‘136’ ಕುಟುಕು ಕಾರ್ಯಾಚರಣೆಯಲ್ಲಿ PMO- Paytm ‘ಖಾಸಗಿ ನೀತಿ’ ಸೋರಿಕೆ!
COVER STORY

‘136’ ಕುಟುಕು ಕಾರ್ಯಾಚರಣೆಯಲ್ಲಿ PMO- Paytm ‘ಖಾಸಗಿ ನೀತಿ’ ಸೋರಿಕೆ!

ಪೇಟಿಎಂನಂಥ ಹಣಕಾಸು ಸೇವೆಯ ಆಪ್‌ ಕಂಪೆನಿ ತನ್ನ ಖಾಸಗಿ ನೀತಿಯನ್ನು ಉಲ್ಲಂಘಿಸಿ ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ಸೋರಿಕೆ ಮಾಡಲು ಹಿಂದೇಟು ಹಾಕುವುದಿಲ್ಲ ಎಂಬುದು ‘ಕೋಬ್ರಾಪೋಸ್ಟ್‌’ನ ಕುಟುಕು ಕಾರ್ಯಾಚರಣೆಯಿಂದ ಬಹಿರಂಗವಾಗಿದೆ.

ಕಾಶ್ಮೀರದಲ್ಲಿ ಕಳೆದ ವರ್ಷ ನಡೆದ ಭದ್ರತಾ ಪಡೆಯ ಸಿಬ್ಬಂದಿ ಮೇಲೆ ಕಲ್ಲು ತೂರಾಟ ಘಟನೆಯ ನಂತರ ಪೇಟಿಎಂ ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ನೀಡುವಂತೆ ಪ್ರಧಾನಮಂತ್ರಿ ಕಾರ್ಯಾಲಯ ಕೇಳಿತ್ತು ಎಂಬ ಸಂಗತಿಯನ್ನು ಪೇಟಿಎಂನ ಹಿರಿಯ ಉಪಾಧ್ಯಕ್ಷ ಅಜಯ್‌ ಶೇಖರ್‌ ಶರ್ಮಾ ಒಪ್ಪಿಕೊಂಡಿರುವ ಕುಟುಕು ಕಾರ್ಯಾಚರಣೆಯ ವಿಡಿಯೊ ಅನ್ನು ‘ಕೋಬ್ರಾಪೋಸ್ಟ್’ ಶುಕ್ರವಾರ ಬಿಡುಗಡೆ ಮಾಡಿದೆ.

“ಜಮ್ಮು ಮತ್ತು ಕಾಶ್ಮೀರದಲ್ಲಿ ಕಲ್ಲು ತೂರಾಟ ಘಟನೆ ನಡೆದ ಬಳಿಕ ಅಲ್ಲಿನ ಪೇಟಿಎಂ ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ನೀಡುವಂತೆ ಪ್ರಧಾನಮಂತ್ರಿ ಕಾರ್ಯಾಲಯದಿಂದ ಖುದ್ದು ನನಗೆ ದೂರವಾಣಿ ಕರೆ ಬಂದಿತ್ತು. ಕಲ್ಲು ತೂರಾಟ ನಡೆಸಿದವರ ಪೈಕಿ ಪೇಟಿಎಂ ಬಳಕೆದಾರರೂ ಇರಬಹುದು ಎಂಬ ಕಾರಣದಿಂದ ಮಾಹಿತಿ ಕೇಳಲಾಗಿತ್ತು” ಎಂದು ಅಜಯ್‌ ಶೇಖರ್‌ ಶರ್ಮಾ ಕುಟುಕು ಕಾರ್ಯಾಚರಣೆ ವೇಳೆ ಒಪ್ಪಿಕೊಂಡಿದ್ದಾರೆ.

