರತೆಯೂ ಒಂದಾಗಿತ್ತು. ಇಲಾಖೆಗೆ ಒಟ್ಟು 80 ಸಾವಿರ ಹುದ್ದೆಗಳ ಅವಕಾಶ ನೀಡಿಲಾಗಿತ್ತಾದರೂ, ಅಧಿಕಾರಿಗಳು ಹಾಗೂ ಸಿಬ್ಬಂದಿಗಳು ಸೇರಿ 68 ಸಾವಿರ ಸಂಖ್ಯಾ ಬಲವಷ್ಟೇ ಇತ್ತು. ಅಂದರೆ ರಾಜ್ಯದ ಪ್ರತಿ 1 ಲಕ್ಷ ಜನರಿಗೆ ಇರುವ ಪೊಲೀಸರ ಸಂಖ್ಯೆ ಕೇವಲ 104. ಬಿಪಿಆರ್ ಅಂಡ್ ಡಿ ಹೇಳುವ ಪ್ರಕಾರ ಪ್ರತಿ ಲಕ್ಷ ಜನಸಂಖ್ಯೆಗೆ ಕನಿಷ್ಟ 170 ಪೊಲೀಸರು ಇರಬೇಕು.

ಕಡಿಮೆ ಸಿಬ್ಬಂದಿಗಳಲ್ಲಿಯೇ ವಿಧಾನಸೌಧ, ರಾಜಭವನ ಸೇರಿದಂತೆ ಪ್ರಮುಖ ವ್ಯಕ್ತಿಗಳ, ಸ್ಥಳಗಳ ಕಾವಲು, ಮೀಸಲು ಪಡೆ, ಸಂಚಾರಿ ಪೊಲೀಸರು, ಹಿರಿಯ ಅಧಿಕಾರಿಗಳ ಮನೆಯಲ್ಲಿ ಆರ್ಡರ್ಲಿಗಳಾಗಿ ಒಂದಷ್ಟು ಜನರನ್ನು ನೇಮಿಸಲಾಗಿತ್ತು. ಕಾನೂನು ಸುವ್ಯವಸ್ಥೆಯನ್ನು ಕಾಪಾಡಲು ಇರುವ ಪೊಲೀಸರು ತಳಮಟ್ಟದಲ್ಲಿ ಹರಸಾಹಸ ಪಡುವ ಪರಿಸ್ಥಿತಿ ನಿರ್ಮಾಣವಾಗಿತ್ತು.

ಪೊಲೀಸರ ಈ ವಿನೂತನ ಪ್ರತಿಭಟನೆಯನ್ನು ತಡೆಯಲು ಇಲಾಖೆಯ ಹಿರಿಯ ಅಧಿಕಾರಿಗಳು ಸೇರಿದಂತೆ ಸರಕಾರವೂ ಕೂಡ ಶ್ರಮಪಟ್ಟಿತ್ತು. ಜೂನ್‌ 3ರಂದು ಗೃಹಸಚಿವರಾಗಿದ್ದ ಪರಮೇಶ್ವರ್‌ ತಾವೇ ಎಲ್ಲಾ ಪೊಲೀಸರ ಮೊಬೈಲ್‌ ಸಂಖ್ಯೆಗಳಿಗೆ ಆಶ್ವಾಸನೆ ಸಂದೇಶವನ್ನು ಕಳುಹಿಸಿದ್ದರು. ಇನ್ನೊಂದೆಡೆ ಹಿರಿಯ ಅಧಿಕಾರಿಗಳು ಪೊಲೀಸ್‌ ಕ್ವಾಟ್ರಸ್‌ಗಳಿಗೆ ಪದೇ ಪದೇ ಭೇಟಿ ನೀಡಿ ಮನವೊಲಿಸುವ ಪ್ರಯತ್ನ ಮಾಡಿದ್ದರು. ಅಖಿಲ ಕರ್ನಾಟಕ ಪೊಲೀಸ್‌ ಮಹಾಸಂಘದ ಅಧ್ಯಕ್ಷ ಶಶಿಧರ್‌ ವೇಣುಗೋಪಾಲ್‌ರನ್ನು ಬಂಧಿಸಲಾಗಿತ್ತು. ಪೊಲೀಸರ ಪ್ರತಿಭಟನೆಗೆ ಕುಮ್ಮಕ್ಕು ನೀಡುವ ಸಂಘಟನೆಗಳ ವಿರುದ್ಧ ಕಠಿಣ ಕಾನೂನು ಕ್ರಮಗಳನ್ನು ಕೈಗೊಳ್ಳುವುದಾಗಿ ಸೂಚಿಸಿತ್ತು. ಇಷ್ಟೆಲ್ಲಾ ಕಸರತ್ತುಗಳು ನಡೆದ ನಂತರ ಪೊಲೀಸರು ಸ್ವಲ್ಪ ಮೆದುವಾಗಿದ್ದರು. ಜೂನ್‌ 4ರ ಶನಿವಾರದಂದು ಬಹುಪಾಲು ಪೊಲೀಸರು ಹಾಜಾರಾಗಿದ್ದರು.

