ಲಕ್ಷಕ್ಕೆ ‘ಕೆಜಿ’ ಎಂಬ ಕೋಡ್‌ವರ್ಡ್‌ ಬಳಸುತ್ತಿದ್ದ ಸಚಿವ ಡಿಕೆಎಸ್‌: ಐಟಿ ಆರೋಪಗಳ ಫುಲ್‌ ಡೀಟೆಲ್ಸ್‌
COVER STORY

ಲಕ್ಷಕ್ಕೆ ‘ಕೆಜಿ’ ಎಂಬ ಕೋಡ್‌ವರ್ಡ್‌ ಬಳಸುತ್ತಿದ್ದ ಸಚಿವ ಡಿಕೆಎಸ್‌: ಐಟಿ ಆರೋಪಗಳ ಫುಲ್‌ ಡೀಟೆಲ್ಸ್‌

ಸಚಿವ ಡಿ. ಕೆ. ಶಿವಕುಮಾರ್‌ ಮತ್ತು ಅವರ ಆಪ್ತರ ವಿರುದ್ಧ ಆದಾಯ ತೆರಿಗೆ ಇಲಾಖೆ ಆರ್ಥಿಕ ಅಪರಾಧಗಳ ವಿಶೇಷ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಿದೆ. ಒಂದು ವೇಳೆ ಆರೋಪ ಸಾಬೀತಾದರೆ ಡಿಕೆಶಿ ಜೀವಾವಧಿ ಶಿಕ್ಷೆಗೂ ಗುರಿಯಾಗಬಹುದು.

Summary

ಹಣಕಾಸಿನ ವರ್ಗಾವಣೆಗೆ ಈ ಆರೋಪಿಗಳು ‘ಕೆಜಿ’ ಎಂಬ ಕೋಡ್‌ ವರ್ಡ್‌ ಬಳಸುತ್ತಿದ್ದರು ಎಂದು ಅಧಿಕಾರಿಗಳು ಹೇಳಿದ್ದಾರೆ. ಒಂದು ಲಕ್ಷ ರೂಪಾಯಿಗೆ ಒಂದು ಕೆಜಿ ಎಂದು ಕೋಡ್‌ ವರ್ಡ್‌ ಬಳಸಲಾಗುತ್ತಿತ್ತು. ಎಷ್ಟು ಲಕ್ಷದ ವರ್ಗಾವಣೆ ನಡೆಯುತ್ತಿತ್ತೋ ಅಷ್ಟು ಕೆಜಿ ಎಂದು ಈ ಆರೋಪಿಗಳು ಕೋಡ್‌ ವರ್ಡ್‌ನಲ್ಲಿ ವ್ಯವಹರಿಸುತ್ತಿದ್ದರು ಎಂದು ಅಧಿಕಾರಿಗಳು ದೂರಿದ್ದಾರೆ. ದೂರಿನ ಪೂರ್ಣ ಪ್ರತಿ ವರದಿಯ ಕೊನೆಯಲ್ಲಿದೆ; ಆಸಕ್ತರ ಗಮನಕ್ಕೆ.

ತೆರಿಗೆ ವಂಚನೆ, ಅಕ್ರಮ ಹಣ ಸಾಗಣೆ, ಅಕ್ರಮ ಹಣ ದಾಸ್ತಾನು ಹಾಗೂ ಸುಳ್ಳು ಲೆಕ್ಕಪತ್ರಗಳನ್ನು ನೀಡಿರುವ ಆರೋಪಕ್ಕೆ ಸಂಬಂಧಿಸಿದಂತೆ ವೈದ್ಯಕೀಯ ಶಿಕ್ಷಣ ಸಚಿವ ಡಿ.ಕೆ. ಶಿವಕುಮಾರ್‌ ಮತ್ತು ಅವರ 4 ಮಂದಿ ಆಪ್ತರ ವಿರುದ್ಧ ಬೆಂಗಳೂರಿನ ಆರ್ಥಿಕ ಅಪರಾಧಗಳ ವಿಶೇಷ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಾಗಿದೆ.

