No Comments| ‘ವಿಧಾನಸೌಧದಲ್ಲಿ ಯಾರೂ ಪ್ರಮಾಣಿಕರಿಲ್ಲ’: ಸಿಎಂ ಕುಮಾರಸ್ವಾಮಿ
COVER STORY

No Comments| ‘ವಿಧಾನಸೌಧದಲ್ಲಿ ಯಾರೂ ಪ್ರಮಾಣಿಕರಿಲ್ಲ’: ಸಿಎಂ ಕುಮಾರಸ್ವಾಮಿ

ಆಡಳಿತ ವ್ಯವಸ್ಥೆಯಲ್ಲಿ ಎಲ್ಲವೂ ಸರಿಯಿಲ್ಲ, ರಾಜಕಾರಣದಲ್ಲಿ ಅಪ್ಪಟ ಪ್ರಾಮಾಣಿಕತೆ ಸಾಧ್ಯವಿಲ್ಲ ಎಂಬುದನ್ನು ಖುದ್ದು ರಾಜ್ಯದ ಮುಖ್ಯಮಂತ್ರಿ ಹಾಗೂ ಮಂತ್ರಿಯೊಬ್ಬರು ಒಪ್ಪಿಕೊಂಡಿದ್ದಾರೆ.

ರಾಜಕೀಯ ಭ್ರಷ್ಟಾಚಾರದ ಮಾತು ಈಗ ವಿಧಾನಸೌಧಕ್ಕೇ ಬಂದು ನಿಂತಿದೆ. ವಿಧಾನಸೌಧದ ಭ್ರಷ್ಟಾಚಾರ ಹಾಗೂ ರಾಜಕಾರಣಿಗಳ ಪಾರದರ್ಶಕತೆಯ ಬಗ್ಗೆ ಈಗ ಖುದ್ದು ರಾಜಕಾರಣಿಗಳೇ ಮಾತನಾಡುತ್ತಿದ್ದಾರೆ.

“ವಿಧಾನಸೌಧದಲ್ಲಿ ತುಂಬಾ ಭ್ರಷ್ಟಾಚಾರ ಇದೆ” ಎಂದು ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಹೇಳಿದ್ದರೆ, “ಭ್ರಷ್ಟಾಚಾರ ಮಾಡುವುದಿಲ್ಲ, ತಾವು 24 ಕ್ಯಾರೆಟ್‌ ಅಪರಂಜಿ ಎಂದು ರಾಜಕೀಯದಲ್ಲಿ ಯಾರೊಬ್ಬರೂ ಹೇಳಿಕೊಳ್ಳಲು ಸಾಧ್ಯವಿಲ್ಲ” ಎಂದು ಸಚಿವ ಕೃಷ್ಣ ಭೈರೇಗೌಡ ಹೇಳಿದ್ದಾರೆ.

ವಿಧಾನಸೌಧದಲ್ಲಿ ಹಾಗೂ ಒಟ್ಟಾರೆ ರಾಜಕೀಯ ವ್ಯವಸ್ಥೆಯಲ್ಲಿ ಭ್ರಷ್ಟಾಚಾರ ಇದೆ ಎಂಬುದನ್ನು ಈ ಇಬ್ಬರ ಹೇಳಿಕೆಗಳೂ ಸಮರ್ಥಿಸುತ್ತಿವೆ. ಆಡಳಿತ ವ್ಯವಸ್ಥೆ ಭ್ರಷ್ಟಾಚಾರ ಮುಕ್ತವಾಗಿಲ್ಲ ಎಂಬುದನ್ನು ನಾಡಿನ ಅಧಿಕಾರ ಚುಕ್ಕಾಣಿ ಹಿಡಿದಿರುವ ಕುಮಾರಸ್ವಾಮಿ ಒಪ್ಪಿಕೊಂಡರೆ, ರಾಜಕೀಯದಲ್ಲಿ ಯಾರೂ ಪ್ರಾಮಾಣಿಕರಲ್ಲ ಎಂಬುದನ್ನು ಕೃಷ್ಣ ಭೈರೇಗೌಡ ಸಾರಿದ್ದಾರೆ.