ಇದಕ್ಕೂ ಮುಂಚೆ ಕೂಡ ಕರ್ನಾಟಕದಲ್ಲಿ ಆರ್ಡರ್‌ಲಿ ಪದ್ಧತಿಯ ವಿರುದ್ಧ ದನಿ ಎದ್ದಿತ್ತು. 2016ರ ನವೆಂಬರ್‌ ತಿಂಗಳಿನಲ್ಲಿಯೇ ಅಂದಿನ ಗೃಹಮಂತ್ರಿ ಡಾ. ಜಿ. ಪರಮೇಶ್ವರ್‌ ಅರ್ಡರ್‌ಲಿ ಪದ್ಧತಿಯನ್ನು ನಿಲ್ಲಿಸಿದ್ದರು. ಪೊಲೀಸ್‌ ಅಧಿಕಾರಿಗಳಿಗೆ ಇದರ ಬದಲಾಗಿ ವಿಶೇಷ ಭತ್ಯೆಗಳನ್ನು ನೀಡಲು ನಿರ್ಧರಿಸಿದ್ದರು. 2017ರ ಮಾರ್ಚ್‌ ತಿಂಗಳಿನಲ್ಲಿ ಈ ಕುರಿತಾದಂತೆ ಅಧಿಕೃತ ಆದೇಶ ಹೊರಬಿದ್ದಿತ್ತು.

ಪೊಲೀಸ್‌ ಇಲಾಖೆಯಲ್ಲಿ ಡಿ ಗ್ರೂಪ್ ನೌಕರರನ್ನು ನೇಮಿಸಿಕೊಳ್ಳಲು ಅವಕಾಶ ಇರಲಿಲ್ಲ. ಈ ನೌಕರರ ಬದಲಾಗಿ ಕೆಳ ದರ್ಜೆಯ ಪೊಲೀಸರನ್ನು ಆರ್ಡರ್‌ಲಿಗಳಾಗಿ ಬಳಸಿಕೊಳ್ಳಲಾಗುತ್ತಿತ್ತು. ಪೊಲೀಸರನ್ನು ನೇಮಕ ಮಾಡಿಕೊಳ್ಳುವುದು ಜನರ ಸೇವೆಯನ್ನು ಮಾಡುವುದಕ್ಕಾಗಿ. ಹಿರಿಯ ಅಧಿಕಾರಿಗಳ ಮನೆಗೆಲಸಗಳನ್ನು ಮಾಡುವುದಕ್ಕಲ್ಲ. ಹೀಗಾಗಿ ಆರ್ಡರ್‌ಲಿ ಪದ್ಧತಿ ಎನ್ನುವುದು ಅಮಾನವೀಯವಾದದ್ದು. ಅದನ್ನು ನಿಲ್ಲಿಸಬೇಕು ಎಂದು ಸರಕಾರಕ್ಕೆ ಆಗ್ರಹಿಸಿದ್ದೆವು. ಸರಕಾರವೂ ಇದಕ್ಕೆ ಒಪ್ಪಿಕೊಂಡು, ಪೇದೆಗಳ ಬದಲಾಗಿ ಡಿಗ್ರೂಪ್‌ ನೌಕರರನ್ನು ಕೆಲಸಗಳಿಗೆ ನೇಮಿಸಿಕೊಳ್ಳುವುದಾಗಿ ಸರಕಾರ ತಿಳಿಸಿತ್ತು.
ಗುರುಪಾದಯ್ಯ, ಪೊಲೀಸ್‌ ಸಮಸ್ಯೆಗಳ ಕುರಿತು ಹೋರಾಟ ನಡೆಸಿ ಜೈಲು ಪಾಲಾದವರು. 

ಆದರೆ ಕರ್ನಾಟಕದಲ್ಲಿ ಆರ್ಡರ್‌ಲಿ ಪದ್ಧತಿಯ ನಿಷೇಧವಾಗಿ ವರ್ಷ ಕಳೆದರೂ ಕೂಡ ಕೇವಲ ಕಾಗದ ಪತ್ರಗಳಿಗೆ ಮಾತ್ರ ಸೀಮಿತವಾಗಿದೆ. ಆರ್ಡರ್‌ಲಿಗಳಾಗಿ ಕೆಲಸ ನಿರ್ವಹಿಸುತ್ತಿರುವ ಪೊಲೀಸರನ್ನು ಬಿಡುಗಡೆಗೊಳಿಸಿ ಅವರ ಜಾಗಕ್ಕೆ ಡಿ ಗ್ರೂಪ್‌ ಕಾರ್ಮಿಕರನ್ನು ಕೆಲಸಕ್ಕೆ ನೇಮಿಸಿಕೊಳ್ಳುವ ಕಾರ್ಯ ವರ್ಷವಾದರೂ ನೆರವೇರಿಲ್ಲ.