ಪತ್ರಕರ್ತ ಪುಷ್ಪ ಶರ್ಮಾ ‘ಕೋಬ್ರಾಪೋಸ್ಟ್‌’ಗಾಗಿ ಈ ಕುಟುಕು ಕಾರ್ಯಾಚರಣೆ ನಡೆಸಿದ್ದರು. ತಮ್ಮನ್ನು ‘ಸಂಘಟನೆ’ಯ ಗುಪ್ತ ವ್ಯವಸ್ಥೆಯ ಕಾರ್ಯಗಳನ್ನು ಜಾರಿಗೊಳಿಸುವ ಕಾರ್ಯಕರ್ತ ಎಂದು ಹೇಳಿಕೊಂಡಿದ್ದ ಪುಷ್ಟ ಶರ್ಮಾ ಕುಟುಕು ಕಾರ್ಯಾಚರಣೆಯ ಮೂಲಕ ಪೇಟಿಎಂನ ‘ಹಿಂದುತ್ವ’ ಅಂತರಂಗವನ್ನು ಬಹಿರಂಗಗೊಳಿಸಿದ್ದಾರೆ.

ಹಲವು ಮಾಧ್ಯಮ ಸಂಸ್ಥೆಗಳ ಬಣ್ಣ ಬಯಲು ಮಾಡಿರುವ ಪುಷ್ಪ ಶರ್ಮಾ ಪೇಟಿಎಂನಂಥ ಹಣಕಾಸು ಸೇವೆಯ ಆಪ್‌ ಕಂಪೆನಿ ತನ್ನ ಖಾಸಗಿ ನೀತಿಯನ್ನು ಉಲ್ಲಂಘಿಸಿ ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ಸೋರಿಕೆ ಮಾಡಲು ಹಿಂದೇಟು ಹಾಕುವುದಿಲ್ಲ ಎಂಬುದು ಈ ಕುಟುಕು ಕಾರ್ಯಾಚರಣೆಯಿಂದ ಬೆಳಕಿಗೆ ಬಂದಿದೆ.

ಪೇಟಿಎಂ ತನ್ನ ಖಾಸಗಿ ನೀತಿಯಲ್ಲಿ ಹೇಳಿಕೊಂಡಿರುವಂತೆ ಪೇಟಿಎಂ ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ಬೇರೆಯವರೊಂದಿಗೆ ಹಂಚಿಕೊಳ್ಳುವಂತಿಲ್ಲ. “ಪೇಟಿಎಂ ಬಳಕೆದಾರರ ಇಮೇಲ್‌, ಮೊಬೈಲ್‌ ಸಂಖ್ಯೆ ಸೇರಿದಂತೆ ಯಾವುದೇ ವೈಯಕ್ತಿಕ ಮಾಹಿತಿಯನ್ನು ಇತರರೊಂದಿಗೆ ಹಂಚಿಕೊಳ್ಳುವುದಿಲ್ಲ” ಎನ್ನುತ್ತದೆ ಪೇಟಿಎಂ ಖಾಸಗಿ ನೀತಿ.

ಆದರೆ, ಹಿಂದುತ್ವ ಪ್ರಚಾರದ ಹೆಸರಿನಲ್ಲಿ ಕುಟುಕು ಕಾರ್ಯಚಾರಣೆಗೆ ಇಳಿದಿದ್ದ ಪುಷ್ಪ ಶರ್ಮಾ ಬಳಿಕ ಸಂಭಾಷಣೆ ನಡೆಸಿರುವ ಪೇಟಿಎಂನ ಹಿರಿಯ ಉಪಾಧ್ಯಕ್ಷ ಅಜಯ್‌ ಶೇಖರ್‌ ಶರ್ಮಾ, ಈ ಖಾಸಗಿ ನೀತಿಯನ್ನು ಉಲ್ಲಂಘಿಸುವ ಮಾತನ್ನಾಡಿದ್ದಾರೆ.

ರಸಹ್ಯ ಕಾರ್ಯಾಚರಣೆ ವಿಡಿಯೊ ಬಿಡುಗಡೆಯಾದ ಬಳಿಕ ಪೇಟಿಎಂ, ‘ಇದು ಸತ್ಯಕ್ಕೆ ದೂರವಾದ ವಿಚಾರ’ ಎಂದಿದೆ. “ಪ್ರಚೋದನಕಾರಿ ತಲೆಬರಹದೊಂದಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವಿಡಿಯೊ ಸತ್ಯಕ್ಕೆ ದೂರವಾದುದು. ನಮ್ಮ ಬಳಕೆದಾರರ ವೈಯಕ್ತಿಕ ಮಾಹಿತಿ ನೂರಕ್ಕೆ ನೂರರಷ್ಟು ಸುರಕ್ಷಿತವಾಗಿದೆ. ಮಾಹಿತಿಗಾಗಿ ಮನವಿ ಸಲ್ಲಿಸುವ ಕಾನೂನು ಜಾರಿಗೊಳಿಸುವ ಸರಕಾರಿ ಸಂಸ್ಥೆಗಳನ್ನು ಹೊರತುಪಡಿಸಿ ನಾವು ನಿಮಯ ಉಲ್ಲಂಘಿಸಿ ಯಾವ ಮಾಹಿತಿಯನ್ನೂ ಯಾರೊಂದಿಗೂ ಹಂಚಿಕೊಳ್ಳುವುದಿಲ್ಲ” ಎಂದು ಪೇಟಿಎಂ ಸ್ಪಷ್ಟನೆ ನೀಡಿದೆ.