ಡಿ. ಕೆ. ಶಿವಕುಮಾರ್‌ ಮತ್ತು ಅವರ ಆಪ್ತರಾದ ಸಚಿನ್‌ ನಾರಾಯಣ್, ಸುನಿಲ್‌ ಕುಮಾರ್‌ ಶರ್ಮಾ, ಆಂಜನೇಯ ಹನುಮಂತಯ್ಯ ಮತ್ತು ಎನ್‌. ರಾಜೇಂದ್ರ ವಿರುದ್ಧ ತೆರಿಗೆ ವಂಚನೆ ಹಾಗೂ ಆರ್ಥಿಕ ಅಪರಾಧದ ಪ್ರಕರಣ ದಾಖಲಿಸಲಾಗಿದೆ.

ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು 2017ರ ಆಗಸ್ಟ್‌ 2 ಮತ್ತು 30ರಂದು ದೆಹಲಿಯಲ್ಲಿರುವ ಡಿ.ಕೆ.ಶಿವಕುಮಾರ್‌ ಮತ್ತು ಅವರ ಆಪ್ತರ ಮನೆಗಳ ಮೇಲೆ ದಾಳಿ ಮಾಡಿದ್ದರು. ಈ ವೇಳೆ ನವದೆಹಲಿಯ ಕೆ.ಆರ್‌.ಪುರಂನ ಕರ್ನಾಟಕ ಸರಕಾರದ ಅಧಿಕಾರಿಗಳ ವಸತಿ ಗೃಹದ ಫ್ಲ್ಯಾಟ್‌ ನಂಬರ್‌ 1 ಮತ್ತು ಸಫ್ದರ್ ಜಂಗ್‌ ಎನ್‌ಕ್ಲೇವ್‌ ಅಪಾರ್ಟ್‌ಮೆಂಟ್‌ನ 3 ಫ್ಲ್ಯಾಟ್‌ಗಳಲ್ಲಿ ಒಟ್ಟು 8.59 ಕೋಟಿ (8,59,69,100) ರೂಪಾಯಿಯನ್ನು ವಶಪಡಿಸಿಕೊಳ್ಳಲಾಗಿತ್ತು.

ಈ ದಾಳಿಗೆ ಸಂಬಂಧಿಸಿದಂತೆ ಆದಾಯ ತೆರಿಗೆ ಇಲಾಖೆಯ ಉಪ ನಿರ್ದೇಶಕರು ಆರ್ಥಿಕ ಅಪರಾಧಗಳ ವಿಶೇಷ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಈ ಪ್ರಕರಣದಲ್ಲಿ ಡಿ. ಕೆ. ಶಿವಕುಮಾರ್‌ ಮತ್ತು ಇತರೆ ನಾಲ್ಕು ಮಂದಿ ಪ್ರತಿವಾದಿಗಳಾಗಿದ್ದಾರೆ.

ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ದಾಳಿ ನಡೆಸಿ ನವದೆಹಲಿಯ ಕರ್ನಾಟಕ ಸರಕಾರದ ಅಧಿಕಾರಿಗಳ ವಸತಿ ಗೃಹದ ಫ್ಲ್ಯಾಟ್‌ ನಂಬರ್‌ 1ರಿಂದ 12,44,900, ಸಫ್ದರ್ ಜಂಗ್‌ ಎನ್‌ಕ್ಲೇವ್‌ ಅಪಾರ್ಟ್‌ಮೆಂಟ್‌ನ 4ನೇ ಬ್ಲಾಕ್‌ನ 17ನೇ ನಂಬರ್‌ ಫ್ಲ್ಯಾಟ್‌ನಿಂದ 1,37,36,500, 2ನೇ ಬ್ಲಾಕ್‌ನ 107ನೇ ನಂಬರ್‌ ಫ್ಲ್ಯಾಟ್‌ನಿಂದ 41,03,600 ಮತ್ತು 5ನೇ ಬ್ಲಾಕ್‌ನ 201ನೇ ನಂಬರ್‌ನ ಫ್ಲ್ಯಾಟ್‌ನ ಡಿ.ಕೆ.ಶಿವಕುಮಾರ್‌ ಅವರ ರೂಮ್‌ನಿಂದ 6,61,26,000 ಮತ್ತು ಸುನಿಲ್‌ ಕುಮಾರ್‌ ಶರ್ಮಾ ರೂಮ್‌ನಿಂದ 7,58,100 ರೂಪಾಯಿಯನ್ನು ವಶ ಪಡಿಸಿಕೊಂಡಿದ್ದರು.