2016ರಲ್ಲಿ ಗೃಹಮಂತ್ರಿ ಜಿ.ಪರಮೇಶ್ವರ್‌ ನೀಡಿದ ಆಶ್ವಾಸನೆಗಳು ಬಹುಪಾಲು ಅಶ್ವಾಸನೆಗಳಾಗಿಯೇ ಉಳಿದಿಕೊಂಡಿವೆ. ಇತ್ತೀಚಿಗಷ್ಟೇ ಅಖಿಲ ಕರ್ನಾಟಕ ಪೊಲಿಸ್‌ ಮಹಾಸಂಘದ ಅಧ್ಯಕ್ಷ ಶಶಿಧರ್‌ ವೇಣುಗೋಪಾಲ್‌ ಈ ಕುರಿತು ಸರಕಾರವನ್ನು ಎಚ್ಚರಿಸಿದ್ದಾರೆ. ಗೃಹಮಂತ್ರಿಗಳಿಗೆ ಪತ್ರ ಕಳುಹಿಸಿರುವ ಶಶಿಧರ್‌, ಸರಕಾರ ತಾನು ನೀಡಿದ ವಾಗ್ದಾನಗಳನ್ನು ಈಡೇರಿಸದ ಕಾರಣ ಪೊಲೀಸರ ಸಹನೆಯ ಕಟ್ಟೆ ಒಡೆಯುತ್ತಿದೆ ಎಂದಿದ್ದದಾರೆ. ಈ ಪತ್ರವನ್ನು ತಮ್ಮ ಫೇಸ್‌ಬುಕ್‌ ಖಾತೆಯಲ್ಲೂ ಕೂಡ ಪ್ರಕಟಿಸಿದ್ದಾರೆ.

ಶಶಿಧರ್ ವೇಣುಗೋಪಾಲ್ ಬರೆದ ಪತ್ರ. 
ಶಶಿಧರ್ ವೇಣುಗೋಪಾಲ್ ಬರೆದ ಪತ್ರ. 

ಸರಕಾರ ಮತ್ತು ಉನ್ನತ ಅಧಿಕಾರಿಗಳ ಮಾತುಗಳ ಮೇಲಿನ ವಿಶ್ವಾಸದಿಂದಾಗಿ ಕರ್ನಾಟಕ ಪೊಲೀಸರು ತಮ್ಮ ವಿನೂತನ ಪ್ರತಿಭಟನೆಯಿಂದ ಹಿಂದೆ ಸರಿದಿದ್ದರು. ಆದರೆ ಸರಕಾರ ಭರವಸೆಗಳನ್ನು ನೀಡಿ 2 ವರ್ಷ ಕಳೆದರೂ ಕೂಡ ನೆರವೇರಿಲ್ಲ. ಆರ್ಡರ್‌ಲಿ ಪದ್ಧತಿ ಕೇವಲ ಕಾಗದಗಳ ಮೇಲಷ್ಟೇ ನಿಷೇಧಕ್ಕೆ ಒಳಪಟ್ಟಿದೆ. ಕೇರಳ ಸರಕಾರ ಆರ್ಡರ್‌ಲಿ ಪದ್ಧತಿಯನ್ನು ನಿಷೇಧಿಸಿರುವ ನಂತರವಾದರೂ ಕೂಡ ಕರ್ನಾಟಕ ಸರಕಾರ ತಾನು ನೀಡಿದ ವಾಗ್ದಾನವನ್ನು ನೆನಪಿಸಿಕೊಳ್ಳಬೇಕಿದೆ. ಈ ನಿಟ್ಟಿನಲ್ಲಿ ನೂತನ ಸಮ್ಮಿಶ್ರ ಸರಕಾರ ಗಮನ ಹರಿಸಬೇಕಿದೆ.

ಈಗಾಗಲೇ ಹಿರಿಯ ಪೊಲೀಸ್ ಅಧಿಕಾರಿಗಳ ಸಭೆಯನ್ನು ಸಿಎಂ ಕುಮಾರಸ್ವಾಮಿ ನಡೆಸಿದ್ದಾರೆ. ಅದೇ ವೇಳೆಗೆ ಇಲಾಖೆಯಲ್ಲಿ ದುಡಿಯುತ್ತಿರುವ ಕೆಳಹಂತದ ಸಿಬ್ಬಂದಿಗಳ ದುಮ್ಮಾನಗಳನ್ನೂ ಆಲಿಸುವ ಮನಸ್ಸು ಮಾಡಬೇಕಿದೆ.