ಫುಲ್‌ ಟೈಮ್‌ ನಟ, ಹವ್ಯಾಸಿ ರಾಜಕಾರಣಿ: ನೇಪಥ್ಯಕ್ಕೆ ಸರಿದ ಮಂಡ್ಯದ ಗಂಡು ಅಂಬರೀಶ್‌
COVER STORY

ಫುಲ್‌ ಟೈಮ್‌ ನಟ, ಹವ್ಯಾಸಿ ರಾಜಕಾರಣಿ: ನೇಪಥ್ಯಕ್ಕೆ ಸರಿದ ಮಂಡ್ಯದ ಗಂಡು ಅಂಬರೀಶ್‌

ಪಂದ್ಯದ ಕಡೆಯ ಓವರ್‌ನಲ್ಲಿ ಹೊಡೆಬಡೆಯ ಆಟವಾಡಿ ಕಾಂಗ್ರೆಸ್‌ಗೆ ಎಷ್ಟು ಸಾಧ್ಯವೋ ಅಷ್ಟು ನಷ್ಟವುಂಟು ಮಾಡಿ ಅಂಬರೀಶ್‌ ಹೊರ ನಡೆದಿದ್ದಾರೆ. ಈ ಮೂಲಕ ಹಳೇ ಮೈಸೂರು ಭಾಗದ, ಒಕ್ಕಲಿಗ ಪ್ರಾಬಲ್ಯದ ಜಿಲ್ಲೆಯ ಕಾಂಗ್ರೆಸ್‌ ಕೊಂಡಿಯೊಂದು ಕಳಚಿದೆ.

ಕನ್ನಡದ ಹಿರಿಯ ನಟ, ಮಾಜಿ ಕೇಂದ್ರ ಸಚಿವ, ಮಾಜಿ ರಾಜ್ಯ ಸಚಿವ, ಮಂಡ್ಯದ ಗಂಡು ಮತ್ತು ಹವ್ಯಾಸಿ ರಾಜಕಾರಣಿ ಎಂದೇ ಬಿಂಬಿತವಾಗಿದ್ದ ಅಂಬರೀಶ್‌ ರಾಜಕೀಯ ನಿವೃತ್ತಿ ಘೋಷಿಸಿದ್ದಾರೆ.

ಈ ಮೂಲಕ ರಂಗಿನ ಲೋಕದಿಂದ ನಡೆದು ಬಂದ ಅಂಬರೀಶ್‌ ರಾಜಕೀಯಕ್ಕೆ ನಡಿಗೆ ಅಧಿಕೃತವಾಗಿ ಅಂತ್ಯಗೊಂಡಿದೆ.

ನೇರ ನುಡಿ, ಒರಟುತನ ಮತ್ತು ‘ಡೋಂಟ್‌ ಕೇರ್‌’ ವ್ಯಕ್ತಿತ್ವದಿಂದ ಗುರುತಿಸಿಕೊಂಡಿದ್ದ ಅಂಬರೀಶ್‌ ಇತ್ತೀಚಿನ ದಿನಗಳಲ್ಲಿ ಸಕ್ರಿಯ ರಾಜಕಾರಣದಿಂದ ಹಿಂದೆ ಸರಿದಿದ್ದರು. ಅದಕ್ಕೆ ಅವರ ಅನಾರೋಗ್ಯವೂ ಕಾರಣ ಎನ್ನಲಾಗಿತ್ತು. ಅನಾರೋಗ್ಯದಿಂದ ಸಿಂಗಾಪುರಕ್ಕೆ ಚಿಕಿತ್ಸೆಗೆಂದು ಅಂಬರೀಶ್‌ ಹೋಗಿ ಬಂದ ನಂತರ ಮಂತ್ರಿಗಿರಿಯನ್ನು ಅಂಬರೀಶ್‌ ಕಳೆದುಕೊಂಡಿದ್ದರು. ಇದು ಕಾಂಗ್ರೆಸ್‌ ಮುಖಂಡರ ಜತೆಗಿನ ಅಂಬರೀಶ್‌ ವೈಮನಸ್ಸು ತಾರಕ್ಕೇರಲು ಕಾರಣವಾಗಿತ್ತು.