ಆದರೆ, ಮಾಜಿ ಮುಖ್ಯಮಂತ್ರಿ ಹಾಗೂ ಜೆಡಿಎಸ್‌– ಕಾಂಗ್ರೆಸ್‌ ಸಮ್ಮಿಶ್ರ ಸರ್ಕಾರದ ಸಮನ್ವಯ ಸಮಿತಿ ಅಧ್ಯಕ್ಷ ಸಿದ್ದರಾಮಯ್ಯ, “ವಿಧಾನಸೌಧದಲ್ಲಿ ಭ್ರಷ್ಟಾಚಾರ ನಡೆಯುವುದು ನನ್ನ ಕಣ್ಣಿಗೆ ಬಿದ್ದಿಲ್ಲ. ಕುಮಾರಸ್ವಾಮಿ ಅವರ ಕಣ್ಣಿಗೆ ಕಂಡರೆ ಅದನ್ನು ನಿಲ್ಲಿಸಲಿ” ಎಂದಿದ್ದಾರೆ.

ವಿಧಾನಸೌಧದಲ್ಲಿ ಭ್ರಷ್ಟಾಚಾರ ಇಲ್ಲ ಎಂಬ ಮಾತನ್ನು ಯಾರೊಬ್ಬರೂ ಒಪ್ಪುವುದು ಕಷ್ಟ. ಏಕೆಂದರೆ ಭ್ರಷ್ಟಾಚಾರ ಮುಕ್ತ ಆಡಳಿತ ರಾಜ್ಯದಲ್ಲಿದ್ದಿದ್ದರೆ ಆಡಳಿತದ ವಿಷಯದಲ್ಲಿ ಕರ್ನಾಟಕ ವಿಶ್ವಕ್ಕೇ ಮಾದರಿಯಾಗುತ್ತಿತ್ತು!

ರಾಜಕಾರಣ ಹಾಗೂ ಆಡಳಿತ ವ್ಯವಸ್ಥೆಯಲ್ಲಿ ಭ್ರಷ್ಟಾಚಾರ ಇದ್ದೇ ಇದೆ. ಭ್ರಷ್ಟಾಚಾರ ಎಂಬುದು ಇಂದು ನಿನ್ನೆಯ ಪಿಡುಗಲ್ಲ. ಎಲ್ಲೆಲ್ಲಿ ಹಣಕಾಸಿನ ಹರಿವು ಇರುತ್ತದೆಯೋ ಅಲ್ಲೆಲ್ಲಾ ಭ್ರಷ್ಟಾಚಾರಕ್ಕೆ ಅವಕಾಶ ಇದ್ದೇ ಇರುತ್ತದೆ. ಕಡಿಮೆ ಹಣದ ಓಡಾಟ ಇರುವಲ್ಲಿ ಕಡಿಮೆ ಭ್ರಷ್ಟಾಚಾರ, ಹೆಚ್ಚು ಹಣದ ಓಡಾಟ ಇರುವಲ್ಲಿ ಹೆಚ್ಚು ಭ್ರಷ್ಟಾಚಾರ. ಭ್ರಷ್ಟಾಚಾರ ಒಂದೇ ಆದರೂ ಸ್ವರೂಪಗಳು ಬೇರೆಬೇರೆಯಷ್ಟೇ.

ಕುಮಾರಸ್ವಾಮಿ ವಿಧಾನಸೌಧದ ಭ್ರಷ್ಟಾಚಾರದ ಬಗ್ಗೆ ಮಾತನಾಡುತ್ತಾ, “ಅಧಿಕಾರಿಗಳು ಲೂಟಿ ಮಾಡುತ್ತಿದ್ದಾರೆ,” ಎಂದಿದ್ದಾರೆ. ಇದು ಭ್ರಷ್ಟಾಚಾರದಲ್ಲಿ ರಾಜಕಾರಣಿಗಳು ಮಾತ್ರವಲ್ಲ ಅಧಿಕಾರಿಗಳ ಪಾಲೂ ಸಾಕಷ್ಟಿರುತ್ತದೆ ಎಂಬುದನ್ನು ಒಪ್ಪಿಕೊಂಡಂತಿದೆ.