ಆದರೆ, ವಿಡಿಯೊದಲ್ಲಿರುವುದು ತಮ್ಮ ಕಂಪೆನಿಯ ಹಿರಿಯ ಉಪಾಧ್ಯಕ್ಷರು ಹೌದೋ, ಅಲ್ಲವೋ ಎಂಬುದನ್ನು ಪೇಟಿಎಂನ ಈ ಹೇಳಿಕೆ ಸ್ಪಷ್ಟಪಡಿಸಿಲ್ಲ.

ಅಪಾಯಕಾರಿ ಮೊಬೈಲ್ ಆಪ್?

ಪೇಟಿಎಂನಂಥ ಮೊಬೈಲ್‌ ಆಪ್‌ಗಳು ಎಷ್ಟು ಅಪಾಯಕಾರಿ ಎಂಬುದು ಈ ಕುಟುಕು ಕಾರ್ಯಾಚರಣೆಯಿಂದ ಬೆಳಕಿಗೆ ಬಂದಿದೆ.

“ಆಪ್‌ಗಳು ಎಷ್ಟು ಅಪಾಯಕಾರಿ ಎಂದು ಬಹಿರಂಗ ಮಾಡುವ ಉದ್ದೇಶದಿಂದಲೇ ನಾವು ಸುದ್ದಿ ವಾಹಿನಿಗಳು, ಮಾಧ್ಯಮ ಸಂಸ್ಥೆಗಳ ಜತೆಗೆ ಪೇಟಿಎಂನಂಥ ಹಣಕಾಸು ಆಪ್‌ ಕಂಪೆನಿಯನ್ನುಕುಟುಕು ಕಾರ್ಯಾಚರಣೆಗೆ ಆರಿಸಿಕೊಂಡೆವು. ಬೇರಾರೂ ಮಾಡಲಾಗದಂಥ ಕೆಲಸವನ್ನು ಒಂದು ಮೊಬೈಲ್‌ ಆಪ್‌ ಮಾಡಬಲ್ಲದು ಎಂಬುದು ಈ ಕಾರ್ಯಾಚರಣೆಯಿಂದ ಬಯಲಾಗಿದೆ” ಎಂದಿದ್ದಾರೆ ‘ಕೋಬ್ರಾಪೋಸ್ಟ್‌’ನ ಮುಖ್ಯಸ್ಥ ಅನಿರುದ್ಧ ಬಹಾಲ್‌.

“ಪೇಟಿಎಂ ಕಂಪೆನಿ ಬಿಜೆಪಿ, ಆರ್‌ಎಸ್‌ಎಸ್‌ನ ಸಿದ್ಧಾಂತಗಳ ಬಗ್ಗೆ ಉದಾರವಾಗಿದೆ ಎಂಬುದನ್ನು ಒಪ್ಪಿಕೊಳ್ಳುವುದರ ಜತೆಗೆ ತನ್ನಲ್ಲಿರುವ ಬಳಕೆದಾರರ ಮಾಹಿತಿಯನ್ನು ಸೋರಿಕೆ ಮಾಡಲು ಹಿಂದೇಟು ಹಾಕುವುದಿಲ್ಲ ಎಂಬುದನ್ನೂ ಒಪ್ಪಿಕೊಂಡಿದೆ” ಎನ್ನುತ್ತಾರೆ ಬಹಾಲ್.