‘ಕೈ’ ಕೊಟ್ಟ ಕಾಂಗ್ರೆಸ್‌:

ಅನಾರೋಗ್ಯದ ಹಿನ್ನೆಲೆಯಲ್ಲಿ ಜನರ ಬಳಿಗೆ ಹೋಗಲು ಸಾಧ್ಯವಿಲ್ಲದ ಕಾರಣ ನೀಡಿ ಮಂತ್ರಿ ಪದವಿಯನ್ನು ಕಿತ್ತುಕೊಳ್ಳಲಾಗಿತ್ತು. ಇದರಿಂದ ಸಹಜವಾಗಿ ಅಂಬರೀಶ್‌ ಕೋಪಗೊಂಡಿದ್ದರು. ಸಿದ್ದರಾಮಯ್ಯ ಮತ್ತು ಅಂಬರೀಶ್‌ ನಡುವಿನ ಮುಸುಕಿನ ಗುದ್ದಾಟಕ್ಕೆ ಮೊದಲ ಮುನ್ನುಡಿ ಸಿಕ್ಕಿದ್ದೇ ಇಲ್ಲಿ.

2006ರಲ್ಲಿ ನಡೆದ ಚಾಮುಂಡೇಶ್ವರಿ ಉಪಚುನಾವಣೆ ವೇಳೆ ಅಂಬರೀಶ್‌, ಸಿದ್ದರಾಮಯ್ಯ ಪರವಾಗಿ ಪ್ರಚಾರ ಕಾರ್ಯ ಮಾಡಿದ್ದರು. ಕೆಲವೇ ಮತಗಳ ಅಂತರದಲ್ಲಿ ಸಿದ್ದರಾಮಯ್ಯ ಗೆಲ್ಲುವಲ್ಲಿ ಅಂಬರೀಶ್‌ ಪಾತ್ರವೂ ಪ್ರಮುಖವಾಗಿತ್ತು. ಜತೆಗೆ ಕಾಂಗ್ರೆಸ್‌ಗೆ ಆಗ ತಾನೆ ಸೇರ್ಪಡೆಯಾಗಿದ್ದ ಸಿದ್ದರಾಮಯ್ಯರನ್ನು ಮೂಲ ಕಾಂಗ್ರೆಸ್ಸಿಗರು ಪಕ್ಷದ ಮುಖವಾಣಿಯಾಗಿ ಸ್ವೀಕರಿಸಲು ಸಿದ್ಧರಿಲ್ಲದ ಸಂದರ್ಭದಲ್ಲಿ ಅಂಬರೀಶ್‌ ಜತೆ ನಿಂತಿದ್ದರು.

ಕುರುಬ ಸಮುದಾಯದ ನಾಯಕ ಸಿದ್ದರಾಮಯ್ಯರನ್ನು ‘ಕನಕ ರಾಜ’ನನ್ನಾಗಿ ಮಾಡಿ, ಮುಖ್ಯಮಂತ್ರಿಯಾಗಿಸಿ ಎಂಬ ಮಾತನ್ನು ಮೊದಲು ನುಡಿದಿದ್ದು ಅಂಬರೀಶ್‌. ಆದರೆ ಅಧಿಕಾರ ಬಂದ ನಂತರ ಸಿದ್ದರಾಮಯ್ಯ ಅಂಬರೀಶ್‌ರನ್ನು ದೂರಮಾಡಿದರು ಎಂಬ ಅಭಿಪ್ರಾಯವಿದೆ.