ಭ್ರಷ್ಟಾಚಾರದ ನಿರ್ಮೂಲನೆ ಕಷ್ಟ. ಅಧಿಕಾರಿಗಳು ಲೂಟಿ ಮಾಡುತ್ತಿದ್ದಾರೆ.
- ಎಚ್‌.ಡಿ. ಕುಮಾರಸ್ವಾಮಿ, ಮುಖ್ಯಮಂತ್ರಿ

“ಯಾವ ಯಾವ ಯೋಜನೆಗಳಲ್ಲಿ ಹೇಗೆಲ್ಲಾ ಹಣ ಲೂಟಿ ಮಾಡಬಹುದು ಎಂಬುದನ್ನು ರಾಜಕಾರಣಿಗಳಿಗೆ ಹೇಳಿಕೊಡುವವರೇ ಹಿರಿಯ ಅಧಿಕಾರಿಗಳು ಎಂಬುದು ಬಹಿರಂಗ ಸತ್ಯ,” ಎನ್ನುತ್ತಾರೆ ಹೆಸರು ಬಹಿರಂಗ ಪಡಿಸಲು ಇಚ್ಛಿಸದ ಹಿರಿಯ ರಾಜಕಾರಣಿಯೊಬ್ಬರು.

“ಚರಂಡಿ, ರಸ್ತೆ ಕಾಮಗಾರಿಗಳಿಂದ ಹಿಡಿದು ಯುದ್ಧ ವಿಮಾನಗಳ ಖರೀದಿವರೆಗೆ ಭ್ರಷ್ಟಾಚಾರ ನಡೆಯುತ್ತದೆ. ಯಾವ ಯಾವ ಯೋಜನೆಗಳಲ್ಲಿ ಹೇಗೆಲ್ಲಾ ಹಣ ಲೂಟಿ ಮಾಡಬಹುದು, ಹಣ ದೋಚಿಯೂ ಕಾನೂನಿನ ಕುಣಿಕೆಗೆ ಸಿಗದಂತೆ ಪಾರಾಗುವುದು ಹೇಗೆ, ಭ್ರಷ್ಟಾಚಾರವನ್ನು ‘ನಿಯಮಬದ್ಧ’ವಾಗಿ ಮಾಡುವುದು ಹೇಗೆ ಎಂಬುದನ್ನು ರಾಜಕಾರಣಿಗಳಿಗೆ ಹೇಳಿಕೊಡುವವರೇ ಅಧಿಕಾರಿಗಳು” ಎನ್ನುತ್ತಾರೆ ಅವರು.

“ಭ್ರಷ್ಟಾಚಾರ ಎಂಬುದು ವಿಧಾನಸೌಧ ಕಟ್ಟಿದ ಮೇಲೆ ಹುಟ್ಟಿಕೊಂಡಿದ್ದಲ್ಲ. ರಾಜರ ಆಡಳಿತ ಕಾಲದಿಂದಲೂ ಭ್ರಷ್ಟಾಚಾರ ಎಂಬುದು ಇದೆ. ಜನರ ತೆರಿಗೆ ಹಣವನ್ನು ಕದಿಯುವ ಚಾಳಿ ಹಿಂದಿನಿಂದಲೂ ಇದೆ. ಹಣದ ಹರಿವು ತಮ್ಮ ಮೂಲಕ ಹೋಗುವ ಸಂದರ್ಭದಲ್ಲಿ ಭ್ರಷ್ಟಾಚಾರಕ್ಕೆ ಬಲಿಯಾಗುವುದು ಮನುಷ್ಯ ಗುಣ. ಆದರೆ, ಅದಕ್ಕೂ ಒಂದು ಮಿತಿ ಇರಬೇಕು. ಈಗ ಮಿತಿ ಇಲ್ಲದೆ ಭ್ರಷ್ಟಾಚಾರ ನಡೆಯುತ್ತಿದೆ” ಎಂಬುದು ಅವರ ಮಾತು.