ದೆಹಲಿಯಲ್ಲಿರುವ ಡಿ. ಕೆ. ಶಿವಕುಮಾರ್‌ ಅವರ ಫ್ಲ್ಯಾಟ್‌ಗಳ ಮೇಲೆ ಹಾಗೂ ಅವರ ಆಪ್ತರ ಫ್ಲ್ಯಾಟ್‌ಗಳ ಮೇಲೆ ದಾಳಿ ನಡೆಸಿದ್ದ ಆದಾಯ ತೆರಿಗೆ ಅಧಿಕಾರಿಗಳು ಹಲವು ದಾಖಲೆಗಳನ್ನೂ ವಶಪಡಿಸಿಕೊಂಡಿದ್ದರು. ಈ ದಾಖಲೆಗಳ ಪ್ರಕಾರ ಡಿ. ಕೆ. ಶಿವಕುಮಾರ್‌ ತಮ್ಮ ಆಪ್ತರ ಮೂಲಕ ಎಐಸಿಸಿಗೆ ಹಣ ಕಳಿಸಿರುವುದಾಗಿ ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ಆರೋಪಿಸಿದ್ದಾರೆ.

ಪ್ರಕರಣದ ಮೊದಲ ಆರೋಪಿ ಡಿ. ಕೆ. ಶಿವಕುಮಾರ್‌ ಕರ್ನಾಟಕ ಸರಕಾರದ ಸಂಪುಟ ಸಚಿವರಾಗಿದ್ದು ಹಲವು ಟ್ರಸ್ಟ್‌, ಶಿಕ್ಷಣ ಸಂಸ್ಥೆಗಳ ಅಧ್ಯಕ್ಷರಾಗಿದ್ದು, ರಿಯಲ್‌ ಎಸ್ಟೇಟ್ ವ್ಯವಹಾರದಲ್ಲಿ ತೊಡಗಿಸಿಕೊಂಡಿದ್ದಾರೆ. ತೆರಿಗೆ ವಂಚನೆ ಜಾಲದ ಮೊದಲ ಆರೋಪಿ ಡಿ.ಕೆ. ಶಿವಕುಮಾರ್‌ ಎಂದು ಆದಾಯ ತೆರಿಗೆ ಇಲಾಖೆ ದೂರಿದೆ.

ಎರಡನೇ ಆರೋಪಿ ಸಚಿನ್‌ ನಾರಾಯಣ್ ಡಿ. ಕೆ. ಶಿವಕುಮಾರ್‌ ವ್ಯವಹಾರಗಳ ಆಪ್ತರಾಗಿದ್ದು, ಡಿ.ಕೆ. ಶಿವಕುಮಾರ್‌ ಅವರ ವ್ಯವಹಾರಗಳನ್ನು ನೋಡಿಕೊಳ್ಳುತ್ತಿದ್ದಾರೆ. ಈ ಇಬ್ಬರೂ 2014ರಿಂದ ಝಿಯಸ್‌ ಕನ್‌ಸ್ಟ್ರಕ್ಷನ್ಸ್‌ ಮತ್ತು ಡಾಲರ್ ಕನ್‌ಸ್ಟ್ರಕ್ಷನ್ಸ್‌ ಪ್ರೈವೇಟ್‌ ಲಿಮಿಟೆಡ್‌ ಕಂಪೆನಿಗಳ ನಿರ್ದೇಶಕರಾಗಿದ್ದಾರೆ. ಈ ಇಬ್ಬರ ನಡುವೆ ಹಲವಾರು ಬಾರಿ ಹಣಕಾಸಿನ ವರ್ಗಾವಣೆ ನಡೆದಿದೆ ಎಂದು ಆದಾಯ ತೆರಿಗೆ ಇಲಾಖೆ ಆರೋಪಿಸಿದೆ.