ಆದರೆ ಅಂಬರೀಶ್‌ ಎಂದಿಗೂ ಸಕ್ರಿಯ ರಾಜಕಾರಣದಲ್ಲಿ ಆಸಕ್ತಿ ತೋರಿರಲಿಲ್ಲ. ತಮಗೆ ಸಿಕ್ಕ ವಸತಿ ಖಾತೆಯ ಯೋಜನೆಯಡಿ ಸಾವಿರಾರು ಮನೆಗಳನ್ನು ನಿರ್ಗತಿಕರಿಗೆ ಮಾಡಿ ಕೊಡುವ ಅವಕಾಶವಿದ್ದರೂ, ಇಚ್ಚಾಶಕ್ತಿ ತೋರಲಿಲ್ಲ. ಅಧಿಕಾರಿಗಳ ಜತೆಗಿನ ಸಭೆಯಲ್ಲಿ ಅವರು ನಿದ್ದೆಗೆ ಜಾರಿದ ವಿಡಿಯೋ ಹಡಿದಾಡಿತ್ತು. ಅಂಬರೀಶ್‌ರ ನಡೆ ಕಾಂಗ್ರೆಸ್‌ ಹೈಕಮಾಂಡ್‌ಗೆ ಬೇಸರ ಮೂಡಿಸಿತ್ತು. ಜತೆಗೆ ಅನಾರೋಗ್ಯದ ನೆಪವೂ ಸೇರಿಕೊಂಡ ಹಿನ್ನೆಲೆಯಲ್ಲಿ ಸಂಪುಟ ವಿಸ್ತರಣೆ ವೇಳೆ ಅಂಬರೀಶ್‌ರನ್ನು ಕೈಬಿಡಲಾಗಿತ್ತು.

ನಂತರ ಕಾಂಗ್ರೆಸ್‌ ಮತ್ತು ಸಿದ್ದರಾಮಯ್ಯ ವಿರುದ್ಧ ಬಹಿರಂಗವಾಗಿಯೇ ಅಂಬರೀಶ್‌ ಅಸಮಾಧಾನವನ್ನು ಹೊರ ಹಾಕಿದರು. ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಲು ಮುಂದಾದರು. ಒಕ್ಕಲಿಗ ಜಾತಿ ಸಮೀಕರಣ ಮತ್ತು ಬಹಿರಂಗವಾಗಿ ಪಕ್ಷದ ವಿರುದ್ಧ ಅಂಬರೀಶ್‌ ಕಿಡಿಕಾರುತ್ತಾರೆ ಎಂಬುದನ್ನು ಅರಿತ ಕಾಂಗ್ರೆಸ್‌ ಮುಖಂಡರು ಅಂಬರೀಶ್‌ ಮನವೊಲಿಕೆಗೆ ಮುಂದಾದರು. ಆ ವೇಳೆಗಾಗಲೇ ಅಂಬರೀಶ್‌ರೇ ಮುಂದೆ ತಂದ ರಮ್ಯಾ (ದಿವ್ಯ ಸ್ಪಂದನ) ಕಾಂಗ್ರೆಸ್‌ನಲ್ಲಿ ಗಟ್ಟಿ ಹಿಡಿತ ಸಾಧಿಸಿದ್ದರು. ಅಂಬರೀಶ್‌ಗೆ ಮಂತ್ರಿ ಪದವಿ ತಪ್ಪಿರುವುದಕ್ಕೆ ರಮ್ಯಾ ಕೂಡ ಕಾರಣ ಎಂಬ ಆರೋಪಗಳೂ ಕೇಳಿ ಬಂದಿತ್ತು.

ಹಲವು ಸುತ್ತಿನ ಮಾತುಕತೆಯ ನಂತರ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡುವ ನಿರ್ಧಾರದಿಂದ ಅಂಬರೀಶ್‌ ಹೊರಬಂದಿದ್ದರು. ಈ ಬಾರಿ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್‌ನಿಂದ ಅಂಬರೀಶ್‌ಗೆ ಟಿಕೆಟ್‌ ನೀಡುವುದಿಲ್ಲ ಎಂಬ ಮಾತುಗಳೂ ಕೇಳಿಬಂದಿತ್ತು. ಕ್ಷೇತ್ರಕ್ಕೆ ಭೇಟಿ ನೀಡುವುದಿಲ್ಲ, ಜನರ ಕಷ್ಟ ಕೇಳುವುದಿಲ್ಲ, ಚುನಾವಣೆ ಬಂದಾಗ ಮಾತ್ರ ಮತ ಕೇಳುತ್ತಾರೆ, ಪಕ್ಷದ ಸಂಘಟನೆಯಲ್ಲಿ ಸಕ್ರಿಯರಾಗಿಲ್ಲ ಎಂಬೆಲ್ಲಾ ಆರೋಪಗಳು ಅಂಬರೀಶ್‌ ಮೇಲಿತ್ತು. ಆದರೆ ಕಡೆ ಕ್ಷಣದಲ್ಲಿ ಅಂಬರೀಶ್‌ಗೆ ಟಿಕೆಟ್‌ ನೀಡಲು ಕಾಂಗ್ರೆಸ್‌ ಮುಂದಾಗಿತ್ತು.

