‘ಬೆಂಗಳೂರಿನಲ್ಲಿ ಜಲಕ್ಷಾಮ’: ನೀತಿ ಆಯೋಗದ ವರದಿ ಹೇಳುತ್ತಿರುವುದೇನು?
COVER STORY

‘ಬೆಂಗಳೂರಿನಲ್ಲಿ ಜಲಕ್ಷಾಮ’: ನೀತಿ ಆಯೋಗದ ವರದಿ ಹೇಳುತ್ತಿರುವುದೇನು?

ದೇಶ ಹಿಂದೆಂದೂ ಕಾಣದ ಕುಡಿಯುವ ನೀರಿನ ಸಮಸ್ಯೆಯನ್ನು ಎದುರಿಸುತ್ತಿದ್ದು, 2020ರ ವೇಳೆಗೆ ದೇಶದ ಪ್ರಮುಖ 20 ನಗರಗಳು ಅಂತರ್ಜಲ ರಹಿತವಾಗಲಿವೆ ಎಂದು ವರದಿ ಎಚ್ಚರಿಸಿದೆ.

ದೇಶದಲ್ಲಿ ಕುಡಿಯುವ ನೀರಿನ ಅಲಭ್ಯತೆ ಕುರಿತು ನೀತಿ ಆಯೋಗ ಅಧ್ಯಯನ ವರದಿಯೊಂದನ್ನು ಬಿಡುಗಡೆಗೊಳಿಸಿದೆ. ‘ಸಂಯುಕ್ತ ನೀರಿನ ನಿರ್ವಹಣೆ ಸೂಚ್ಯಂಕ’ ಹೆಸರಿನ ಈ ಅಧ್ಯಯನ ವರದಿ ದೇಶದಲ್ಲಿ ಉಂಟಾಗಬಹುದಾದ ಜಲಕ್ಷಾಮದ ತೀವ್ರತೆಯನ್ನು ಬಿಚ್ಚಿಟ್ಟಿದೆ.

ದೇಶ ಹಿಂದೆಂದೂ ಕಾಣದ ಕುಡಿಯುವ ನೀರಿನ ಸಮಸ್ಯೆಯನ್ನು ಎದುರಿಸುತ್ತಿದ್ದು, 2020ರ ವೇಳೆಗೆ ದೇಶದ ಪ್ರಮುಖ 21 ನಗರಗಳು ಅಂತರ್ಜಲ ರಹಿತವಾಗಲಿವೆ ಎಂದೂ ಎಚ್ಚರಿಸಿದೆ. ದೇಶದ 600 ಮಿಲಿಯನ್ ಜನರಿಗೆ ಕುಡಿಯುವ ನೀರಿನ ಅಲಭ್ಯತೆ ಇದ್ದು, ಪ್ರತಿ ವರ್ಷ ಶುದ್ಧ ಕುಡಿಯುವ ನೀರಿನ ಕೊರತೆಯಿಂದ 2 ಲಕ್ಷ ಮಂದಿ ಸಾವಿಗೀಡಾಗುತ್ತಿದ್ದಾರೆ ಎಂದು ವರದಿ ತಿಳಿಸಿದೆ.

‘ಬೆಂಗಳೂರಿನಲ್ಲಿ ಜಲಕ್ಷಾಮ’: ನೀತಿ ಆಯೋಗದ ವರದಿ ಹೇಳುತ್ತಿರುವುದೇನು?

ವರದಿಯ ಲೆಕ್ಕಾಚಾರದ ಪ್ರಕಾರ, ದೇಶದಲ್ಲಿ ಕುಡಿಯುವ ನೀರಿನ ಬೇಡಿಕೆ ಅತಿ ಹೆಚ್ಚಾಗುತ್ತಿದ್ದು, 2030ರ ವೇಳೆಗೆ ಈ ಬೇಡಿಕೆ ದುಪ್ಪಟ್ಟಾಗಲಿದೆ ಎಂದು ಅಂದಾಜಿಸಿದೆ. ತಜ್ಞರು ತಿಳಿಸುವಂತೆ, ಇದೇ ಪ್ರಮಾಣದಲ್ಲಿ ನೀರಿನ ಅಲಭ್ಯತೆ ಮುಂದುವರೆದರೆ, ನೀರಿನ ಕೊರತೆ ಮತ್ತು ಹೆಚ್ಚುತ್ತಿರುವ ಬೇಡಿಕೆಯಿಂದ ಜಿಡಿಪಿ ದರ ಶೇ. 6ರಷ್ಟು ಕಡಿತ ಆಗಬಹುದು.