ಮೂರನೇ ಆರೋಪಿ ಸುನಿಲ್‌ ಕುಮಾರ್‌ ಶರ್ಮಾ ಐಷಾರಾಮಿ ವಾಹನಗಳ ಶರ್ಮಾ ಟ್ರಾನ್ಸ್‌ಪೋರ್ಟ್ಸ್‌ನ ಒಡೆಯರಾಗಿದ್ದು, ಡಿ.ಕೆ.ಶಿವಕುಮಾರ್‌ ಆಪ್ತ. ಡಿಕೆಶಿ ಜತೆಗೆ ವ್ಯವಹಾರದ ಸಂಬಂಧವಿದೆ. ಡಿ.ಕೆ.ಶಿವಕುಮಾರ್‌ ಹಣಕಾಸಿನ ವರ್ಗಾವಣೆಯಲ್ಲಿ ಸುನಿಲ್‌ ಕುಮಾರ್‌ ಶರ್ಮಾ ಪಾತ್ರವಿದೆ ಎಂದು ಆರೋಪಿಸಲಾಗಿದೆ.

ಇನ್ನು ಪ್ರಕರಣದ ನಾಲ್ಕನೇ ಆರೋಪಿ ಆಂಜನೇಯ ಹನುಮಂತಯ್ಯ ದೆಹಲಿಯ ಕರ್ನಾಟಕದ ಭವನ ಅಧಿಕಾರಿಯಾಗಿದ್ದಾರೆ. ದೆಹಲಿಯಲ್ಲಿ ಡಿ. ಕೆ. ಶಿವಕುಮಾರ್‌ ವ್ಯವಹಾರ ಹಾಗೂ ಹಣಕಾಸಿನ ವರ್ಗಾವಣೆ ನೋಡಿಕೊಳ್ಳುತ್ತಿದ್ದರು ಎಂದು ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ದೂರಿದ್ದಾರೆ.

ಪ್ರಕರಣದ ಕೊನೆಯ ಆರೋಪಿ ಎನ್‌. ರಾಜೇಂದ್ರ ಈ ಹಿಂದೆ ದೆಹಲಿ ಕರ್ನಾಟಕ ಭವನದ ಅಧಿಕಾರಿಯಾಗಿದ್ದವರು. ನಿವೃತ್ತಿಯ ಬಳಿಕ ಸುನಿಲ್‌ ಕುಮಾರ್‌ ಶರ್ಮಾ ವ್ಯವಹಾರ ಚಟುವಟಿಕೆಗಳನ್ನು ನೋಡಿಕೊಳ್ಳುತ್ತಿದ್ದ ರಾಜೇಂದ್ರ ದೆಹಲಿಯಲ್ಲಿ ಡಿ.ಕೆ. ಶಿವಕುಮಾರ್‌ ಹಣಕಾಸು ವರ್ಗಾವಣೆಯ ಕೆಲಸ ಮಾಡುತ್ತಿದ್ದರು ಎಂದು ದೂರಲಾಗಿದೆ.