ಉಳಿದೊಬ್ಬ ಒಕ್ಕಲಿಗ ನಾಯಕನೂ ದೂರ:

ಕಾಂಗ್ರೆಸ್‌ ಅಂತಿಮ ಅಭ್ಯರ್ಥಿಗಳ ಪಟ್ಟಿಯಲ್ಲಿ ಅಂಬರೀಶ್‌ಗೆ ಮಂಡ್ಯದಿಂದ ಟಿಕೆಟ್‌ ನೀಡಲಾಯ್ತು. ಆದರೆ ‘ಬಿ’ ಫಾರ್ಮ್‌ ಒಡೆಯಲು ಅಂಬರೀಶ್‌ ಬರಲಿಲ್ಲ. ಆಗಲಾದರೂ ಕಾಂಗ್ರೆಸ್‌ ಹೈಕಮಾಂಡ್‌ ಅರಿತು ಬೇರೆ ಅಭ್ಯರ್ಥಿಗೆ ಟಿಕೆಟ್‌ ನೀಡಿದ್ದರೆ ಮುಖಭಂಗದಿಂದ ತಪ್ಪಿಸಿಕೊಳ್ಳಬಹುದಿತ್ತು. ಆದರೆ ರಾಷ್ಟ್ರೀಯ ಪಕ್ಷವಾದ ಕಾಂಗ್ರೆಸ್‌ ಅಂಬರೀಶ್‌ ನಡೆಯನ್ನು ಅರ್ಥೈಸುವಲ್ಲಿ ಎಡವಿತ್ತು. ಅದರ ಪರಿಣಾಮವೇ ಮಂಗಳವಾರ ಅಂಬರೀಶ್‌ ಪತ್ರಿಕಾಗೋಷ್ಠಿಯಲ್ಲಿ ಪರೋಕ್ಷವಾಗಿ ಸಿದ್ದರಾಮಯ್ಯ ಮತ್ತು ಕಾಂಗ್ರೆಸ್‌ ವಿರುದ್ಧ ವಾಗ್ದಾಳಿ ನಡೆಸಿದ್ದು.

ಈಗಾಗಲೇ ಹಳೆ ಮೈಸೂರು ಭಾಗದಲ್ಲಿ ಒಕ್ಕಲಿಗ ಸಮುದಾಯ ಸಿದ್ದರಾಮಯ್ಯ ಹಾಗೂ ಕಾಂಗ್ರೆಸ್ ವಿರುದ್ಧ ಒಂದಾಗಿದೆ. ಸಿದ್ದರಾಮಯ್ಯರನ್ನು ಸೋಲಿಸಲೇಬೇಕು, ಕಾಂಗ್ರೆಸ್‌ ವಿರುದ್ಧ ಮತ ಚಲಾಯಿಸಬೇಕು ಎಂಬ ನಿರ್ಧಾರಕ್ಕೆ ಬಂದಿದೆ. ಈ ಹೊತ್ತಿನಲ್ಲಿ ಇದ್ದ ಕೆಲವೇ ಕೆಲವು ಒಕ್ಕಲಿಗ ನಾಯಕರಲ್ಲಿ ಒಬ್ಬರಾದ ಅಂಬರೀಶ್‌ರನ್ನು ಕಳೆದುಕೊಂಡಿದ್ದಾರೆ.