ವಿಧಾನ ಸೌಧದ ಒಂದು ನೋಟ. 
ವಿಧಾನ ಸೌಧದ ಒಂದು ನೋಟ. 
ಭ್ರಷ್ಟಾಚಾರ ಎಲ್ಲ ಹಂತಗಳಲ್ಲೂ ಇದೆ. ಯಾರಾದರೂ ತಾವು ಭ್ರಷ್ಟಾಚಾರ ಮುಕ್ತ ಎಂದು ಹೇಳಿಕೊಂಡರೆ, ಅದು ಆತ್ಮವಂಚನೆಯಾಗುತ್ತದೆ. 
- ಕೃಷ್ಣ ಭೈರೇಗೌಡ, ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ ರಾಜ್‌ ಸಚಿವ

ಕೆಲ ವರ್ಷಗಳ ಹಿಂದೆ ನಿವೃತ್ತ ಐಎಎಸ್‌ ಅಧಿಕಾರಿಯೊಬ್ಬರು ಭ್ರಷ್ಟಾಚಾರ ಎಂಬುದು ಎಷ್ಟರ ಮಟ್ಟಿಗೆ ಇದ್ದರೆ ಅಪಾಯಕಾರಿ ಅಲ್ಲ ಎಂಬುದನ್ನು ಸಂವಾದ ಒಂದರಲ್ಲಿ ಹೇಳಿದ್ದರು. “ಗೋಡೆಯಲ್ಲಿ ಸ್ವಲ್ಪ ಕೆರೆದುಕೊಂಡರೆ ಅದರಿಂದ ಹೆಚ್ಚಿನ ಅಪಾಯವಿಲ್ಲ. ಆದರೆ, ಈಗ ಗೋಡೆ ಗೋಡೆಯನ್ನೇ ಹೊಡೆಯುವಂಥ ಭ್ರಷ್ಟಾಚಾರ ನಡೆಯುತ್ತಿದೆ. ಇಂಥ ಭ್ರಷ್ಟಾಚಾರ ಆಡಳಿತ ವ್ಯವಸ್ಥೆ ಎಂಬ ಕಟ್ಟಡ ಕುಸಿದು ಬೀಳುವಂತೆ ಮಾಡುತ್ತದೆ” ಎಂದಿದ್ದರು ಅವರು.

“ಬಿಲ್‌ ಕಲೆಕ್ಟರ್‌ಗಳಿಂದ ಹಿಡಿದು ಐಎಎಸ್ ಅಧಿಕಾರಿಗಳ ಮಟ್ಟದವರೆಗೆ ಭ್ರಷ್ಟಾಚಾರ ವ್ಯಾಪಿಸಿದೆ. ಬಿಲ್‌ ಕಲೆಕ್ಟರ್‌ ಬಿಲ್‌ ಕೊಡದೆ ಸರಕಾರಕ್ಕೆ ಬರಬೇಕಾದ ಹಣವನ್ನು ತನ್ನ ಜೇಬಿಗೆ ಹಾಕಿಕೊಂಡು ವಂಚಕರಿಗೆ ಅನುಕೂಲ ಮಾಡಿಕೊಟ್ಟರೆ, ಉನ್ನತ ಅಧಿಕಾರಿಗಳು ಯೋಜನೆಗಳಿಗೆ ಒಪ್ಪಿಗೆ, ಕಾಮಗಾರಿಗಳ ಪರಿಶೀಲನೆ, ಸರಕಾರಕ್ಕೆ ಬರಬೇಕಾದ ಶುಲ್ಕ, ದಂಡದ ಹಣದಲ್ಲಿ ಭ್ರಷ್ಟಾಚಾರ ನಡೆಸುತ್ತಾರೆ. ಸರಕಾರಿ ವ್ಯವಸ್ಥೆಯಲ್ಲಿ ಇದಕ್ಕೆ ಕಡಿವಾಣ ಹಾಕುವುದು ಅಷ್ಟು ಸುಲಭವಿಲ್ಲ” ಎಂದು ಅವರು ಹೇಳಿದ್ದರು.