‘ಡಿಲೀಡ್‌ ಪೇಟಿಎಂ’ ಅಭಿಯಾನ:

ಪೇಟಿಎಂ ವೈಯಕ್ತಿಕ ಮಾಹಿತಿ ಸೋರಿಕೆಗೆ ‘ಮುಕ್ತ’ವಾಗಿದೆ ಎಂಬುದು ಕೋಬ್ರಾಪೋಸ್ಟ್‌ ಕುಟುಕು ಕಾರ್ಯಾಚರಣೆಯಿಂದ ಬಹಿರಂಗವಾದ ಬೆನ್ನಲ್ಲೇ #DeletePaytm (ಡಿಲೀಟ್‌ ಪೇಟಿಎಂ) ಅಭಿಯಾನ ಆರಂಭವಾಗಿದೆ.

ಟ್ವಿಟರ್‌ ಮತ್ತು ಫೇಸ್‌ಬುಕ್‌ನಲ್ಲಿ #DeletePaytm ಹ್ಯಾಷ್‌ಟ್ಯಾಗ್‌ ಜತೆಗೆ ಪೇಟಿಎಂ ಆಪ್‌ ಅನ್ನು ಮೊಬೈಲ್‌ನಿಂದ ಅನ್ಇನ್‌ಸ್ಟಾಲ್‌ ಮಾಡುವಂತೆ ನೂರಾರು ಮಂದಿ ಪೋಸ್ಟ್ ಹಾಕಿದ್ದಾರೆ.

ಪೇಟಿಎಂ ಜಾಹೀರಾತಿನಲ್ಲಿ ಮೋದಿ:

ಈ ಹಿಂದೆ ಜಾಹೀರಾತಿನಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಚಿತ್ರವನ್ನು ಪೇಟಿಎಂ ಬಳಸಿಕೊಂಡಿತ್ತು. 2016ರ ನವೆಂಬರ್‌ 8ರಂದು ಮೋದಿ 500 ಮತ್ತು 1000 ಮುಖಬೆಲೆಯ ನೋಟುಗಳನ್ನು ರದ್ದು ಮಾಡಿದ್ದರು. ಮರುದಿನವೇ ಪೇಟಿಎಂ ಮೋದಿ ಅಭಿನಂದಿಸಿ ದೇಶದ ಪ್ರಮುಖ ಪತ್ರಿಕೆಗಳಲ್ಲಿ ಮುಖಪುಟ ಜಾಹೀರಾತನ್ನು ನೀಡಿತ್ತು. ಈ ಜಾಹೀರಾತಿನಲ್ಲಿ ಮೋದಿ ಚಿತ್ರವನ್ನು ಬಳಸಲಾಗಿತ್ತು.

ಪೇಟಿಎಂನ ಈ ಜಾಹೀರಾತಿಗೆ ಅಂದು ಹಲವರು ವಿರೋಧ ವ್ಯಕ್ತಪಡಿಸಿದ್ದರು. ‘ನೋಟು ರದ್ದತಿಯ ದೊಡ್ಡ ಪ್ರಯೋಜನ ಪಡೆಯುವ ಪೇಟಿಎಂ ಕಂಪೆನಿ ನಾಚಿಕೆ ಬಿಟ್ಟು ದೇಶದ ಪ್ರಮುಖ ಪತ್ರಿಕೆಗಳಲ್ಲಿ ಮೋದಿ ಚಿತ್ರದೊಂದಿಗೆ ಜಾಹೀರಾತು ನೀಡಿದೆ’ ಎಂದು ಹಲವರು ಟೀಕಿಸಿದ್ದರು.

ಮಾಧ್ಯಮ ಸಂಸ್ಥೆಗಳು ಮಾತ್ರವಲ್ಲದೆ ಸೇವಾ ವಲಯದ ಪೇಟಿಎಂನಂಥ ಕಂಪೆನಿಗಳು ಕೂಡಾ ಆರ್‌ಎಸ್‌ಎಸ್‌ ಸಿದ್ಧಾಂತಗಳನ್ನು ಒಪ್ಪಿಕೊಂಡು ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ಮೂರನೇ ವ್ಯಕ್ತಿಯೊಂದಿಗೆ ಹಂಚಿಕೊಳ್ಳಲು ಮುಂದಾಗಿರುವುದು ಖಾಸಗಿ ವಲಯದ ನೈತಿಕ ದಿವಾಳಿತನವನ್ನು ಜಗಜ್ಜಾಹೀರು ಮಾಡಿದೆ.