ಉರಿಯುವ ಬೆಂಕಿಗೆ ತುಪ್ಪ ಹಾಕುವ ಕೆಲಸವನ್ನು ಅಂಬರೀಶ್‌ ಮಾಡಿದ್ದಾರೆ. ಆ ಮೂಲಕ ಚುನಾವಣೆ ಹೊಸ್ತಿಲಲ್ಲಿ ಕಾಂಗ್ರೆಸ್‌ಗೆ ಬಲವಾದ ಪೆಟ್ಟು ಕೊಟ್ಟು, ಪಕ್ಷದ ವಿರುದ್ಧವಿದ್ದ ಅಸಮಾಧಾನವನ್ನು ತೀರಿಸಿಕೊಂಡಿದ್ದಾರೆ.

ಸಿದ್ದರಾಮಯ್ಯ ವಿರುದ್ಧ ಹರಿಹಾಯ್ದ ಅಂಬಿ:

ಮುಖ್ಯಮಂತ್ರಿ ಸಿದ್ದರಾಂಯ್ಯ ವಿರುದ್ಧ ಅಂಬರೀಶ್‌ ಹರಿಹಾಯ್ದಿದ್ದಾರೆ. ಕಾಂಗ್ರೆಸ್‌ ಪಕ್ಷ ತಮಗೆ ಎಲ್ಲವನ್ನೂ ಕೊಟ್ಟಿದೆ, ಕೇಂದ್ರ ಮಂತ್ರಿ ಮಾಡಿದೆ. ಆದರೆ ಇತ್ತೀಚೆಗೆ ಆರೋಗ್ಯ ಸರಿಯಿಲ್ಲ ಅದಕ್ಕೇ ರಾಜಕೀಯ ನಿವೃತ್ತಿ ಪಡೆಯುತ್ತಿದ್ದೇನೆ ಎಂದವರು ಹೇಳಿದ್ದಾರೆ. ಅದರ ಜತೆಗೆ ಸಿದ್ದರಾಮಯ್ಯ ಬದಾಮಿಗೆ ಓಡಿಹೋಗಿದ್ದು ತೃಪ್ತಿ ನೀಡಿಲ್ಲ ಎಂದಿದ್ದಾರೆ.

“ಮುಖ್ಯಮಂತ್ರಿಯಾದವರು ಸೋಲಿಗೆ ಹೆದರಿ ಕ್ಷೇತ್ರ ಬಿಡುವುದು ನನಗೆ ತೃಪ್ತಿ ನೀಡಿಲ್ಲ. ಸೋಲೋ ಗೆಲುವೋ ಧೈರ್ಯವಾಗಿ ಚುನಾವಣೆ ಎದುರಿಸಬೇಕಿತ್ತು. ನನಗೂ ಮಂಡ್ಯ ಬಿಟ್ಟು ಬೆಂಗಳೂರು ಉತ್ತರದಿಂದ ಸಂಸದನಾಗುವಂತೆ ಬಿಜೆಪಿ ಎಂಎಲ್‌ಎಗಳು ಕರೆದಿದ್ದರು. ಆದರೆ ನಾನು ಮಂಡ್ಯ ಬಿಡಲಿಲ್ಲ. ಮಂಡ್ಯದ ಗಂಡಾದೆ,”
ಅಂಬರೀಶ್‌, ನಟ

ಸಿದ್ದರಾಮಯ್ಯ ಮುಖ್ಯಮಂತ್ರಿ ಆಗುವಲ್ಲಿ ತಮ್ಮದೂ ಪಾತ್ರವಿದೆ ಎನ್ನುವ ಮೂಲಕ ಅಂಬರೀಶ್‌, ಸಿದ್ದರಾಮಯ್ಯ ಮೇಲೆ ಅಸಮಾಧಾನ ಇರುವುದನ್ನು ಪರೋಕ್ಷವಾಗಿ ತಿಳಿಸಿದರು. ಸಕ್ರಿಯ ರಾಜಕಾರಣಕ್ಕೆ ಮತ್ತೆ ಬರುವುದಿಲ್ಲ ಎಂದಿರುವ ಅಂಬರೀಶ್‌, ಮಂಡ್ಯ ಜನತೆಗೆ ಅಭಿನಂದನೆಗಳನ್ನು ತಿಳಿಸಿದರು.