2020ರ ವೇಳೆಗೆ ದೇಶದ ಪ್ರಮುಖ 21 ನಗರಗಳು ಅಂತರ್ಜಲ ರಹಿತವಾಗಲಿವೆ. ಈ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿರುವುದು ಗುಜರಾತ್. ನಂತರದ ಸ್ಥಾನಗಳಲ್ಲಿ ಕ್ರಮವಾಗಿ ಮಧ್ಯಪ್ರದೇಶ, ಆಂಧ್ರಪ್ರದೇಶ, ಕರ್ನಾಟಕ, ಮಹಾರಾಷ್ಟ್ರ ರಾಜ್ಯಗಳಿವೆ. ಇದರ ಜೊತೆ ದೇಶದಲ್ಲಿ ಲಭ್ಯವಿರುವ ಕುಡಿಯುವ ನೀರು ಶೇ. 70ರಷ್ಟು ಕಲುಷಿತವಾಗಿದೆ ಎಂದು ವರದಿ ತಿಳಿಸಿದೆ. ಕಲುಷಿತ ಕುಡಿಯುವ ನೀರಿನ ಸಮಸ್ಯೆಯಿಂದ ಆರೋಗ್ಯದ ಸಮಸ್ಯೆಗಳು ಹೆಚ್ಚಾಗಲಿದ್ದು, ಈ ಬಗ್ಗೆ ಎಚ್ಚೆತ್ತು, ಕ್ರಮ ಕೈಗೊಳ್ಳಬೇಕಾಗಿದೆ ಎಂಬುದಾಗಿ ವರದಿ ಎಚ್ಚರಿಸಿದೆ.

ಆಪತ್ತಿನಲ್ಲಿ ಕರ್ನಾಟಕ:

‘ಬೆಂಗಳೂರಿನಲ್ಲಿ ಜಲಕ್ಷಾಮ’: ನೀತಿ ಆಯೋಗದ ವರದಿ ಹೇಳುತ್ತಿರುವುದೇನು?

ನೀತಿ ಆಯೋಗದ ಅಧ್ಯಯನ ವರದಿ ಅನ್ವಯ 2021ರ ವೇಳೆಗೆ ಅಂತರ್ಜಲ ಬರಿದಾಗುವ ರಾಜ್ಯಗಳ ಪೈಕಿ ಕರ್ನಾಟಕ 4ನೇ ಸ್ಥಾನದಲ್ಲಿದೆ. ಕರ್ನಾಟಕದ ಹಲವು ನಗರಗಳು ಕುಡಿಯುವ ನೀರಿನ ಬವಣೆಯನ್ನು ಈಗಾಗಲೇ ಅನುಭವಿಸುತ್ತಿವೆ. ಕೋಲಾರ ಮತ್ತು ಸುತ್ತಮುತ್ತಲ ಪ್ರದೇಶಗಳಲ್ಲಿ 1500 ಅಡಿಗಳಷ್ಟು ಕೊಳವೆ ಬಾವಿ ತೋಡಿದರೂ ನೀರಿಲ್ಲ. ಸಿಕ್ಕರೂ ಫ್ಲೋರೈಡ್ ಮಿಶ್ರಿತ ಕುಡಿಯಲು ಯೋಗ್ಯವಲ್ಲದ ನೀರು.

2017ರಲ್ಲಿ ಕೇಂದ್ರ ಜಲಸಂಪನ್ಮೂಲ ಸಚಿವಾಲಯ ಸಮೀಕ್ಷೆಯೊಂದನ್ನು ಬಿಡುಗಡೆಗೊಳಿಸಿತ್ತು.ಈ ಸಮೀಕ್ಷೆ ಕರ್ನಾಟಕದ ಅಂತರ್ಜಲ ಮಟ್ಟ ಕುಸಿತದ ಬಗ್ಗೆ ಎಚ್ಚರಿಸಿತ್ತು. ಈ ಸಮೀಕ್ಷೆಯಲ್ಲೂ ಅಂತರ್ಜಲ ಮಟ್ಟ ಕುಸಿಯುತ್ತಿರುವ ರಾಜ್ಯಗಳಲ್ಲಿ ನಾಲ್ಕನೇ ಸ್ಥಾನ ಕರ್ನಾಟಕದ್ದಾಗಿತ್ತು.