ಎಐಸಿಸಿಗೆ ಸಂದಾಯ ಮಾಡಲು ವಿಜಯ್‌ ಮುಳಗುಂದ್‌ ಎಂಬುವರಿಗೆ ಎರಡು ಬಾರಿ ರಾಜೇಂದ್ರ ಮೂಲಕ ಹಣ ವರ್ಗಾವಣೆ ನಡೆದಿದೆ. ಡಿ.ಕೆ. ಶಿವಕುಮಾರ್‌ ಮತ್ತು ಸುನಿಲ್‌ ಶರ್ಮಾ ಅವರ ಅಣತಿಯಂತೆ ವಿಜಯ್‌ ಮುಳಗುಂದ್‌ ಅವರಿಗೆ 2017ರ ಜನವರಿ ತಿಂಗಳಲ್ಲಿ ಒಟ್ಟು 5 ಕೋಟಿ ರೂಪಾಯಿಯನ್ನು ಎಐಸಿಸಿಗೆ ಸಂದಾಯ ಮಾಡಲು ಕೊಡಲಾಗಿದೆ ಎಂಬುದು ರಾಜೇಂದ್ರ ಬಳಿ ವಶ ಪಡಿಸಿಕೊಂಡ ದಾಖಲೆಗಳಿಂದ ಸ್ಪಷ್ಟವಾಗಿದೆ ಎಂದು ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ಆರೋಪಿಸಿದ್ದಾರೆ.

ಅದೇ ರೀತಿ 2016ರ ಫೆಬ್ರುವರಿಯಿಂದ ಡಿ. ಕೆ.ಶಿವಕುಮಾರ್‌ ಮತ್ತು ಆಂಜನೇಯ ಅವರಿಗೆ ಖುದ್ದಾಗಿ ಕೋಟಿ ಕೋಟಿ ಹಣ ತಲುಪಿಸಿರುವ ಬಗ್ಗೆ ರಾಜೇಂದ್ರ ನಿವಾಸದಲ್ಲಿ ದಾಖಲೆಗಳು ಪತ್ತೆಯಾಗಿವೆ ಎಂದು ಅಧಿಕಾರಿಗಳು ದೂರಿದ್ದಾರೆ.

‘ಕೆಜಿ’ ಎಂಬ ಕೋಡ್‌ ವರ್ಡ್:

ಹಣಕಾಸಿನ ವರ್ಗಾವಣೆಗೆ ಈ ಆರೋಪಿಗಳು ‘ಕೆಜಿ’ ಎಂಬ ಕೋಡ್‌ ವರ್ಡ್‌ ಬಳಸುತ್ತಿದ್ದರು ಎಂದು ಅಧಿಕಾರಿಗಳು ಹೇಳಿದ್ದಾರೆ. ಒಂದು ಲಕ್ಷ ರೂಪಾಯಿಗೆ ಒಂದು ಕೆಜಿ ಎಂದು ಕೋಡ್‌ ವರ್ಡ್‌ ಬಳಸಲಾಗುತ್ತಿತ್ತು. ಎಷ್ಟು ಲಕ್ಷದ ವರ್ಗಾವಣೆ ನಡೆಯುತ್ತಿತ್ತೋ ಅಷ್ಟು ಕೆಜಿ ಎಂದು ಈ ಆರೋಪಿಗಳು ಕೋಡ್‌ ವರ್ಡ್‌ನಲ್ಲಿ ವ್ಯವಹರಿಸುತ್ತಿದ್ದರು ಎಂದು ಅಧಿಕಾರಿಗಳು ದೂರಿದ್ದಾರೆ.

ಬೆಂಗಳೂರಿನಿಂದ ಹಲವು ಬಾರಿ ದೆಹಲಿಗೆ ಹಣದ ಅಕ್ರಮ ಸಾಗಣೆ ನಡೆದಿದೆ. ಇದಕ್ಕೆ ಸುನಿಲ್‌ ಶರ್ಮಾ ಸಹಕರಿಸಿದ್ದಾರೆ. ಹಣ ವರ್ಗಾವಣೆಯಲ್ಲಿ ಸುನಿಲ್‌ ಶರ್ಮಾ ಪಾತ್ರವಿದೆ. ದೆಹಲಿಯಲ್ಲಿ ಡಿ.ಕೆ.ಶಿವಕುಮಾರ್‌ ಖರೀದಿಸಿರುವ ಫ್ಲ್ಯಾಟ್‌ಗಳ ಖರೀದಿಗೂ ಅಕ್ರಮ ಹಣದ ವಹಿವಾಟು ನಡೆದಿದೆ ಎಂದು ದೂರಲಾಗಿದೆ.