“ಬಣ್ಣದ ಜೀವನದಿಂದ ರಾಜಕೀಯಕ್ಕೆ ಬಂದು, ಎಲ್ಲ ರೀತಿಯ ಅಧಿಕಾರವನ್ನೂ ಅನುಭವಿಸಿದ್ದೇನೆ. ಆದರೆ ಈಗ ಆರೋಗ್ಯ ಸರಿಯಿಲ್ಲ. ಕ್ಷೇತ್ರದ ಜನರಿಗೆ ಕೆಲಸ ಮಾಡಲು ಆಗದಿದ್ದ ಮೇಲೆ ಚುನಾವಣೆಗೆ ಸ್ಪರ್ಧಿಸಬಾರದು,” ಎಂದವರು ಹೇಳಿದರು.

ಟಿಕೆಟ್‌ ಹಂಚಿಕೆಗೂ ಮುನ್ನ ಕೆಪಿಸಿಸಿ ಕಾರ್ಯಾಧ್ಯಕ್ಷ ದಿನೇಶ್‌ ಗುಂಡೂರಾವ್‌ ಅಂಬರೀಶ್‌ ನಿವಾಸಕ್ಕೆ ಭೇಟಿ ನೀಡಿದ್ದರು. ಆ ವೇಳೆ ಅಂಬರೀಶ್‌ ಈ ಬಾರಿ ಚುನಾವಣೆಯಲ್ಲಿ ಸ್ಪರ್ದಿಸಿದರೆ ಗೆಲ್ಲುವುದಿಲ್ಲ ಎಂಬ ಗುಪ್ತಚರ ಇಲಾಖೆಯ ಮಾಹಿತಿಯ ಬಗ್ಗೆ ಚರ್ಚಿಸಿದರು. ಈ ಬಗ್ಗೆ ಮಾತನಾಡಿದ ಅಂಬರೀಶ್‌, “ಕುಟುಂಬ ಸದಸ್ಯರ ಮುಂದೆ ಬಂದು ನೀವು ಗೆಲ್ಲುವುದಿಲ್ಲ ಎಂದರೆ ಬೇಸರವಾಗುವುದಿಲ್ಲವೇ,” ಎಂದರು.

“ಮಂತ್ರಿ ಪದವಿಯಿಂದ ತೆಗೆದಾಗಲೇ ನನಗೆ ಯೋಗ್ಯತೆಯಿಲ್ಲ ಎಂಬುದು ಅರ್ಥವಾಯಿತು. ನಾನು ಚುನಾವಣೆ ಪ್ರಚಾರದಲ್ಲೂ ತೊಡಗುವುದಿಲ್ಲ. ಯಾರ ಪರವೋ ಪ್ರಚಾರ ಮಾಡಿ ಮತ ಯಾಚಿಸುವುದಾದರೆ ನಾನೇ ಏಕೆ ನಿಂತು ಗೆಲ್ಲಬಾರದು. ಕಾಂಗ್ರೆಸ್‌ ಪಕ್ಷದ ಪರವೂ ನಾನು ಪ್ರಚಾರ ಮಾಡುವುದಿಲ್ಲ,” ಎಂದಿದ್ದಾರೆ ಅಂಬರೀಶ್‌.

ಅಂಬರೀಶ್‌ಗೆ ಟಿಕೆಟ್‌ ನೀಡುತ್ತಿದ್ದಂತೆ, ಮತ್ತೊಬ್ಬ ಆಕಾಂಕ್ಷಿ ಗಾಣಿಗ ರವಿ ಕುಮಾರ್‌ ಮಂಡ್ಯ ಕಾಂಗ್ರೆಸ್‌ ಕಚೇರಿಯ ಮೇಲೆ ದಾಳಿ ಮಾಡಿದ್ದರು. ರವಿ ಬೆಂಬಲಿಗರು ಕಚೇರಿಯ ಪೀಠೋಪಕರಣಗಳನ್ನು ಪುಡಿ ಮಾಡಿದ್ದರು. ಕಡೆಯ ಹಂತದವರೆಗೂ ಅಂಬರೀಶ್‌ಗಾಗಿ ಕಾದ ಕಾಂಗ್ರೆಸ್‌ ಹೈಕಮಾಂಡ್‌ ಅಂತಿಮ ಹಂತದಲ್ಲಿ ಗಾಣಿಗ ರವಿಗೆ ‘ಬಿ’ ಫಾರ್ಮ್‌ ನೀಡಿದೆ.