ಕೇವಲ ಅಧಿಕಾರಿಗಳು ಮಾತ್ರ ಹಣ ಹೊಡೆದರೆ ಅದನ್ನು ನೋಡಿಕೊಂಡು ಸುಮ್ಮನಿರುವಷ್ಟು ಮುಗ್ಧರೇನಲ್ಲ ರಾಜಕಾರಣಿಗಳು. ಹೀಗಾಗಿಯೇ ಕಮಿಷನ್‌, ಪರ್ಸೆಂಟೇಜ್‌ಗಳು ಬಂದಿದ್ದು. ಪೊಲೀಸ್‌ ಇಲಾಖೆಯ 'ವಸೂಲಿ'ಯಿಂದ ಹಿಡಿದು, ಲೋಕೋಪಯೋಗಿ ಇಲಾಖೆಯ ಕಾಮಗಾರಿಗಳವರೆಗೆ ಇಂತಿಷ್ಟು ಹಣ ಇಲಾಖೆಯ ಸಚಿವರಿಗೆ ಹೋಗುತ್ತದೆ ಎಂಬುದೇನೋ ಹೊಸ ಗುಟ್ಟಲ್ಲ.

ಹಾಗೆಂದು ಸರಕಾರಿ ವ್ಯವಸ್ಥೆಯಲ್ಲಿರುವ ಎಲ್ಲರೂ ಅಪ್ರಾಮಾಣಿಕರು, ಭ್ರಷ್ಟಾಚಾರಿಗಳು ಎಂದು ಸರಳೀಕರಿಸುವುದು ಕೂಡ ಸರಿಯಲ್ಲ. ಅಲ್ಲೊಬ್ಬ, ಇಲ್ಲೊಬ್ಬ ಪ್ರಾಮಾಣಿಕ ಅಧಿಕಾರಿಗಳು, ಪ್ರಾಮಾಣಿಕ ರಾಜಕಾರಣಿಗಳು ವ್ಯವಸ್ಥೆಯೊಳಗೆ ಇದ್ದೂ ಇಲ್ಲದಂತೆ ಇರುತ್ತಾರೆ. ಆದರೆ, ಕೊನೆಯವರೆಗೂ ಅವರು ವ್ಯವಸ್ಥೆಯೊಳಗೆ ಒಂದಾಗಲು ಸಾಧ್ಯವೇ ಆಗುವುದಿಲ್ಲ.

ಸರಕಾರಿ ವ್ಯವಸ್ಥೆಯ ಭ್ರಷ್ಟಾಚಾರ, ಅಪ್ರಾಮಾಣಿಕತೆಯಿಂದ ರೋಸತ್ತು ಕೆಲವರು ಕೆಲಸಕ್ಕೆ ರಾಜೀನಾಮೆ ಕೊಟ್ಟು ಹೊರಬಂದರೆ, ಕೆಲವರು ವ್ಯವಸ್ಥೆಯ ಜತೆಗೇ ಗುದ್ದಾಡುತ್ತಾ ತಮ್ಮ ಸೇವಾವಧಿಯನ್ನು ಮುಗಿಸಿರುತ್ತಾರೆ.