ರಾಜ್ಯದಲ್ಲಿ 70 ಮೀಟರ್ ಗಿಂತಲೂ ಆಳ ಕೊರೆದಿರುವ 1.18 ಲಕ್ಷ ಕೊಳವೆ ಬಾವಿಗಳಿವೆ [ 2017ರ ಅಂಕಿ ಅಂಶ] 50 ಮೀಟರ್ ಗಿಂತ ಹೆಚ್ಚು ಆಳ ಕೊರೆದಿರುವ ಸುಮಾರು 40,180 ಕೊಳವೆ ಬಾವಿಗಳಿವೆ. ವೈಜ್ಞಾನಿಕವಲ್ಲದ ನೀರಿನ ನಿರ್ವಹಣೆ ಮತ್ತು ಅಂತರ್ಜಲ ಮಟ್ಟ ಹೆಚ್ಚಿಸುವುದರ ಕಡೆಗೆ ರಾಜ್ಯಕ್ಕಿರುವ ನಿರ್ಲಕ್ಷ್ಯದ ಪರಿಣಾಮವೇ ಈ ಸೂಚ್ಯಾಂಕ.

ಕೋಲಾರ ಮತ್ತು ಚಿಂತಾಮಣಿ ಭಾಗಕ್ಕೆ ಕೆಸಿ ವ್ಯಾಲಿ ಮೂಲಕ ನೀರು ಹರಿಸಿ ಅಂತರ್ಜಲ ವೃದ್ದಿಸುವ ಗುರಿ ಸರ್ಕಾರದ್ದಾಗಿದ್ದರೂ ನೀತಿ ಆಯೋಗದ ವರದಿಯೇ ತಿಳಿಸುವಂತೆ ಲಭ್ಯವಿರುವ ಶೇ. 70ರಷ್ಟು ನೀರು ಕಲುಷಿತಗೊಂಡಿದೆ. ಬೆಂಗಳೂರಿನ ಮೋರಿ ನೀರು ಸಂಸ್ಕರಿಸಲ್ಪಟ್ಟರೂ ಕುಡಿಯಲು ಯೋಗ್ಯವೇ ಎಂಬುದು ಇನ್ನೂ ಖಾತ್ರಿಯಾಗಬೇಕಿದೆ.

Also read: ‘ಸಿಲಿಕಾನ್ ಸಿಟಿ ಚರಂಡಿ ನೀರು ಕುಡಿಯಲು ಯೋಗ್ಯನಾ?’: ಕೆಸಿ ವ್ಯಾಲಿಯಿಂದ ಆತಂಕದ ಪತ್ರ

“ಮಹದಾಯಿ ಕುಡಿಯುವ ನೀರಿನ ವಿವಾದ ನ್ಯಾಯಾಧಿಕರಣದಲ್ಲಿದೆ. ಉತ್ತರ ಕರ್ನಾಟಕದ ಹಲವು ನಗರಗಳು ಕುಡಿಯುವ ನೀರಿಗಾಗಿ ಮಹದಾಯಿ ನೀರನ್ನೇ ನೆಚ್ಚಿಕೊಂಡಿವೆ. ಕುಡಿಯುವ ನೀರಿನ ಸಮಸ್ಯೆ ಈಗಾಗಲೇ ಇಲ್ಲಿನ ಜನರನ್ನು ಕಾಡುತ್ತಿದೆ. ಕಿಲೋಮೀಟರ್ ದೂರ ನಡೆದರೂ ಶುದ್ಧ ಕುಡಿಯುವ ನೀರು ಸಿಗುತ್ತಿಲ್ಲ. ಶುದ್ಧ ಕುಡಿಯುವ ನೀರು ನೀಡುವುದು ಸರ್ಕಾರದ ಕರ್ತವ್ಯ,” ಎನ್ನುತ್ತಾರೆ ಮಹದಾಯಿ ಹೋರಾಟಗಾರರು.