ಡಿಕೆಶಿ ವ್ಯವಸ್ಥಾಪಕ ಟ್ರಸ್ಟಿಯಾಗಿರುವ ನ್ಯಾಷನಲ್‌ ಎಜುಕೇಷನ್‌ ಫೌಂಡೇಷನ್‌ನ ಟ್ರಸ್ಟಿ ಲೇಪಾಕ್ಷ, ದೆಹಲಿಯ ಸಫ್ದರ್ ಜಂಗ್‌ ಎನ್‌ಕ್ಲೇವ್‌ ಅಪಾರ್ಟ್‌ಮೆಂಟ್‌ ಬಿಲ್ಡರ್‌ ಅಜಯ್‌ ಖನ್ನಾ, ಡಿಕೆಶಿ ರಾಜಕೀಯ ಆಪ್ತ ವಿಜಯ್‌ ಮುಳಗುಂದ್, ಡಿಕೆಶಿ ಸಹೋದರ ಡಿ.ಕೆ.ಸುರೇಶ್‌ ಅವರ ವ್ಯವಹಾರದ ಆಪ್ತ ಪ್ರಮೋದ್‌ ಮತ್ತು ಡಿಕೆಶಿ ಹಣಕಾಸಿನ ವ್ಯವಹಾರಗಳನ್ನು ನೋಡಿಕೊಳ್ಳುವ ಚಂದ್ರಶೇಖರ್‌ ಹೆಸರುಗಳು ಕೂಡಾ ದಾಳಿ ವೇಳೆ ಪತ್ತೆಯಾದ ದಾಖಲೆಗಳಲ್ಲಿವೆ ಎಂದು ಅಧಿಕಾರಿಗಳು ದೂರಿದ್ದಾರೆ.

ಆದಾಯ ತೆರಿಗೆ ವಂಚನೆಗೆ ಸಂಬಂಧಿಸಿದಂತೆ ಆದಾಯ ತೆರಿಗೆ ಕಾಯ್ದೆ 1995ರ ಸೆಕ್ಷನ್‌ 276ಸಿ, 277 ಮತ್ತು ಭಾರತೀಯ ದಂಡ ಸಂಹಿತೆಯ 193, 120 ಬಿ ಕಲಂ ಅಡಿ ಪ್ರಕರಣ ದಾಖಲಿಸಲಾಗಿದೆ. ಒಂದು ವೇಳೆ ಆರೋಪ ಸಾಬೀತಾದರೆ ಡಿ.ಕೆ. ಶಿವಕುಮಾರ್‌ ಮತ್ತು ಅವರ ಆಪ್ತರು ದಂಡ ಸಹಿತ ಜೀವಾವಧಿ ಶಿಕ್ಷೆ ಅಥವಾ ಎರಡು ವರ್ಷ ಕಠಿಣ ಜೈಲುವಾಸದ ಶಿಕ್ಷೆಗೆ ಗುರಿಯಾಗಬೇಕಾಗುತ್ತದೆ.

ಡಿಕೆಎಸ್‌ ವಿರುದ್ಧ ಐಟಿ ಅಧಿಕಾರಿಗಳು ದಾಖಲಿಸಿದ ದೂರುಗಳ ಪಟ್ಟಿಯ ಪ್ರತಿ ಇಲ್ಲಿದೆ. ಆಸಕ್ತರ ಗಮನಕ್ಕೆ.

watermarked_Complaint_DKS AY 18-19.pdf
download