ಸರಕಾರದ ಮಟ್ಟದಲ್ಲಿ ಸಾವಿರಾರು ಕೋಟಿ ರೂಪಾಯಿಯ ಭ್ರಷ್ಟಾಚಾರ ನಡೆಯುತ್ತಿದ್ದರೂ ಕೆಲವೇ ಪ್ರಕರಣಗಳಲ್ಲಿ ಮಾತ್ರ ತಪ್ಪಿತಸ್ಥರಿಗೆ ಶಿಕ್ಷೆಯಾಗುತ್ತದೆ. ಶಿಕ್ಷೆಯಾದರೂ ಪ್ರಭಾವಿಗಳು ಜಾಮೀನು ಪಡೆದು ಹೊರಬರುತ್ತಾರೆ. ಇನ್ನು ಹಲವು ಪ್ರಕರಣಗಳಲ್ಲಿ ನ್ಯಾಯಾಲಯದಲ್ಲಿ ವಿಚಾರಣೆ ಪೂರ್ಣಗೊಳ್ಳುವ ವೇಳೆಗೆ ತಪ್ಪು ಎಸಗಿ, ಹಣ ಲೂಟಿ ಮಾಡಿದವರು ಬದುಕಿರುವುದೇ ಇಲ್ಲ.

ಭ್ರಷ್ಟಾಚಾರ ನನ್ನ ಕಣ್ಣಿಗೆ ಬಿದ್ದಿಲ್ಲ. ಎಲ್ಲೆಲ್ಲಿ ಭ್ರಷ್ಟಾಚಾರ ನಡೆಯುತ್ತಿದೆ ಎಂಬುದು ಕುಮಾರಸ್ವಾಮಿ ಅವರಿಗೆ ತಿಳಿದರೆ ಅದಕ್ಕೆ ಕಡಿವಾಣ ಹಾಕಲಿ.
- ಸಿದ್ದರಾಮಯ್ಯ, ಮಾಜಿ ಮುಖ್ಯಮಂತ್ರಿ
ಇತ್ತೀಚೆಗೆ ವಿಧಾನ ಸೌಧದಲ್ಲಿ ನಡೆದ ಕೆಲವು ಸಚಿವರ ಕೊಠಡಿಗಳ ರಿಪೇರಿ ಕೆಲಸ. 
ಇತ್ತೀಚೆಗೆ ವಿಧಾನ ಸೌಧದಲ್ಲಿ ನಡೆದ ಕೆಲವು ಸಚಿವರ ಕೊಠಡಿಗಳ ರಿಪೇರಿ ಕೆಲಸ. 
ಜಿ.ಮೋಹನ್ 

ವಿಧಾನಸೌಧ ಕಾಮಗಾರಿಯಲ್ಲೇ ಭ್ರಷ್ಟಾಚಾರ!

ವಿಧಾನಸೌಧ ಕಟ್ಟಿದ ಮೇಲೆ ಭ್ರಷ್ಟಾಚಾರ ಹುಟ್ಟಿದ್ದಲ್ಲ ನಿಜ. ಆದರೆ, ವಿಧಾನಸೌಧ ಕಟ್ಟಡ ಕಾಮಗಾರಿಯಲ್ಲೇ ಭ್ರಷ್ಟಾಚಾರ ನಡೆದ ಆರೋಪ ಕೇಳಿಬಂದಿತ್ತು. ಅಂದಿನ ತನಿಖಾ ಸಮಿತಿ ಕೂಡಾ ಭ್ರಷ್ಟಾಚಾರ ನಡೆದಿರುವುದು ನಿಜ ಎಂದು ಹೇಳಿತ್ತು. ಅಂದು ಭ್ರಷ್ಟಾಚಾರದ ಆರೋಪ ಹೊತ್ತು ರಾಜೀನಾಮೆ ನೀಡಿದರು ವಿಧಾನಸೌಧದ ನಿರ್ಮಾತೃ ಎಂದು ಇತಿಹಾಸ ಹೇಳುವ ಕೆಂಗಲ್‌ ಹನುಮಂತಯ್ಯ.