ಇಬ್ಬರ ಗುದ್ದಾಟದಲ್ಲಿ ಮೂರನೆಯವರು ಲಾಭ ಮಾಡಿಕೊಂಡಂತೆ, ಪ್ರಜಾ ಟಿವಿಯ ಮಾಲೀಕರೂ ಆದ ಗಾಣಿಗ ರವಿಗೆ ಟಿಕೆಟ್‌ ಸಿಕ್ಕಿದೆ. ಅಂಬರೀಶ್‌ ನಿಂತಿದ್ದರೆ ಗೆಲ್ಲುತ್ತಿದ್ದರಾ ಇಲ್ಲವಾ ಎಂಬುದು ಗೊತ್ತಿಲ್ಲ. ಮತ್ತದು ಈಗ ಅಪ್ರಸ್ತುತ.

ಆದರೆ ಮೊದಲೇ ಒಕ್ಕಲಿಗ ಸಮುದಾಯದ ನಂಬಿಕೆ ಕಳೆದುಕೊಂಡಿರುವ ಕಾಂಗ್ರೆಸ್‌ಗೆ ಅಂಬರೀಶ್‌ ವಿದಾಯ ಶಾಪವಾಗಿ ಕಾಡಬಹುದು. ಕರ್ನಾಟಕದ ಪ್ರಮುಖ ಸಮುದಾಯವೊಂದನ್ನು ಎದುರು ಹಾಕಿಕೊಂಡು ಚುನಾವಣೆ ಎದುರಿಸಲು ಸಾಧ್ಯವೇ ಎಂಬುದನ್ನು ಚುನಾವಣೆಯ ಫಲಿತಾಂಶ ಹೇಳಲಿದೆ. ಗಾಣಿಗ ರವಿಗೆ ಟಿಕೆಟ್‌ ನೀಡುವ ಬಗ್ಗೆ ಅಂಬರೀಶ್‌ಗೆ ಬೇಸರವಿದ್ದು, ಚುನಾವಣೆಯಲ್ಲಿ ಕಾಂಗ್ರೆಸ್‌ ವಿರುದ್ಧ ಕೆಲಸ ಮಾಡುವ ಸಾಧ್ಯತೆಯೂ ಇದೆ.

ಒಟ್ಟಿನಲ್ಲಿ, ಖಳ ನಾಯಕನಾಗಿ, ಪೋಷಕ ನಟನಾಗಿ ನಂತರ ನಾಯಕ ನಟನಾಗಿ ಚಿತ್ರರಂಗದಲ್ಲಿ ಪ್ರಸಿದ್ಧಿ ಪಡೆದ ಅಂಬರೀಶ್‌ ರಾಜಕೀಯದಲ್ಲೂ ಹಲವು ಏಳುಬೀಳುಗಳನ್ನು ಕಂಡು ಈಗ ನೇಪಥ್ಯಕ್ಕೆ ಸರಿದಿದ್ದಾರೆ.

ಆದರೆ ಪಂದ್ಯದ ಕಡೆಯ ಓವರ್‌ನಲ್ಲಿ ಹೊಡೆಬಡೆಯ ಆಟವಾಡಿ ಕಾಂಗ್ರೆಸ್‌ಗೆ ಎಷ್ಟು ಸಾಧ್ಯವೋ ಅಷ್ಟು ನಷ್ಟವುಂಟು ಮಾಡಿ ಹೋಗಿದ್ದಾರೆ. ಈ ಮೂಲಕ ಹಳೇ ಮೈಸೂರು ಭಾಗದ, ಒಕ್ಕಲಿಗ ಪ್ರಾಬಲ್ಯದ ಜಿಲ್ಲೆಯ ಕಾಂಗ್ರೆಸ್‌ ಕೊಂಡಿಯೊಂದು ಕಳಚಿದೆ.