ನಗರ ಕೇಂದ್ರಿಕೃತವಾಗಿರುವ ಆಡಳಿತ ಗ್ರಾಮಗಳತ್ತ ಹೆಚ್ಚು ಗಮನಹರಿಸುತ್ತಿಲ್ಲ. ಕೆಲವು ಶಾಸಕರು ತಮ್ಮ ಅನುದಾನದಲ್ಲಿ ಶುದ್ಧ ಕುಡಿಯುವ ನೀರಿನ ಘಟಕ ಮಾಡಿದ್ದರೂ ಎಲ್ಲಾ ಹಳ್ಳಿಗಳಲ್ಲಿ ಲಭ್ಯವಿಲ್ಲ. ಮತ್ತು ಇದರ ನಿರ್ವಹಣೆಯಲ್ಲೂ ಕೆಲವು ಲೋಪಗಳಾಗಿವೆ.

2030ಕ್ಕೆ ಕುಡಿಯುವ ನೀರು ಖಾಲಿ?

ಬೆಂಗಳೂರು ನಗರ ದಿನದಿಂದ ದಿನಕ್ಕೆ ಬೆಳೆಯುತ್ತಲೇ ಇದೆ. ಅದಕ್ಕೆ ಕಡಿವಾಣ ಬಿದ್ದಿಲ್ಲ. ಇಡೀ ನಗರ ಕುಡಿಯುವ ನೀರಿಗಾಗಿ ಆಶ್ರಯಿಸಿರುವುದು ಕಾವೇರಿ ನೀರನ್ನೇ. ಕಳೆದ ಫೆಬ್ರವರಿಯಲ್ಲಿ ಬಿಬಿಸಿ ವರದಿಯೊಂದನ್ನು ಬಿಡುಗಡೆಗೊಳಿಸಿದ್ದು, 2030ರ ವೇಳೆಗೆ ಕುಡಿಯುವ ನೀರು ಬರಿದಾಗುವ ನಗರಗಳ ಪಟ್ಟಿಯಲ್ಲಿ ಬೆಂಗಳೂರು 3ನೇ ಸ್ಥಾನ ಪಡೆದುಕೊಂಡಿದೆ.

ಪೋಲಾಗುತ್ತಿರುವ ನೀರಿಗೆ ಕಡಿವಾಣ ಹಾಕದೇ ಇರುವುದು ಮತ್ತು ನೀರಿನ ಮರುಬಳಕೆ ಮಾಡದೇ ಇರುವುದು ಈ ಸಾಧ್ಯತೆಯನ್ನು ಹೆಚ್ಚಿಸಿದೆ. ನಗರ ಬೆಳೆದಂತೆಲ್ಲ ಮೂಲಭೂತ ಸೌಕರ್ಯಗಳ ಅವಶ್ಯಕತೆಯೂ ಹೆಚ್ಚಾಗುತ್ತಾ ಹೋಗುತ್ತದೆ.

ಬೆಂಗಳೂರು ನಗರದ ಬೆಳವಣಿಗೆಗೆ ಕಡಿವಾಣ ಹಾಕದಿದ್ದರೆ, ನೀರಿನ ಸರಿಯಾದ ನಿರ್ವಹಣೆ ಆಗದಿದ್ದರೆ 2030ಕ್ಕಿಂತ ಮುಂಚೇಯೇ ಬೆಂಗಳೂರು ಈ ಸ್ಥಿತಿ ತಲುಪಿದರೂ ಆಶ್ಚರ್ಯವಿಲ್ಲ.

ಹೊಸದಾಗಿ ರಚನೆಯಾಗಿರುವ ಮೈತ್ರಿ ಸರ್ಕಾರ ನೀತಿ ಆಯೋಗದ ವರದಿ ಜೊತೆ ಕೇಂದ್ರ ಜಲಸಂಪನ್ಮೂಲ ವರದಿಯತ್ತ ಗಮನ ಹರಿಸಬೇಕಿದೆ. ಹಸಿವಿನಿಂದ ಸಾಯುವುದರ ಜೊತೆ ಕುಡಿಯಲು ನೀರಿಲ್ಲದೆ ಸಾಯುವ ದಿನಗಳು ಬಾರದಿರಲಿ. ಕಲ್ಯಾಣ ಕಾರ್ಯಕ್ರಮಗಳ ಪಟ್ಟಿಯಲ್ಲಿ ಶುದ್ಧ ಕುಡಿಯುವ ನೀರು ಪೂರೈಕೆ ಅಗ್ರ ಸ್ಥಾನ ಪಡೆದುಕೊಳ್ಳಬೇಕಿದೆ.