33 ಲಕ್ಷ ರೂಪಾಯಿ ವೆಚ್ಚದಲ್ಲಿ ಬ್ರಿಟಿಷ್ ಕಟ್ಟಡದ ಮಾದರಿಯಲ್ಲಿ ವಿಧಾನಸೌಧ ನಿರ್ಮಿಸಲು ರಾಜ್ಯದ ಮೊದಲ ಮುಖ್ಯಮಂತ್ರಿ ಕೆ.ಸಿ. ರೆಡ್ಡಿ ತೀರ್ಮಾನಿಸಿದ್ದರು. ಆಗ ಕೆ.ಸಿ. ರೆಡ್ಡಿ ಸಂಪುಟದಲ್ಲಿ ಸಚಿವರಾಗಿದ್ದ ಕೆಂಗಲ್‌ ಹನುಮಂತಯ್ಯ ಬ್ರಿಟಿಷ್ ಮಾದರಿ ಕಟ್ಟಡ ನಿರ್ಮಾಣಕ್ಕೆ ವಿರೋಧ ವ್ಯಕ್ತಪಡಿಸಿದ್ದರು.

ಮುಂದೆ ಕೆಂಗಲ್‌ ಹನುಮಂತಯ್ಯ ಮುಖ್ಯಮಂತ್ರಿಯಾದ ಬಳಿಕ ನಿರ್ಮಾಣ ವೆಚ್ಚವನ್ನು 50 ಲಕ್ಷ ರೂಪಾಯಿಗೆ ಹೆಚ್ಚಿಸಿದ್ದರು. ಕಾಮಗಾರಿ ಆರಂಭವಾಗುವ ವೇಳೆಗೆ ನಿರ್ಮಾಣ ವೆಚ್ಚ 50 ಲಕ್ಷದಿಂದ 1.75 ಕೋಟಿ ರೂಪಾಯಿಗೆ ಏರಿತ್ತು. ಕಾಮಗಾರಿ ಪೂರ್ಣಗೊಳ್ಳುವ ವೇಳೆಗೆ ನಿರ್ಮಾಣ ವೆಚ್ಚ 1.84 ಕೋಟಿ ರೂಪಾಯಿ ತಲುಪಿತ್ತು.

ನಿರ್ಮಾಣ ವೆಚ್ಚ ಏರಿಕೆಯಾದ ಕಾರಣಕ್ಕೆ ಕೆಂಗಲ್‌ ಹನುಮಂತಯ್ಯ ವಿರುದ್ಧ ಭ್ರಷ್ಟಾಚಾರದ ಆರೋಪ ಕೇಳಿಬಂದಿತ್ತು. ತನಿಖಾ ಸಮಿತಿ ಕೂಡಾ ಕೆಂಗಲ್‌ ತಪ್ಪಿತಸ್ಥರು ಎಂದು ಹೇಳಿತ್ತು. ಅವಿಶ್ವಾಸ ನಿರ್ಣಯ ಮಂಡನೆಯಿಂದ ಬೇಸತ್ತು ಕೆಂಗಲ್‌ ರಾಜೀನಾಮೆ ನೀಡಿದ್ದರು.

ವಿಧಾನಸೌಧದ ಉದ್ಘಾಟನೆ ವೇಳೆಗೆ ಕೆಂಗಲ್‌ ಹನುಮಂತಯ್ಯ ಅಧಿಕಾರದಲ್ಲಿರಲಿಲ್ಲ. ಒಂದು ದಿನವೂ ಅವರು ವಿಧಾನಸೌಧದಲ್ಲಿ ಅಧಿಕಾರ ಚಲಾಯಿಸಲಿಲ್ಲ. ವಿಧಾನಸೌಧ ಕೆಂಗಲ್ ಹನುಮಂತಯ್ಯ ಕಟ್ಟಿಸಿದ ಕಟ್ಟಡ ಎಂಬ ಹೆಸರು ಉಳಿದರೂ, ಇತಿಹಾಸ ಕೆದಕಿದರೆ ರಾಜ್ಯದ ಶಕ್ತಿಕೇಂದ್ರದ ಅಡಿಪಾಯದಲ್ಲೇ ಭ್ರಷ್ಟಾಚಾರದ ವಾಸನೆ ಬಡಿಯುತ್ತದೆ!